2
Jusiñamui caɨna jillotaja rafuena caɨ jamaiñena
1 Jusiñamui Jito siño jitonana jira, naimɨe birui lloga rafuena eo raise caɨ cacajasa. Naiemona abɨdo caɨ jaiñellena, naiena caɨ feitañellena, naiena eo raise caɨ ɨɨnuasa. 2-3 Ero, Jusiñamui ie jaɨenisaɨna jaie oretajanona, Moisés mɨcorɨmo dɨga rafuena jaie llote. Naie lloga rafuena bu raise fɨnoñenia, iena bu raise ɨɨnoñenia, Jusiñamui naimɨena eo duere fɨnode. Jusiñamui jaɨenisaɨ lloga rafue mare; iadedɨ Cristo birui lloga rafue jaɨenisaɨ jaie lloga rafue baɨfemo faɨa jira, Cristo rafuena caɨ ɨɨnoñenia, Jusiñamui caɨna duere fɨnollemona ua jilloñeitɨcaɨ. Ero, naimɨe caɨ jeacɨnomona caɨna jillotaiacade. Naie rafuena caɨ jamaia, iena caɨ ɨɨnoñenia, naimɨe caɨna duere fɨnollemona ua jilloñeitɨcaɨ. Caɨ Nama Cristo naie rafuena jaie llote. Naimɨena cacadɨnodɨ caɨmo iena jai llotɨmacɨ. Cristo rafuedɨ uanaicɨnona llotɨmacɨ. 4 Jusiñamui uai dɨga jɨaɨforiede siño rafuena naimacɨ fɨnuamona, Cristo rafuedɨ uanaicɨnona uiñotɨcaɨ. Naimɨe jitailla dɨese naga creyentemo Jusiñamuidɨ ie uaina itatate. Naga creyente naimɨe dɨbeimo raise maɨjɨllena, ie uaina itatate. Naga creyentemo naie uai illamona, Cristo rafuedɨ uanaicɨnona uiñotɨcaɨ. Ie jira naie rafuena caɨ ɨɨnuasa.
Caɨ isoi illena, Jesucristo ɨimana jaide
5 Jusiñamuidɨ ie jaɨenisaɨna oretauide, ie jitailla rafuena naimacɨ fɨnollena; iadedɨ naimacɨ anamo comɨnɨ ɨco illena jaca lloñede. Cristo anamo comɨnɨ ɨco illena llote. 6 Jusiñamuimo David mɨcorɨ iena jaie llote:
Caɨ jamai bue isoidɨcaɨ; iadedɨ caɨmo comecɨna facadɨo.
Jamai comɨnɨdɨcaɨ; iadedɨ caɨna canodɨo.
7 Caɨna comɨnɨna o fɨnua jira, o jaɨenisaɨ isoi iñedɨcaɨ.
Fiodaiñedɨmacɨ; iadedɨ nana enɨrue rana o fɨnuanona, Adán mɨcorɨ anamo iena jaie o itataja jira, caɨna eo iobitadɨo.
8 Nana rana naimɨe anamo o itatajana jaie llotɨo.
Iese llote; iadedɨ nana naie lloga rafue nia suiñede, jeacɨnona Adán mɨcorɨ jaie fɨnua jira. 9 Jesúna dane lloitɨcue. Naimɨena uiñotɨcaɨ. Enɨruemo naimɨe jaie billamona, Jusiñamui ecɨmona naimɨe billa jira, Jusiñamui jaɨenisaɨ illa isoi, dallu naimɨe iñede. Comena jaide. Caɨ facaina duere sefuillanona, naimɨe fiodaite. Caɨna Jusiñamui dueruillanona, nana caɨ facaina Jesús fiodaite. Naimɨe fiodailla jira, ie abɨmo naimɨena Jusiñamui abɨdo itatajamona, Jusiñamui naimɨena iobitade. 10 Jusiñamui nana rana fɨnode. Nana comɨnɨna comuitate. Naimɨena iobitallena, nana fɨnode. Naimɨe jitailla jira, naimɨemona marena jira, Jusiñamui ie Jitona orede. Caɨ facaina fiodaillena, ie Jitona orede. Caɨ jeacɨno facaina fiodaite. Ie Jito fiodaillamona, ailluena Jusiñamui comɨnɨna jaidɨcaɨ. Naimɨe illanomo ɨco iitɨcaɨ. Naimɨe jitailla jira, ie Jito duere sefuillanona fiodaite. Duere sefuillana ie Jito jai uiñuamona, naimɨena ɨɨnotɨnodɨcaɨna jai raise canorede. 11 Naimɨe fiodaillamona marebicaidɨcaɨ. Naimɨe dɨbeimo jai caɨ illa jira, daajena mooredɨcaɨ. Ie jira naimɨedɨ: “Cue comɨnɨdomoɨ” caɨna meiruiñeno llote. 12 Jusiñamui facaina lloraɨnɨ mɨcorɨaɨ llogacɨnomona naie rafue uanaicɨnona uiñotɨcaɨ. Jesús ie ɨco fɨnolle rafuena jaie llotɨmacɨ:
Ie comɨnɨmo ie Moo rafuena lloite.
Ie comɨnɨ dɨga naimɨe ofia, daajena Jusiñamuimo roitɨmacɨ
jaie llotɨmacɨ. 13 Jesúna dane ñaɨtɨmacɨ:
Ie comɨnɨ dɨga naimɨedɨ Jusiñamuina ɨɨnocana jaite.
Jusiñamui comɨnɨna damɨerie jailla jira, naimacɨdɨ jɨaɨ naimɨe comɨnɨ
ñaɨtɨmacɨ. Naimacɨ ñaɨa isoi, Jusiñamui comɨnɨna birui jaidɨcaɨ. 14 Jusiñamuina ɨɨnotɨnodɨ comɨnɨna jira, caɨ isoi naimɨe illena, Jesúdɨ comena jaide. Caɨ fiodailla isoi, naimɨe jɨaɨ fiodaite. Taɨfe uaina caɨ ɨɨnoia, jeacɨno fɨnodɨcaɨ. Iemona fiodaicana jaidɨcaɨ. Jeacɨno anamona caɨna Jesús jai jillotaja jira, Jusiñamuimona Taɨfe uai jai saide. Jusiñamui dɨbeimo iñenanomona jai jillodɨcaɨ. 15 Jesús nia fiodaiñenia, nana caɨ illa dɨnori fiodaillana jacɨruicana jaidɨcaɨ. Jesús jai fiodailla jira, caɨna jacɨruillacɨno anamona jillobitade. 16 Jeacɨno anamo naimacɨ iñena jira, Jusiñamui jaɨenisaɨmo ie comecɨna facañede; iadedɨ Abraham mɨcorɨ isoi ɨɨnotɨnomo naimɨe comecɨna facade. Naimacɨna naimɨe jilloitallena, naimɨedɨ comena jaide. 17 Comena naimɨe illena, Jusiñamui naimɨena orede. Caɨ isoi naimɨe duere sefuillena, naimɨena orede. Caɨ isoi ramo naimɨe Taɨfe faɨamona, naimɨe fueollena, naimɨena orede. Caɨ illana raise uiñote. Iemona caɨna dueruite. Jusiñamui jitaillacɨno fɨnuana raise uiñote. Ie jira Jusiñamui dɨga caɨ facaina nanoca ñaɨraɨmana naimɨe raise jaide. Ie jira caɨ jeacɨnona oni dotajana Jusiñamuimo jɨcanote. 18 Naimɨe duere sefuilla jira, naimɨe ramo Taɨfe faɨa jira, caɨ ramo Taɨfe faɨa isoi, naimɨe caɨna canorede. Taɨfe uai naimɨe ɨɨnoñena jira, caɨna canorede. Taɨfe uaina caɨ fɨnoñellena, caɨ comecɨaɨna ocuiñotade.