14
1 Da kine wahine dat know wat fo do,
She make shua da ohana inside her house stay solid.
Da stupid head kine wahine dat tink she know eryting,
Her da one jam up her ohana.
2 Da peopo dat live da right way,
Dey show dey get choke respeck fo Da One In Charge.
Da peopo dat stay do wrong erytime,
Dey show dey no give a rip bout Da One In Charge.
3 Wen da stupid kine peopo dat tink dey know eryting
Open dea mout,
Dey get slap on dea head
Fo ack high makamaka.
Da peopo dat know wat fo do,
Dey stay outa trouble
By da way dey talk.
4 Wen no mo cow,
Da kaukau box fo da cows all clean inside!
But wen you get powa from da cow fo pull da plow
Den you can get plenny food from da land.
5 Da kine peopo dat you can trus
Fo tell da trut in front da judge
Dey no bulai nobody.
Da kine peopo dat bulai erytime,
Dey goin bulai in front da judge too.
6 Da peopo dat no mo respeck fo nobody
Cuz dey tink dey real smart,
Dey try learn wat fo do, but dey no can.
But da peopo dat undastan awready,
Easy fo dem learn stuff.
7 No hang out wit da kine peopo dat tink dey get it,
But dey donno,
Cuz you no goin hear notting smart from dem.
8 Da peopo dat tink strait,
Da smart stuff dey do is,
Dey tink firs bout wat dey stay do.
Da stupid head kine peopo wit attitude,
Dey tink dey know wat fo do,
But dey bulai ony dem.
9 Da stupid head kine peopo wit attitude,
Dey ony laugh
Wen dey get da blame fo stay do bad kine stuff.
Da peopo dat do da right ting,
Dey get one good heart an plenny respeck fo each odda.
10 Ony da guy dat stay sad inside
Know how much he stay sore.
An wen somebody stay real good inside,
Odda peopo no can feel da same ting.
11 Da place wea da bad kine peopo ohana stay,
Goin come wipe out.
Da peopo dat do da right ting,
Any place dey stay, dey goin come okay.
12 ✡14:12: Smart 16:25Get some way dat look jalike az da right way fo you go,
But bumbye you goin go da Mahke Peopo Place.
13 Sometime, peopo laugh even wen dey feel sore inside.
Wen pau party, dey still yet feel sore inside.
14 Da peopo dat like go back do da bad kine stuff,
Dey goin get plenny bad kine pay back
Cuz a da way dey like live.
But da peopo dat do good kine stuff,
Dey goin get back mo plenny good kine stuff.
15 Da peopo dat donno notting, easy fo bulai dem,
Dey tink az fo real
Any kine dat peopo tell dem.
But da akamai peopo,
Dey tink firs bout wat dey goin do.
16 Da peopo dat know wat fo do erytime,
Dey sked an dass why dey stay outa trouble.
Da ones dat tink dey get it but dey no get it,
Dey jus jump right inside da trouble an no give a rip.
17 Da hot head kine peopo,
Dey do stupid stuff.
An da peopo dat make sly kine plan,
Erybody hate dem.
18 Da peopo dat donno notting an easy fo bulai,
Bumbye dey goin get stupid kine stuff.
But da akamai peopo
Dey learn plenny, an can do um.
19 Da bad kine peopo go
By da good kine peopo,
O wait outside da house
A da peopo dat do da right ting
Fo tell um dey need help.
20 Da peopo dat no mo notting,
Even da peopo dat live nea dem no like talk to dem.
Da peopo dat get plenny stuff,
Dey get plenny frenz.
21 Wen peopo no mo respeck fo da odda guy,
Az wrong,
But wen you kokua peopo dat no mo notting,
You can stay good inside!
22 You make one plan fo do someting bad,
Goin be one big mistake fo shua!
You make one plan fo do someting good,
God goin come tight wit you
An show you how fo trus him foeva.
23 You work hard, you get someting.
You ony mout, you goin owe money.
24 Da peopo dat know wat fo do erytime,
Da stuff dey get, show dey know wat dey stay do.
Da stupid head kine peopo wit attitude,
Da stupid kine stuff dey do, show dey stupid.
25 You tell da trut erytime in front da judge,
You stay make shua da guy dat neva do notting bad,
No need mahke.
But no can trus
Da kine peopo dat erytime bulai in front da judge.
26 Wen you get awesome respeck fo Da One In Charge,
You know notting bad goin happen to you,
An yoa kids goin stay wea nobody can hurt um.
27 Wen you get awesome respeck fo Da One In Charge,
Dass how you get life.
Dass how you can stay away
From da kine trap dat can kill you.
28 Wen da king get plenny peopo,
Make him look good.
But wen he no mo peopo,
He come wipe out.
29 Da guy dat stay long time so notting bodda him,
He undastan plenny.
Da guy dat come huhu real fas,
Erybody know him stupid.
30 No mo notting bodda you,
Make yoa body feel good.
You come jealous,
Da body come all poho.
31 Wen somebody put presha
On da peopo dat no mo notting
Fo take dea stuff,
Dass jalike he talk bad
Bout da One dat make dem.
Wen somebody show pity
Fo da peopo dat need help
He show he get respeck fo God.
32 Da bad kine peopo,
Dey goin get wipe out,
Wen dey do bad kine stuff.
Da peopo dat do da right ting erytime,
Even wen dey goin mahke
No mo notting goin hurt dem.
33 Da peopo dat can undastan stuff,
Dey feel good inside
Cuz dey know wat fo do erytime.
Da stupid head peopo wit attitude,
Sometimes inside dey know wat fo do.
34 Wen da peopo from one place
Do da right ting erytime,
Da place get mo plenny respeck.
But wen dey do bad kine stuff,
Erybody from dat place, come all shame.
35 Da govmen guy dat do one good job,
Da king like dat kine.
Da govmen guy dat make him come shame,
Da king, he no goin take dat.