1 So da king an Haman go eat wit Queen Esther. 2 Wen dey stay drink da wine on da day numba two, da king aks one mo time, “Queen Esther, wat you like? I goin give um to you. Wat you stay tell me fo do? I give um to you, even half a eryting I own.”

3 Den Queen Esther tell, “O King, if you fo real like me, an you tink az good, try let me live! Az all I aks you fo do. I beg you fo let my peopo live too! 4 Cuz somebody wen sell out me an my peopo fo kill us. If dey ony wen sell us fo come slaves, da guys an da wahines, den I no say notting, an I no like bodda you wit dis. Cuz da kine trouble us guys goin get from come one slave, ony litto bit.”

5 King Xerxes aks Queen Esther, “Who da guy wen do dis? Wea da guy dat get big head an like do dis?”

6 Queen Esther tell, “Da guy dat hate us, he dis real bad guy Haman!”

Den Haman come real sked in front da king an queen.

7 Da king stan up. He come real huhu. He leave his wine, an go outside, inside da palace garden. But Haman know awready, da king make up his mind wat he goin do. So Haman stay dea an beg Queen Esther fo let him live. 8 Den da king come back from da palace garden to da place wea Esther make da dinna. But he see Haman go down on top da couch wea Esther stay, begging her fo give him chance.

Da king tell, “Dis guy Haman, he even like fool aroun wit da queen wen she stay hea inside da house wit me!”

Wen da king tell dat, da king helpa guys put one cloth on top Haman face fo show he gotta mahke.

9 Den Harbona, one a da king guys dat no can make kids, tell, “Eh, you know, get one sharp pole 75 feet long ova dea by Haman house fo kill somebody. He make um fo poke um thru Mordecai body, da guy dat wen tell bout da two guys dat wen like murda you, da king.”

Da king tell, “Go poke um thru Haman body!” 10 So dey poke thru Haman body da long sharp pole dat he wen make fo poke um thru Mordecai body. Den da king no stay huhu no moa.