46
Da Idol Kine Gods From Babylon
Da gods Bel an Nebo from Babylon,
Dey no stan up no moa!
Da statues dat look jalike dem,
Dat you Babylon guys carry befo time
Fo make parade,
Now you guys put um on top animals,
An dey stay heavy fo even da animals carry um,
Cuz dey tired.
Da two Babylon gods,
Dey no can stan up no moa.
Dey no can bring back dea statues.
Dass why da Babylon gods stay prisonas too.
Dey gotta go wea eva peopo carry da statue.
 
Lissen to me, you Jacob peopo,
An all you Israel peopo
Dat still stay on top da land.
I wen carry you guys from da start,
An wen lif up you guys from da time you wen born.
Even wen you guys come ol an get gray hair,
I still Da One In Charge.
I still goin help you guys.
I wen make you guys
An I goin carry you guys.
I goin get you guys outa trouble.
 
Fo shua, no mo nobody jalike me!
Who you goin tell, me an dem, same same?
You tink get somebody you can tell
I jalike dem, an dey jalike me?
No way!
Get peopo pour out gold from dea money bag,
An weigh dea silva on top da scales.
Dey pay one metal worka guy
Fo make da gold come one god.
Den dey go down an put dea face on top da groun
An pray to um.
Dey carry da idol kine god up on top dea back,
An bring um to da place dey goin put um.
An put um down dea.
Da idol kine god stan up ova dea
An no move.
Somebody call out to um, but da idol no can talk.
Da idol no can get nobody outa trouble.
 
No foget all dis,
Bout Da One In Charge an yoa idol kine gods.
Come strong inside!
An you guys dat no like lissen,
Tink bout dis ova an ova.
No foget da stuff dat wen happen
Long time befo time.
Cuz me, I God.
No mo anodda god stay jalike me.
10 From da start, I da One stay tell
How da end goin come.
From long time befo time, I tell tings
Dat nobody do yet.
I da One tell dis: “Da plan I make,
Az how goin happen.
I goin do eryting how I like fo do um.”
11 I call one eagle from da east side—
Az one guy from one far place—
Fo him do wat I wen make one plan fo do.
Fo shua, wat I tell I goin do,
I make one plan fo do um, an I do um!
12 Lissen to me, you hard head guys,
You guys dat no even like try
Fo do da right kine stuff!
13 I stay do wass right erytime,
An I goin come nea you!
I no stay far.
I no goin wait long time
Fo get my peopo outa trouble.
On top Mount Zion
I goin get da Israel peopo outa trouble,
An dey goin tell peopo how awesome I stay.