12
Da One Dat Make You
1 So all da time you stay young,
No foget da One dat wen make you—
Tink bout him befo da time come
Wen you come ol an get trouble,
An befo da time you figga,
“No mo notting make me feel good inside no moa!”
2 Befo da sun an da light from da moon an da stars look dark cuz you ol,
An da dark rain clouds stay come back fas afta da rain pau.
3 No foget da One dat wen make you,
Befo da time come
Wen da legs an arms dat take kea yoa house come ol an shaking,
An da strong guys stay bend ova,
Wen da teets dat grind da wheat quit,
Cuz ony some a dem stay,
An da eyes come dark fo da ones dat look thru da window,
4 Da ears no hear good,
Jalike somebody shut da doors dat let da street noise come inside.
Dey hear ony litto bit noise cuz dey grind ony litto bit wheat,
Peopo wake up wen da birds start fo sing,
But dey no hear da tunes good.
5 No foget da One dat wen make you,
Wen peopo come sked a high places,
An stay sked wat can happen on top da streets.
An wen da almond tree get flowa,
An da grasshoppa move slow,
An no mo powa fo sex,
Cuz dass da time peopo go da place wea dey goin stay foeva.
An da peopo dat stay sad inside fo dem go aroun to dea funeral.
6 No foget da One dat wen make you
Befo da silva rope broke.
O da gold bowl broke,
An befo da pitcha by da puka fo watta come smash,
O somebody broke da wheel fo pull watta from da well.
7 O oua body go back inside da dirt wea we come from,
An oua spirit go back by God dat give um to us.
8 Da Teacha tell, “No make sense!
No mo notting make sense!”
How Da Tinking End
9 Da Teacha, he know wat fo do erytime. An even moa, he teach da peopo bout wat he know an fo dem know um too. He tink bout um, an try find out even mo, an put togedda plenny stuff dat da smart guys tell. 10 Da Teacha tink bout how fo find da bestes way fo tell um. Wat he write tell da right kine stuff, an da tings dat stay true.
11 Wat da guys tell dat know wat fo do erytime, az jalike da sharp poles fo poke da cows fo make um go da right way. Eryting dey tell, az jalike da kine nails dat stay solid wea dea owna poun um. Eryting dey tell come from God, da one good sheep guy. 12 Eh my boy! Get anodda ting too: Make shua you no trus da odda kine stuff dat some peopo teach.
Peopo write mo an mo books. Too much study make yoa body come weak.
13 Now dat you wen hear eryting,
Dis da mos importan ting:
Get choke respeck fo God,
an do wat He tell you fo do,
Cuz az da kuleana fo erybody.
14 Erybody gotta go in front God da Judge bout eryting dey wen do,
Even all da stuff dey try hide, no matta good o bad.