5
Deborah Sing One Song Cuz Dey Win
1 Dat day Deborah an Barak, Abinoam boy, sing dis song:
2 “Wen da leada guys fo Israel
Go all out fo help da peopo,
An da peopo go wit dem,
Az da time fo talk good bout Da One In Charge!
3 “Hear dis, you king guys!
Lissen, you leada guys!
I goin sing fo Da One In Charge. I goin sing!
I goin make one mele fo Da One In Charge,
Da God fo da Israel peopo.
4 “Da One In Charge, wen you go out from da Seir Range,
Wen you march outa da Edom land,
Da earth shake, da sky pour down watta.
Da clouds make rain.
5 ✡5:5: Outa 19:18Da mountains shake in front Da One In Charge, da One from Mount Sinai.
Dey shake in front Da One In Charge, da God fo da Israel peopo.
6 “Da time Shamgar, Anat boy, stay alive,
Da time Jael stay alive, nobody walk on top da roads.
Da peopo dat go odda place,
Dey use da small paths dat go aroun.
7 Inside da small towns, no mo nobody go outside,
Till me, Deborah, go in front dem,
Jalike I one muddah fo da Israel peopo.
8 Befo time, wen da peopo pick new gods,
Den get war in front da gates fo da big town,
But no mo shield o spear
Fo 40,000 Israel guys.
9 I get love an aloha fo da ones dat make da rules fo da Israel peopo,
An fo da Israel guys dat volunteer fo da army.
I like fo dem talk good bout Da One In Charge!
10 “You importan guys dat ride on top da nice looking donkeys,
Sitting on top saddle blankets,
An you regula guys dat walk on da road,
Tink plenny bout dis!
11 Tink bout wat da guys tell, dat share da watta
Wen dey stay nea da watta places.
Dey tell how Da One In Charge erytime do wass right,
An how da peopo from da small towns Israel side do wass right.
“Den da peopo dat stay tight wit Da One In Charge
Go down by da gates fo da big town. Dey tell:
12 ‘Deborah, wake up! Wake up!
Wake up an sing someting!
Barak, Abinoam boy, get up!
Take da guys you wen make prisonas!’
13 “Den da guys dat stay alive still yet,
Dey march down from Mount Tabor agains da army leada guys.
Da peopo a Da One In Charge,
Dey come down fo me wea da awesome fighta guys stay.
14 Some a my guys come from Efraim,
From wea da Amalek peopo live befo time.
Da Benjamin guys follow you wit da odda peopos.
Da captains come down from Makir,
Da Zebulun guys carry one stick
Fo show dey one main army leada.
15 Da leada guys from Issakar stay wit Deborah.
Jalike Barak wen do, Issakar do da same ting.
Dey run down da valley wen he tell um fo go.
But some a da Reuben ohanas,
Da peopo tink hard bout wat dey goin do.
16 How come you Reuben guys stay sit nea da fires inside da camp?
You like hear da guys whistle fo call da sheeps, o wat?
Some a da Reuben ohanas,
Da peopo try fo figga wat dey goin do.
17 Da Gilead peopo stay da odda side a da Jordan Riva.
Da Dan peopo, how come dey hang out by da boats?
Da Asher peopo stay by da coast,
An wait by da boat harbor.
18 Da Zebulun peopo, dey volunteer fo mahke.
Da Naftali peopo same ting,
An dey take ova da top side a da place wea dey fight.
19 “Da king guys from Canaan come an fight
By Taanak, by da Megiddo watta.
But dey no rip off silva o odda stuffs from da guys dey kill.
20 Was jalike da stars fight from da sky!
From dea path, dey fight Sisera.
21 Da Kishon Gulch wash dem away.
Da gulch dat stay from befo time, az Kishon.
No sked, go fo it, march!
22 Den da horse hoofs poun an make big noise.
Dey strong, an dey run an run.
23 Da angel messenja guy from Da One In Charge tell,
‘Put kahuna on top da Meroz peopo! No give um chance!
Cuz dey no come fo help Da One In Charge agains da strong guys.’
24 “Jael, her Heber wife, da guy from da Ken ohana.
I like good tings happen to her,
Mo den to all da odda wahines!
From all da wahines dat live inside tents,
Do da bestes kine stuff fo her!
25 Sisera aks fo watta, an she give him milk.
Inside one nice bowl good enuff fo da alii
She bring sof cheese fo him.
26 She put out her hand fo grab da tent peg.
She get da kine hamma da worka guys use, inside her right hand.
She wack Sisera. She smash his head.
She stab da side a his head wit da peg
An smash um thru da bone!
27 He fall down by her feet.
An stay dea.
An he all wipe out,
Mahke die dead!
28 “Sisera muddah look thru da window,
An yell thru da window,
‘How come his war wagon take long time fo come?
How come no can hear da noise from all his war wagons?
How come his wagon no make noise?’
29 Da wahines dat help her, dey stay akamai.
Dey tell her no worries.
An she figga,
30 ‘Fo shua, dey stay rip off all da stuffs from da Israel peopo.
An dey give some to each odda.
All da guys get one o two girls.
Sisera get nice clotheses.
He get da embroida stuff,
An he goin give embroida scarfs to me
Fo wear aroun my neck!’ ”
31 Deborah tell: “Da One In Charge, I like all da guys dat stay agains you, come wipe out!
But I like da peopo dat get love an aloha fo you,
Come jalike da bright sun wen stay shine in da sky.”
Den da peopo res, an no fight nobody fo forty year.