1 Jesus tell, “Dis fo shua wat I tell you guys: If get one place fo da sheeps, an somebody no go inside dea by da gate, but he go climb ova da wall anodda place, dat guy ony like steal da sheeps. 2 But da guy dat go inside by da gate, dass da guy dat take kea da sheeps. 3 Da guy dat watch da gate, he open um fo da sheep guy. Da sheeps hear da sheep guy voice wen he call dem by dea name, an den he bring dem outside. 4 Afta he bring um outside, he go in front dem, an da sheeps go wit him, cuz dey know his voice. 5 Dey no goin go wit one guy dat dey donno. Dey goin run away from dat guy, cuz dey donno dat guy voice.”

6 Jesus tell dem dis story fo teach um, but dey neva undastan wat he stay teaching dem.

7 Den Jesus tell um one mo time, “You guys undastan dat? Kay den, I like tell you guys dis too: I jalike da gate fo da sheeps. 8 All da odda guys dat come befo me, dey jalike steala guys. But da sheeps no lissen dem guys. 9 I jalike da gate. If anybody trus me, God goin take um outa da bad kine stuff dey stay in, an let um go. Dass jalike dey goin go inside God place thru da gate, az me. An dey goin go wea eva dey like go an find food fo eat. 10 Da steala guy, he ony come fo steal, kill, an bus up da place. But I wen come fo da peopo come alive inside, an fo dem live to da max.

11 “Me, jalike one good sheep guy, cuz da good kine sheep guy ready fo mahke fo his sheeps.

12 “But if get one worka guy dey pay, den he not da sheep farma guy. He no own da sheeps. So wen he spock one wild wolf coming, he run away from da sheeps. Den da wolf grab da sheeps, an all da odda sheeps run all ova da place. 13 Da worka guy run away, cuz he ony stay working fo da money, an he no kea fo da sheeps.

14 ✡10:14: Matt 11:27; Luke 10:22“I jalike one good sheep guy. I know my sheeps, an dey know me, 15 jalike my Faddah know me, an I know my Faddah. I mahke fo my sheeps. 16 I get odda sheeps too, dat no come from dis place. I gotta go get dem too. Dey goin lissen my voice, an dey goin come togedda, an be jalike one ohana wit one sheep guy.

17 “Dis how my Faddah show love an aloha fo me: cuz I goin mahke fo come back alive one mo time. 18 No mo nobody can make me go mahke. Ony me can tell I gotta mahke, an come back alive. Dass wat my Faddah wen tell me fo do.”

19 One mo time da Jew guys make argue wit each odda cuz a wat Jesus tell. 20 Plenny a dem guys tell, “Eh! Da buggah get one real bad kine spirit in charge a him, an he pupule! How come you guys stay lissen him?”

21 But odda guys tell, “Nah! One guy wit one bad kine spirit in charge a him no talk lidis! You tink one bad kine spirit can make one blind guy see? No way!”

22 Get one spesho religious kine ceremony. Dass wen da Jew guys rememba da time wen dea ancestas make da Temple inside Jerusalem spesho fo God one mo time. Da ceremony was winta time. 23 Jesus walk aroun inside da open lanai fo da Temple wea da place dey call da “Solomon Lanai” stay. 24 Da Jew leada guys come aroun him an tell him, “Eh, how long you goin make us guys wait? Tell us fo real kine if you da Christ Guy, da Spesho Guy From God!”

25 Jesus tell, “I tell you guys awready, but you guys no trus me. Da tings I stay do cuz my Faddah give me da right fo do um, dat show who me. 26 But you guys no trus me, cuz you guys not my sheeps. 27 My sheeps, dey hear my voice. I know dem. An dey stay tight wit me. 28 I goin make dem alive to da max foeva, an no come cut off from God. An nobody can grab dem away from me. 29 My Faddah wen give dem to me. He get mo powa den anybody. Dass why nobody can grab dem away from my Faddah. 30 Me an my Faddah, we stay one.”

31 One mo time da Jew leada guys pick up stones fo throw um at Jesus fo kill um. 32 Jesus tell dem, “I wen show you guys plenny good tings dat I wen do fo my Faddah. Now, wat one a dose good tings you guys throw stone at me fo?” 33 ✡10:33: Pries 24:16Da Jew leada guys tell him, “We goin throw stone at you fo kill you, cuz you stay talk bad bout God, not cuz you do good kine stuff. No matta you ony one guy jalike us, you stay make jalike you God!”

34 ✡10:34: Songs 82:6Jesus tell dem, “Eh, God wen tell dis in yoa Rules, ‘I tell you guys, da ones in charge, you guys gods.’ 35 Kay den. We know dat eryting da Bible tell from befo time, stay true. So, if God call dem guys he talking to ‘gods,’ 36 how come you guys tell dat I talk bad bout God, cuz I tell dat I God Boy? Da Faddah tell I spesho fo him, an he sen me hea inside da world. 37 If I no stay do wat my Faddah like fo me do, den you guys no need trus me. 38 But I stay do wat my Faddah like me fo do. So, no matta you guys no trus me, trus ony da stuff I do. Den you guys goin know an undastan dat my Faddah stay tight wit me, an I stay tight wit my Faddah.”

39 So one mo time dem guys try fo grab him, but he dig out.

40 ✡10:40: John 1:28Jesus go da odda side a da Jordan Riva, wea John wen baptize firs time. He stay ova dea. 41 Plenny peopo go by Jesus. Dey tell, “John neva do awesome stuff fo show who him, but eryting he tell bout dis guy Jesus stay true!” 42 An plenny peopo go trus him ova dea.