1-2 Dis wat happen den. Same time wen David dem stay come, da Amalek guys stay rip off stuffs inside da Negev Boonies an Ziklag town. Dey attack Ziklag an burn um. Dey grab da wahines an erybody dat stay ova dea, da young ones an da ol ones too. Dey no kill nobody, but make dem go wea da Amalek guys like go.

Three day afta David an his guys go way from Akish, dey come Ziklag. 3 Dey see dat da Amalek guys wen burn down da town awready, an make dea wifes an boys an girls prisonas! 4 David an his guys cry plenny, till dey not strong enuff fo cry no moa. 5  ✡ 30:5: 1Sam 25:42-43Da Amalek guys take away David two wifes too, Ahinoam from Jezreel, an Abigail, da widow from Nabal da Carmel guy. 6 David get trouble big time. All da guys stay piss off an huhu inside cuz a dea boys an girls. Dey start fo talk fo throw big rocks at David fo kill um. But David stay tight wit Da One In Charge, his God, an he stay strong inside still yet.

7  ✡ 30:7: 1Sam 22:20-23Den David tell Abiatar da pries guy, Ahimelek boy, “Try bring me da spesho pries kine ves you use fo aks God wat fo do.” An Abiatar go get um. 8 David aks Da One In Charge, “Az good fo me go chase afta dese guys dat wen rip us off, o wat? Can catch up wit dem, o no can?”

Da One In Charge tell, “Go! Chase um! Fo shua you goin catch um, an fo shua you goin get yoa peopo back!”

9 David an da six hundred guys wit him come by da Besor Gulch. Get two hundred guys dat no can move no moa. Az why dey stay dea. 10 Cuz dey real wipe out, dey no can go da odda side a da gulch. But David an da odda four hundred guys still yet go chase da Amalek guys.

11 Dey spock one young guy from Egypt inside da country side, an dey bring him by David, an give him watta fo drink, an food fo eat. 12 Dey get plenny fig all mash togedda, so dey cut off one piece an give um, an two bunch dry grape. He eat um an feel mo betta, cuz he neva eat o drink notting fo three days an three nites.

13 David aks him, “Who own you? Wea you come from?”

Da young guy tell, “I from Egypt. I da slave fo one Amalek guy. Da day befo yestaday, my boss leave me hea cuz I stay sick. 14 All us guys wen rip off stuff from da boonies wea da Keret peopo live Negev side, an da part da Judah peopo own, an da boonies wea da Caleb ohana live inside da Negev. Ziklag town, we burn all dat too.”

15 David aks him, “You can show me wea dose rip off guys stay?”

Da Egypt guy tell, “Firs ting, you gotta make one strong promise fo me in front God, dat you no goin kill me, o give me back to my boss! Den I can bring you down by dem.”

David tell um, “Shoots! Can.”

16 So da Egypt guy take David dem down. Wen dey get dea, get Amalek guys all ova, eating, drinking, an partying up, cuz get all kine stuff dey wen rip off from da Filisha land an from da Judah land. 17 David an his army guys attack da Amalek guys wen litto mo ready fo come light da nex morning. Dey stay fight um till afta da sun go down dat day. Ony four hundred young guys get away on top da camels. No moa no odda guys get away, 18 David dem get back eryting da Amalek guys wen rip off an David two wifes. 19 Eryting stay dea, young an ol peopo, boys an girls, an all da stuff da Amalek guys wen rip off. David dem take back eryting. 20 He take all da sheeps, goats, an cows. His guys make da animals dat dey take away from da Amalek guys, go in front da odda animals dey get awready. Dey tell erybody, “Dis da stuff dat David bring back from da fight!”

21 Den David dem come back wea da two hundred odda guys stay, da ones dat was real wipe out an no can go all da way wit David. Az why he wen leave um by Besor Gulch. Dey come out fo meet David an da peopo wit him. Wen David an his guys come nea, David aks da guys dat stay Besor Gulch side if eryting stay good wit dem.

22 Cuz a dat, some a David guys, da kine bad guys an guys dat like make humbug, dey tell, “Dese guys neva go wit us! So we no goin give dem notting from all da stuffs us bring back from fight! But erybody can take dea wifes an kids an go.”

23 But David tell, “No make lidat, my braddahs! You betta not make lidat wit all da stuff Da One In Charge wen give us guys. He take kea us guys awready, an he make us win da fight wit da rip off guys dat wen come agains us. 24 If you tink da oddas goin lissen wat you guys tell bout dis, no way! Da guys dat wen stay hea an take kea all oua stuffs, dey goin get all da same jalike us guys dat go down fo fight. Erybody goin share, same same.” 25 An from dat day, David make dat rule solid fo all da judge guys fo da Israel peopo. An nowdays, dey still make lidat.

26 Wen David come back by Ziklag, he sen some a da stuff da Amalek guys wen rip off to his frenz, da older leadas fo da Judah ohana. He tell dem, “Hea! I like give you guys some a da stuffs dat da guys dat stay agains Da One In Charge wen rip off from you guys.”

27 He sen da stuffs by plenny towns: fo da leada guys inside Bethel, Ramot inside da Negev, an Jattir, 28 Aroer, Sifmot, Eshtemoa, 29 an Rakal; an da towns wea da Jerahmeel ohana guys live, an da Ken peopo, 30 an by da leada guys inside Hormah town, Bor Ashan, Atak, 31 an Hebron town. David sen stuff to da leadas fo all da odda places wea him an his guys wen go hang out befo time.