9
God Judge Da Right Way
(Jesus Guys 7:31)
One David kine Song Fo God fo da main music guy use wit da tune “His Boy Mahke”
1 Eh! You Da One In Charge! I goin tell good tings bout you
From deep inside me.
I like tell all bout all da awesome tings you do.
2 I like dance an sing cuz I stay tight wit you.
I like tell good tings bout you
Cuz I know who you:
Da God Dass Mo Importan Den All Da Odda Gods.
3 Da guys dat stay agains me,
Dey turn aroun.
Wen dey come in front you,
Dey trip an fall down,
An dey come wipe out.
4 Az cuz you judge me awready
An tell dat no mo notting wrong wit me.
You sit on top yoa throne, cuz you da Judge.
You tell, I get um right wit you,
An you do wat stay right erytime.
5 You tell da diffren peopos dat donno you,
Dat you had it awready wit wat dey stay do.
You wipe out da peopo dat do bad kine stuff.
You make erybody foget who dem, foeva.
6 Dass why, da peopo dat stay agains me,
Dey all come wipe out.
Dea place fo live, gone awready,
An no goin come back.
You bus up dea towns,
An nobody even rememba dea name.
7 But Da One In Charge, he stay da king foeva.
He make his throne, da place fo judge da peopo.
8 He da Judge dat erytime do wass right
Wit da diffren peopos all ova da world.
He make shua da right ting happen
Fo da diffren peopos.
9 Az why Da One In Charge, he jalike one place
Wea da peopo dat get plenny presha can go hide
Any time dey get trouble.
10 Eh! You Da One In Charge! Da peopo dat know wat kine god you,
Dey trus you,
Cuz you no bag
From da peopo dat aks you fo help um.
11 Sing one song fo Da One In Charge,
Da king dat stay live on top Mount Zion!
Go by all da peopos,
Make shua dey know da tings he do.
12 Wen peopo dat suffa but no can do notting
Yell to Da One In Charge fo help,
He lissen, an he no foget.
Dass why he go afta da ones dat kill his peopo.
13 Eh! You Da One In Charge! Give me chance!
Look how da guys dat stay agains me make me suffa!
Bring me back up from da Mahke Peopo Place!
14 So wen I go back Zion Town,
I goin tell bout all da awesome tings you do!
I goin show dat I stay good inside
Cuz you wen get me outa trouble.
15 All da diffren peopos, dey fall down
Inside da same hole dey wen dig.
Da same net dey wen hide
Catch dea own feets.
16 Da One In Charge, he let peopo know him.
An he tell who do da right ting
An who no do da right ting.
Da peopo dat do bad tings,
Da tings dey stay do goin make trouble fo dem.
(Time out fo da music.)
17 All da peopo dat do bad tings,
I like dem go way to da Mahke Peopo Place,
All da diffren peopos dat ack jalike God no matta!
18 Nobody tink bout da peopo dat no mo notting.
But no goin be lidat foeva.
Da peopo dat not importan trus
Dat bumbye, God goin help dem,
An no mo nobody goin take dat away from dem.
19 Eh! You Da One In Charge! Do wat you gotta do!
Da peopo dat you judge, no let um win!
Bring da diffren peopos dat donno you in front you,
An judge um.
20 Eh! You Da One In Charge! All da diffren peopos dat donno you,
Make um come real sked.
Let um know, dey ony peopo,
Dey not God.
(Time out fo da music.)