17
1 If no mo noise in da house, an no mo worry,
Den no matta if ony get litto bit dry up bread fo eat.
Az mo betta den get one big luau
An erybody stay poin finga da odda guys.
2 Wen one akamai guy come one slave fo one ohana,
An if one a da boys from dat ohana make shame fo dem,
Da slave guy goin come da boss fo dat boy.
Wen da faddah guy mahke,
Dat slave guy goin get da same kine share
Jalike da odda boys,
From wat da faddah leave.
3 Fo find out if silva an gold, good o no good,
Gotta melt um on top da fire.
But Da One In Charge, he da One
Tell how peopo tink.
4 Da kine peopo dat stay do wass bad,
Dey lissen real good wen peopo talk bout bad tings dey like do.
Da bulaia guys,
Dey like lissen odda bulaia guys.
5 Anybody make fun a da peopo dat no mo notting,
Dey show dat dey no mo respeck fo God,
An he da One wen make dem.
Anybody feel good inside
Wen bad kine stuff happen to odda peopo,
Fo shua, God goin punish da guy dat feel good bout dat.
6 Da grankids, dey jalike one lei
Wen dey show respeck fo ol kine peopo,
An da younga peopo
Stay feel proud cuz a dea faddah-muddah guys.
7 If one stupid guy talk real nice,
Dat no make sense fo him!
If one alii guy talk bulaia kine,
Az mo worse still yet!
8 Wen somebody give money unda da table
To one guy dat he tink can help him,
Da guy dat give da money tink
Da odda guy goin change his mind.
An he tink
Da money jalike magic,
Fo make da odda guy do someting.
9 You get love an aloha fo somebody,
An if dey do someting agains you,
You let um go fo dat.
But if you stay talk bout wat dey wen do ova an ova,
You goin make even peopo you trus
No stay yoa frenz no moa.
10 Wen one guy dat undastan stuff
Do someting dat he not suppose to do,
You ony gotta tell him one time,
An he stop.
But fo da kine guy dat tink he know eryting,
Wen he donno,
You can whip him hundred time,
An he still no stop.
11 Da bad kine guys
Like make peopo go agains God.
But God goin sen one tough guy
Fo punish dem.
12 Mo betta if you meet one muddah bear
Right afta somebody steal her bebes,
Den if you meet one dumb buggah
Dat tink he no need learn notting,
Right afta he do someting stupid.
13 If somebody do someting good fo you,
An you do someting bad fo pay um back,
Bad kine stuff goin happen to yoa ohana!
14 Wen peopo start fo argue,
Az jalike you make puka in one dam
An let da watta come out an broke eryting.
Mo betta make um so notting bodda you,
An no say notting, befo you come
Jalike one wild animal.
15 Da One In Charge tink two kine peopo pilau:
One dat tell one guy dat do one bad kine ting “You okay, you neva do notting bad!”
An da odda dat tell one guy dat no do notting bad “You wen do someting bad!”
16 Poho, fo one stupid buggah pay plenny
Fo learn someting,
Wen he tink he no need learn notting.
Cuz he no like fo learn
Wat fo do erytime.
17 You get one fren,
An he get love an aloha fo you all da time.
You get one braddah, an he dea
Fo help you wen you need um cuz get trouble.
18 Da kine guy dat no mo brain,
He shake hand wen he make one deal,
An make one promise fo pay
Eryting dat some odda guy owe.
19 Da kine guy dat like go agains erybody,
He like make argue wit erybody.
Da kine guy dat put up one high door fo his house
Fo ack high makamaka,
Jalike he like fo somebody come bus um up.
20 Da kine peopo dat like do crooked kine stuff,
No mo notting goin come good fo dem.
Da kine peopo dat erytime like change dea story,
Bad tings goin happen fo dem.
21 If get one stupid kine kid
Dat tink he no need learn notting,
Da faddah-muddah guys stay sad inside.
Wen one boy stay ack stupid kine,
His faddah no feel good inside.
22 Wen you feel jalike you like dance an sing inside,
Dass good medicine fo yoa body.
But wen you stay sad inside,
Jalike yoa body all jam up.
23 Da bad guys, dey give money unda da table
Fo make shua da judge no judge da right way.
24 Da kine guy dat undastan stuff
Tink all da time bout
How he can know wat fo do erytime.
But da stupid buggah
Dat tink he no need learn notting,
He tink ony bout how fo get stuff dat he no need.
25 Wen one boy stay stupid an tink he no need learn notting,
Make da faddah guy feel real bodda,
An make da muddah feel real sore inside.
26 If one judge punish one guy
Dat stay do da right ting erytime,
Az not good!
An if he tell da police guys
Fo whip one a da good alii guys,
Az not right too!
27 Da kine guys dat know plenny,
Dey no need talk plenny.
An guys dat notting bodda dem,
Dey undastan plenny.
28 Even da kine stupid guy
Dat do bad kine stuff dat no bodda him,
If he no say notting,
Peopo goin tink he one guy
Dat know wat he stay do erytime!
If he no open his mout,
Peopo goin tink he smart!