1 Abraham wen marry one mo time, an his new wife name was Keturah. 2 She born fo him Zimran, Jokshan, Medan, Midian, Ishbak, an Shuah. 3 Laytas, Jokshan get two boys, Sheba an Dedan. Da Ashur peopo, an da Letush peopo, an da Leum peopo, dey all come from Dedan. 4 Midian, he get boys, Efah, Efer, Hanok, Abida, an Eldaah. All dese peopo, az da Abraham ohana from Keturah dea muddah.
5 Abraham make eryting fo Isaac get all Abraham stuff afta he mahke. 6 Fo da odda kids dat born from Abraham an his odda wifes, Abraham give each kid plenny stuffs befo he mahke, but den he make um move house da east side fo no stay nea his boy Isaac.
7 Dass da story bout wat wen happen da time Abraham stay alive. He live 175 year. 8 Abraham get eryting he like, an he feel good inside. He live uku plenny year an he stay good inside. Den he mahke. He go da same place his ancesta guys wen go. 9-10 ✡ 25:9-10: Start 23:3-16Abraham boys, Isaac an Ishmael, dey bury him inside da cave Makpelah side, nea Mamre town, inside da land dat Abraham buy from Efron, Zohar boy, da Het guy. Dey bury Abraham, da same place he bury his wife Sarah. 11 Afta Abraham mahke, God do plenny good tings fo Abraham boy Isaac. Isaac make house nea da puka fo watta dat dey call Beer-Lahai-Roi, dat mean, “Da Puka Wea Da God Dass Alive Wen See Me.”
Da Ishmael Ohana
12 Dis da Ishmael Ohana story. He Abraham boy, da one dat Hagar wen born fo Abraham. She da Egypt wahine dat wen work fo Sarah. 13 Da boys dat come from Ishmael, dis dea names from da oldes to da younges: Nebaiot was da numba one boy, den Kedar, Adbeel, Mibsam, 14 Mishma, Dumah, Massa, 15 Hadad, Tema, Jetur, Nafish, an Kedmah. 16 All dese guys, dey Ishmael twelve boys, an dey all get dea place fo live. Da peopo dat live dea wen give dea places da same name jalike da Ishmael boys dey come from, cuz dey da main guys dea fo dea ohanas. 17-18 Da places wea da Ishmael boys go fo live start from Havilah an go all da way to Shur nea da Egypt land, wea you go Ashur side. But Ishmael, he live da east side a all his ohana guys.
Dass da Ishmael story, how was da time Ishmael live. He live 137 year. Den he mahke an he go da same place his ancesta guys wen go.
Da Isaac Ohana Story
19 Dis da Isaac Ohana story, bout Isaac an his faddah Abraham. 20 Wen Isaac was 40 year ol, he marry Rebecca. Her faddah, Betuel da Aram guy from Paddan-Aram. Rebecca get one braddah, Laban da Aram guy.
21 One time Isaac pray to Da One In Charge fo give his wife Rebecca one bebe, cuz she no mo bebe yet. Da One In Charge lissen wat Isaac wen pray. Den his wife Rebecca come hapai. 22 Was twins, an feel jalike da two bebes pushing each odda aroun inside her. Den she tell Da One In Charge fo tell her, “Wass happening? If dass how I stay, how come lidis?”
23 ✡ 25:23: Rome 9:12Da One In Charge tell her,
“Get two peopos inside you.
Two diffren ohanas goin come from you,
An dey goin stay agains each odda erytime.
One peopo goin be mo strong den da odda peopo.
Da older braddah ohana goin work fo da younga braddah ohana.”
24 Wen time fo her born da bebes, she born da twins. 25 Da firs one come out get red skin an choke plenny hair all ova. Az why dey call him Esau, cuz soun kinda like “plenny hair,” dea language. 26 Afta dat, da odda braddah come out. He stay holding Esau heel wit his hand. Dass how come he get da name Jacob, cuz soun kinda like “grab heel,” dea language, an soun kinda like “take ova” too. Wen da boys wen born, Isaac 60 year ol.
27 Laytas, wen da boys come big, Esau come one real smart hunta guy, an he like stay outside in da boonies. Jacob, he mo quiet kine, an he like live inside da tents. 28 Isaac, he love Esau mo den he love Jacob, cuz Isaac like grind da wild meat jalike Esau. But Rebecca, she love Jacob.
Esau Sell Da Right
Fo Get His Faddah Stuffs
Fo Get His Faddah Stuffs
29 Had one time, Jacob stay cook stew. Esau, he come back from da boonies, an he real tired an hungry. 30 Esau tell Jacob, “Eh braddah, give me some a dat red stuff fo grind, cuz I real hungry.” (Dass how come dey give Esau da nickname Edom, dat mean “red.”)
31 Jacob tell, “Shoots. But firs, you gotta sell me yoa right fo get oua faddah stuffs bumbye afta he mahke cuz you da oldes. Den I let you eat.”
32 Esau tell, “Eh, me, I litto mo mahke awready cuz I neva eat. No matta I get da right fo get his stuffs cuz I born befo you. Dat no mean notting—cuz I goin mahke!”
33 ✡ 25:33: Heb 12:16Jacob tell, “Swea to God right now fo you give me da right!” So Esau swea to God. Dass how he sell Jacob da right fo get dea faddah stuffs bumbye afta dea faddah mahke. 34 Den Jacob give Esau bread an lentil stew. An Esau eat an drink, an den he stan up an go way. Esau ack jalike he no kea, cuz he da oldes an he give away da right fo get his faddah stuff to Jacob.