25
One Guy Pray Fo God Show Him Wat Fo Do
One David kine Song Fo God
Eh! You Da One In Charge!
I stay trus you fo eryting inside.
You da God fo me!
I stay trus you.
 
So, no let me come shame.
Da peopo dat stay agains me,
No let um win ova me
An feel good cuz a dat!
Same ting fo all da peopo dat stay wait fo you
Cuz dey shua you goin help um.
No let dem come shame too!
But da back stabbas
Dat do um cuz dey like do um,
Make dem come shame!
 
Show me da diffren ways you do stuff.
Teach me how fo ack jalike you ack.
Show me how fo live da true way,
An teach me stuff I need fo know.
Cuz you da God fo me,
Da One dat get me outa trouble.
All da time, I know fo shua you goin help me.
Az why az okay fo me wait.
 
Eh! You Da One In Charge! Tink bout all da times
You wen show us guys pity
An da times you wen stay tight wit us guys,
Cuz dass how you stay make, from da start.
Eh! You Da One In Charge! Wen I was young,
I wen do bad tings an go agains you.
No tink bout me lidat no moa.
Mo betta, tink lidis bout me.
Tink bout how you stay tight wit me,
Cuz you good, az why.
 
Da One In Charge, he good
An he stay do wass right.
Dass why he stay show
Da peopo dat do bad kine stuff
Da right way fo go.
Da peopo dat no tink
Dey gotta be numba one erytime,
He show dem how fo go da right way.
He teach dem his way fo do tings.
10 Da way Da One In Charge stay ack all da time,
He stay tight wit his peopo,
An he da kine god good fo trus.
His peopo, dey da ones dat keep da deal
He wen make wit dem,
An dey stay do
Wat he wen tell um fo do.
 
11 Eh! You Da One In Charge! Cuz you like erybody know
Wat kine god you,
Az why you let me go
From all da bad kine stuff I wen do,
An you hemo my shame too.
Eh, get real plenny bad tings dat I wen do, you know!
 
12 Da ones dat feel jalike dey sked an shaking
Wen dey stay in front Da One In Charge,
Dey da ones Da One In Charge goin teach
Wat way fo go.
13 Dey da ones, eryting goin go good fo dem,
An fo da peopo dat goin come from dem too,
Dey goin come da land ownas.
14 Da peopo dat feel jalike dey sked an shaking
Wen dey stay in front Da One In Charge,
Dey stay real close to him,
Cuz he like make shua dey undastan
Wat da deal mean dat he wen make wit dem.
15 All da time, I tink bout Da One In Charge,
An tell him fo help me.
Cuz jalike get hunta guys dat like set up one trap fo me,
An Da One In Charge, he da One dat hemo my feets outa dea nets.
 
16 Eh! You Da One In Charge! Try turn aroun an look at me
An do someting good fo me.
Cuz no mo nobody fo help me,
An I get real hard time.
17 All da tings dat bum me out
An make me come sore inside,
Come mo an mo big.
Try get me outa all dat trouble!
18 Try look how bum out I stay,
An how weak I stay cuz a all dis!
Hemo da shame I get
Fo da bad tings I wen do,
An let me go.
 
19 Try look da guys dat stay agains me,
Cuz get plenny a dem,
An dey hate me real bad,
Dey like bus me up jalike dey like kill me.
20 Make shua notting bad happen to me!
An get me outa trouble!
No let dose guys make me come shame,
Cuz I stay telling you fo hide me.
21 Eh God! Watch ova me,
So dat notting bad happen to me!
Cuz I no bulai, an I do wass right!
I stay wait fo you
Fo do someting good.
22 Eh God! Get us Israel guys
Outa all da trouble we stay in!