10
Da Silva Trumpets
1 Da One In Charge tell Moses: 2 “Make two silva trumpets from da kine silva dey poun wit da hamma. Dey goin be fo you call da peopo togedda, an fo tell da diffren ohanas wen fo leave da camp. 3 Wen da pries guys blow da two trumpet same time, dat mean, all da peopo goin come togedda in front you outside da place fo go inside da Tent Wea Da Peopo Meet Me. 4 If ony one trumpet stay blow, dat mean, ony da leada guys in charge a da Israel ohanas goin come togedda in front you. 5 Wen you guys hear three short blow from one trumpet, da ohanas dat make dea camp da east side goin start fo go. 6 Wen dey blow da nex three short blow from da trumpet, da camps da south side goin start fo go. Da noise from da trumpet goin tell dem wen fo start fo go. 7 Fo tell da peopo fo come togedda, blow da horns, but not wit da same kine noise, make um long time.
8 “Aaron boys, da pries guys, dey goin blow da trumpets. Dis goin be dea kuleana, an dey goin do um foeva. 9 Wen you guys go fight inside yoa land agains da guys dat put presha on you guys, blow three short time wit da trumpets. Den me, yoa God, Da One In Charge, no goin foget you guys an get you guys outa da way from da guys dat stay agains you. 10 An wen you guys stay real good inside, wen you guys make da spesho religious kine ceremonies, an da New Moon spesho times, you guys goin blow um long time wit da trumpets ova yoa sacrifices dat you burn up an da sacrifices fo show dat me an you stay good. Dass how da trumpets goin make me no foget you guys. Cuz me, Da One In Charge, I yoa God.”
Da Israel Peopo Leave Sinai
11 In da year numba two, month numba two, day numba twenny, da cloud go up from da Tent Fo No Foget Da Deal Wit God. 12 Dass wen da Israel peopo start fo go out from da Sinai Boonies, an go from dis place to dat place till da cloud come down inside da Paran Boonies. 13 Az was da firs time dey go out. Dey go jalike Da One In Charge tell Moses fo go.
14 Da ohana fo da Judah camp go firs, jalike one army unda dea flag. Amminadab boy Nashon stay in charge a dem. 15 Zuar boy Netanel stay in charge a da Issakar ohana. 16 An Helon boy Eliab stay in charge a da Zebulun ohana.
17 Den da pries guys take down da Tent, an da Gershon an Merari ohana guys dat carry um, go out afta dem.
18 Da Reuben ohana go nex, jalike one army unda dea flag. Shedeur boy Elizur stay in charge a dem. 19 Shelumiel Zurishaddai boy stay in charge a da Simeon ohana. 20 An Deuel boy Elisaf stay in charge a da Gad ohana. 21 Den da Levi guys dat come from Kohat go out, carrying da tings dat stay spesho fo God from inside da Tent. Da Gershon an Merari ohana guys suppose to put up da Tent befo da Kohat ohana guys reach da place.
22 Da Efraim ohana come nex, jalike one army unda dea flag. Ammihud boy Elishama stay in charge a dem. 23 Pedahzur boy Gamaliel stay in charge a da Manasseh ohana. 24 An Gideoni boy Abidan stay in charge a da Benjamin ohana.
25 Da las ones fo leave, dat stay ready fo fight if somebody catch um up, da Dan ohana go out, jalike one army unda dea flag. Ammishaddai boy Ahiezer stay in charge a dem. 26 Ocran boy Pagiel stay in charge a da Asher ohana. 27 An Enan boy Ahira stay in charge a da Naftali ohana. 28 Dass how da Israel ohanas go out, jalike dey one army, one afta da odda.
29 One time, Moses tell Reuel boy Hobab (Reuel from Midian, Moses faddah-in-law), “We goin go da place Da One In Charge wen tell us bout, wen he tell, ‘I goin give you dat land.’ Go come wit us, an we goin do good tings fo you. Cuz Da One In Charge wen make one promise he goin do good kine stuff fo us Israel guys.”
30 Hobab tell um, “No, I no like go. I like go back my land an peopo, az why.”
31 But Moses tell um, “Try no go way from us. Az cuz you know wea us guys gotta make camp inside da boonies. You goin be jalike da eyes fo us guys. 32 If you come wit us, we goin share wit you all da good kine stuff Da One In Charge goin give us.”
33 So dey all leave da mountain wea Da One In Charge stay, an go fo three day. Fo dose three days, da Box Fo No Foget Da Deal Wit Da One In Charge, dat da pries guys stay carry, go in front dem fo show dem wea fo res. 34 Ery day, day time, da cloud from Da One In Charge stay ova dem wen dey move camp.
35 ✡10:35: Songs 68:1Weneva da pries guys pick up da Box fo carry um, Moses tell,
“Go fo broke, Da One In Charge!
I like fo da peopo dat stay agains you, run away all ova da place.
I like fo da ones dat hate you, run away from in front you!”
36 An weneva da pries guys put down da Box fo res, Moses tell,
“Go come back, Da One In Charge,
By da plenny tousan Israel peopo ova hea!”