18
Bildad Talk Some Moa
1 Den Bildad from Shuh ansa back Job lidis:
2 “Peopo like you goin talk till no mo notting fo tell!
Tink! Den we can talk.
3 How come you tink we jalike da animals?!
You tink us stupid, o wat?!
4 You stay real huhu an come all bus up cuz a dat!
You tink erybody gotta leave dis world jus cuz a you, o wat?!
You tink da cliffs gotta move aroun cuz a you, o wat?!
5 ✡18:5: Job 21:17“Fo shua, da bad guys goin mahke,
Jalike dea light come pio,
An jalike dea fire no burn no moa.
6 Da light inside dea tent come dark.
Da light pio by dea side.
7 Wen da bad guys walk, dey ony can take one short step.
Da plans dey make jam um up.
8 Az jalike one net catch dea feets.
Jalike dey walk wea get branches ova one hole.
9 One trap grab dea heel.
Dey no can get outa da rope aroun dea leg.
10 Jalike one rope stay on top da groun wea dey no can see um,
Inside da road, waiting fo grab um.
11 All aroun da bad guys, get stuff dat make um real sked,
An dat bodda um ery step.
12 Cuz da bad guys hungry, dey not strong.
An bad kine stuff stay ready fo happen to dem
Weneva dey fall down.
13 Da real bad kine sick
Go afta da bad guys an eat some a dea skin.
Dea arms an legs come poho,
Az da worse way fo mahke!
14 Da bad guys tink dey safe inside dea tent.
But da sick drag dem outa dea,
An make um go by da skery King Fo Da Mahke Peopo Place.
15 Goin get tings inside da bad guys tents, dat not da bad guys stuff.
Da new ones scatta burning sulfur inside um.
16 Da bad guys, jalike one sick tree.
Da roots come dry undaneat dem,
An da branches all dry up above dem.
17 Nobody in da world rememba dem.
Erybody foget wat kine guys dey was.
18 God push out da bad guys from wea get light,
An make um go inside da dark place.
Dey get kick outa da world.
19 Da bad guys no mo kids, an no mo ohana come from dem.
No mo nobody stay alive wea dey wen stay befo time.
20 Wen da time come fo judge da bad guys,
Peopo from da west side goin come bum out cuz a wat wen happen to dem.
An peopo from da east side goin come plenny sked!
21 Peopo goin tell, ‘Fo shua, dis wea da peopo dat no do wass right wen live,
Da place fo peopo dat donno God!’ ”