21
Wat God Tell Isaiah Bout Babylon
1 Get heavy kine stuff fo tell too, bout wat goin happen to da Babylon land, Da Boonies By Da Sea:
“One army go come agains Babylon,
From one land wea da peopo real tough
An erybody stay sked a dem!
Dey goin go quick thru da Babylon land,
Jalike da kine big storm wind dat blow hard
Outa da boonies an go thru da south part a Judah.”
2 God wen show me stuff
Dat make me come real bum out jalike one bad dream:
“Jalike da guy dat like set up his braddahs,
He goin do um.
Da guy dat like bus up eryting,
He goin bus um up.
Da Babylon guys goin make plenny peopo suffa an moan,
But I goin make da Babylon guys stop all dat!
You Elam army guys, go afta Babylon town!
You Media army guys, make camp all aroun Babylon too,
Fo nobody go inside dea o come outside!”
3 Wen I hear dis, I come plenny sore inside
An I move my body.
Da pain stay grab me,
Jalike wen one wahine start fo born one bebe.
I stay all mix up an no can figga
Cuz a wat I wen hear.
Bodda me plenny an make me sked,
Wat I wen see.
4 I no can tink good!
I stay shake cuz I real sked!
I wait fo da light come litto bit,
But now da light come,
I stay sked even mo plenny!
5 Eh, you Babylon leada guys!
Make da table ready fo one luau!
Put down da mats!
Eat an drink up!
But make shua yoa shields stay ready!
Cuz you goin fight, right now!
6 Dis, az wat God my boss tell me:
“Go put one watcha guy outside
Fo tell us wat he see.
7 If he see war wagons
An plenny horse wit um,
Guys stay riding on top donkeys,
An on top camels,
Den he gotta look real good,
An lissen!”
8 Den da watcha guy talk loud,
Jalike one lion:
“Eh boss, ery day I stay on top hea
I stay look all da time,
Ery nite I stay stan hea all nite.
9 ✡ 21:9: JShow 14:8; 18:2An now, look!
One guy inside one war wagon stay come,
Get two horse stay pull um.”
Den somebody tell, “Babylon town stay all bus up!
All da idol kine gods fo Babylon,
Stay all smash an all on top da groun!”
10 God tell, “Bummahs! My Israel peopo,
You pooa guys stay all bus up,
Jalike wen dey smash da wheat on top da groun
Fo take out da junk kine stuffs.”
Dass wat I wen hear from Da One In Charge,
Da God Ova All Da Armies,
Da God fo da Israel peopo.
He wen tell me all dat fo help you guys.
Wat God Tell Isaiah Bout Edom
11 Get heavy kine stuff fo tell bout Dumah,
Da Edom land, wea nobody stay awready.
Somebody stay yell to me
From da Seir Range, Edom side:
“You dat stay watch ova dea,
How much time lef dis nite?
Wen da dark no goin be no moa?”
12 Da watcha guy tell um,
“Morning stay come,
An den da nite come.
If you guys ova dea like aks, az okay.
Go, den come back one mo time an aks.”
Wat God Tell Isaiah Bout Arabia
13 I get heavy kine stuff fo tell bout da boonies up country da east side from Judah:
“You Dedan peopo,
You get wagons fo carry stuffs fo sell,
An you make camp nite time wea get plenny tree
Inside da boonies up country.
14 You peopo dat stay live inside da Tema land,
Go bring watta fo da thirsty peopo,
An go take food to da peopo
Dat stay run away from Babylon.
15 Dey wen run away
From da guys dat stay chase um wit swords,
An from da guys wit bow an arrow dat stay ready fo shoot um,
From all da bad kine stuff dat happen wen get war.”
16 Dis da ting God my boss tell me: “Befo pau one year, jalike one guy dat get work contrack mark how many days mo till da contrack pau, all da rich stuff inside Kedar no goin be no moa. 17 Ony goin get litto bit mo guys from da Kedar army dat know how fo fight good wit bow an arrow, dat still stay alive.”
Dass wat Da One In Charge tell, da God fo da Israel peopo.