1 Get one guy Micah, from da up country Efraim land, 2 Micah tell his muddah, “Somebody steal twenny-eight poun silva from you. You put kahuna on top whoeva wen take um, an I wen hear bout um from you. Look! I get da silva hea. I da one wen cockaroach um.”

Den his muddah tell, “I like fo Da One In Charge do good tings fo you, my boy.”

3 He give back da twenny-eight poun silva to his muddah. She tell, “Now I make one strong promise fo give dis silva to Da One In Charge. Den I goin turn da silva ova to my boy, fo him make one idol, da kine peopo carve, an anodda idol, da kine peopo melt metal fo make um. I goin give da silva back to you.” 4 Den he give back da silva to his muddah. So she take bout five an one half poun silva, an give um to one guy dat know how fo make stuff wit silva, an he use um fo make one idol, da kine peopo carve, an anodda idol, da kine peopo melt metal fo make um. Dey put um inside Micah house.

5 Dis guy Micah get one sacrifice place. He make one spesho pries kine ves, an some idols, an make one a his boys come da pries fo him. 6 ✡17:6: Local 21:25Dat time, da Israel peopo neva get king. Erybody do wateva dey figga az good.

7 Get one young Levi guy from Betlehem, inside da Judah land, dat live wit da Judah ohana. 8 He leave Betlehem an go look fo anodda town fo stay. Wen he stay go, he come Micah house up country Efraim side.

9 Micah aks him, “Wea you wen come from?”

He tell, “I one guy from da Levi ohana. I come from Betlehem inside Judah. I stay looking fo one place fo stay.”

10 Micah tell um, “Go live wit me. Come jalike one faddah fo me, an be my pries guy. I goin give you four ounce silva ery year, yoa clotheses, an yoa food.” 11 So da Levi guy tell Micah dat he goin live wit him, an da young guy come jalike one a Micah boys. 12 Micah make da Levi guy come one pries. So da young guy come his pries, an live inside his house. 13 Micah tell, “Fo shua Da One In Charge goin make good to me. Cuz dis Levi guy come my pries guy.”