19
Anderac najneaj wüx Teat Dios
1 Wüx landoj aag ayaj, quiaj tanguiayiüs andeacüw xeyay nipilan tiül cielo, apiüngüw napac:
¡Aleluya! ¡Üjchiiuts gracias Miteatiiüts Dios!
Nej tawün icoots wüx asoetiiüts, nej netam marangüch casa, cuajantanej alndom marang.
2 Naleaing nej ajaw wüx asoet nipilan atnej netam nejiw.
Cos nej lamajaw wüx, lamayac asoet aaga natang nelomblombüy najtaj,
aaga tüüch marang nisoet meáwan nipilan wüx iüt.
Nganüy Teat Dios lamapalüch ombas, cos aaga najtaj quiaj tambiy monrang minajiüt Teat Dios, awüw.
3 Ndoj quiaj tapiüngüw alinomb:
―¡Aleluya! Üjchiiüts gracias Teat Dios, cos minasop aaga biümb niüng teandaab aaga nelomblombüy najtaj apmajndocndoc cawüx meáwan nüt ―awüw.
4 Quiaj ajcüwa ic miow apiquiw (24) montangtang ombas monxey, aton ajcüw apiquiw atnej nimal leaw almapac taquiejliw micosüw nejiw mejquiejow tiüt marangüw casa Teat Dios, aaga alcheten tiül najneajay trono, tapiüngüw:
―¡Amén, aleluya! ―awüw.
5 Condom quiaj tanguiayaran noic nanderac imiün niüng ajlüy aaga najneajay trono niüng chetejeran quiaj, tapiüng:
Irangan casa Miteatiiüts Dios,
meáwan icona monrang minajiüt nej,
masey chingüy masey natang, irangan nej casa, irangan leaw apiüng ―aw.
Nangos nüt wüx apmengoch owix Quicheech Sap
6 Condom tanguiayiüs atnej xeyay nipilan andeacüw, atnej atearriür lam, atnej atearriür tiüt ajüy monteoc. Nejiw tapiüngüw:
¡Aleluya! Miteatiiüts Dios lajlüy wüx meáwan cambaj, nej ndoj ombas marang cuajantanej leaw andiüm.
7 Ich mapac omeajtsaats, mayajcaats xeyay najneajay, marangaats casa Teat Dios;
lamatüch a ores mengoch owix a Quicheech Sap.
Minüx nej latajquiay majneaj maquiiüb minench nej.
8 Nej tüünd apix nej, masooig najneaj jael nenüt lino, nerixix, nelitlit ―awüw.
Pues aaga najneaj jael nenüt lino quiaj, apiüng wüx nguineay mondüüb Teat Cristo tarangüw najneaj atnej andiüm Teat Dios.
9 Quiaj nop ángel tasaj xic:
―Irang wüx nawiig, ipiüng: “Najneajay ich mapac omeajtsüw leawa tajpajüw metiw wüx tengoch owix a Quicheech Sap” ―aw.
Ndoj tasaj xic:
―Aaga poch ocueaj Teat Dios quiaj, naleaing ―aj xic.
10 Quiaj xique taquiejliüs xecos tiüt narang casa aaga ángel quiaj. Ndoj tasaj xic:
―Ngwüy, nde merang xic casa, cos xique nerangas minajiüt Teat Dios atnej ique irang, atnej arangüw meáwan mondüüb Teat Cristo, meáwan monyar andeac nej. Néjan Teat Dios irang casa. Cos aaga naleaing leawa taquiaach Teat Jesús, áag miün tandeacüw nomb ajcüwa mondeac andeac Teat Dios ―aj xic.
Nop nejtep raan cawüy
11 Condom tajawas lejquiaw a cielo. Quiaj tajntsop nop raan cawüy alwüx nejtep nej. Aaga nejtep cawüy quiaj minüt nej Nerang Leaw Apiüng Apmarang, at Naleaing alinoic minüt nej. Nej najneaj arang wüx ajaw wüx asoeteran, at wüx amb tiül montsoj. 12 Oniiüg nej atnej oniw biümb; alwüx omal nej xeyay corona. Aton almajiür noic minüt nej narangüch teombas nej; naleaing nejinguind ngo majaw cuane apiüng, néjan ajaw. 13 Almasooig noic apix nej nesong tiül quiej. Minüt nej Nanderac Ocueaj Teat Dios. 14 Meáwan monlüy tiül cielo tandüjpiw nej, ajteptepiw raan cawüy. Asoijquiw apixaw nejiw xowüy lajneaj jael nenüt lino, rajnüy, nerixix. 15 Ajüic imiün teombeay nej nots espada nexing. Naag aag ayaj apmandrooch ombas meáwan nación. Condom nej apmasap nejiw, müüch marangüw leawa nej apmapiüng. Nej apmarang wüx ombasüw nejiw atnej arangüch wüx uvas wüx ayacüch tiül noic nadam iquial niüng apmapatsüch miyow nej. Aag ayaj ajüiquich xeyay ajcüy majaw nejiw Teat Dios, y nej alndom marang cuajantanej. 16 Aton wüx aaga najal apix nej, at wüx mitsac nej narangüch minüt nej, apiüng: “Minatang Rey wüx meáwan Reyes, Natangüy wüx meáwan montangtang”, aw.
17 Quiaj tajawas nop ángel alembem wüx nüt, tendeac napac masaj meáwan quiec najlüel cawüx, tapiüng:
―Macaron, canchiüron, cos Teat Dios apmayac noic nadam nüeteran. 18 Cos apmetsamban mionij montangtang monajiüt, mionij minatangüw soldados, mionij aag xowüy lapat, mionij micawüy soldados, mionij soldados montep cawüy, mionij meáwan nipilan masey ngomeaag arangüw mos, masey mionij nipilan arangüw najon mos, mionij chingüy nipilan, mionij natang nipilan ―aw.
19 Quiaj tajawas aaga nimal atnej lüw almaquiiüb meáwan montangtang monajiüt wüx iüt at misoldadojüw nejiw. Nejiw sonongotoj matsojow maquiüjpüw aaga nejtep cawüy quiaj, at misoldados nej leawa almaquiiüb. 20 Quiaj aaga nimal atnej lüw quiaj, ndeaad maquiiüb aaga nerang ateócan, aaga newaiich nepiüng nej nop nendeac andeac Teat Dios. Nej tawaiich nipilan leawa tajiürüw misello aaga nimal atnej lüw quiaj, leaw tarangüw casa aaga narangüch dios. Ndoj ajcüwa ijpüw quiaj, tan apacüw tajlosüw tiül biümb niüng teandaab azufre. 21 Condom aldemas nipilan leaw taquiüjpüw aaga nimal atnej lüw quiaj tambiyaranüw naag aaga espada naw teombeay aaga nejtep cawüy quiaj. Ndoj meáwan quiec paxiüt üetiw matsambüw mionijeaw nejiw.