6
Wass Good Fo Peopo
1 I see anodda bad kine ting unda da sun dat put plenny presha on peopo. 2 God give peopo rich kine stuff, odda stuff, an one good name. Dass how dey get eryting dey like. But maybe God no let um feel good bout da stuff dey get. Den goin get one guy from anodda place goin get um. An dass da guy goin stay good inside bout da odda guy stuffs. But all dat no make sense! Make you sick fo tink bout um.
3 Maybe one guy get hundred kids an live long time. But if he no stay good inside bout da good tings he get, an peopo no show respeck wen dey bury him, den no matta how long da guy stay alive. Dis wat I tink: One bebe dat mahke awready wen he born, stay mo betta den da guy. 4 Wen dat mahke bebe born, no make sense. He go way in da dark, an his name stay cova ova in da dark. 5 Da mahke bebe no see da sun eva, an donno notting. But he get mo res den da guy dat get eryting— 6 An even if da guy dat get eryting stay alive fo two tousan year, dat no mean he stay good inside bout his stuffs. Cuz wen dis guy an da bebe mahke, dey goin go da same place erybody go!
7 All da hard work peopo do, az fo give dem food fo eat.
But dey no mo enuff.
8 One guy dat know wat fo do erytime
Not mo betta den one stupid guy!
If one guy dat no mo notting know how fo ack in front odda peopo,
How dat goin help him?
9 Stay good inside bout da stuff you see.
Az mo betta den tink bout da nice tings you no moa.
Wen you tink bout nice tings you no mo, no make sense.
Az jalike you chase da wind.
10 Wateva get, awready get one name,
An erybody know how peopo stay.
An nobody can make argue
Wit somebody dat argue mo betta den dem.
11 Cuz if you argue plenny,
No goin make sense.
Wat good dat goin do?!
12 So who know wass good fo peopo do all da time dey stay alive? Dey ony get short time fo live, jalike one shadow dat no stay long time, an dat no make sense. An who can tell dem wat goin happen unda da sun afta dey mahke?