116
God Take Kea Me So I No Mahke
1 I get love an aloha fo Da One In Charge,
Cuz wen I tell him I need help,
He lissen!
2 Cuz Da One In Charge lissen real good,
All my life, I goin yell to him
Fo help me!
3 Befo time I feel litto mo I goin mahke,
Jalike get tight ropes
Stay wrap aroun me.
I wen feel jalike da Mahke Peopo Place
Come on top me awready.
I wen had it, cuz plenny trouble
Come to me.
An me, I stay sad inside.
4 Den I yell fo Da One In Charge help me,
Cuz I know wat kine god him.
I wen pray lidis:
“Eh! You Da One In Charge!
Try help me!
Get me outa trouble,
Fo me no gotta mahke!”
5 Da One In Charge, he like give peopo chance,
An he erytime do wass right fo dem.
Oua God, he erytime get pity fo dem.
6 Da One In Charge, he take kea
Da peopo dat donno wat fo do.
Wen I was all hamajang,
He get me outa trouble.
7 I know notting can bodda me
No moa,
Cuz Da One In Charge
Wen do good tings fo me.
8 Cuz you, Da One In Charge,
You wen get me outa trouble
Fo me no mahke,
Az why I no need cry no moa,
An fall down.
9 Now, ery place I go, I stay nea
Da One In Charge
Right hea inside dis world
Wea peopo live.
10 ✡116:10: 2Cor 4:13Dat time, I wen trus Da One In Charge,
No matta I tell, “I get plenny trouble!”
11 Cuz I stay real bum out, I wen tell,
“Erybody bulai,
An I no can trus nobody!”
12 So! Wat I can do
Fo Da One In Charge
Fo all da good tings
He wen do fo me, aah?
13 I goin tell Da One In Charge
“Mahalo plenny!”
Cuz I know wat kine god him.
An I goin make one drink kine offering,
Cuz he wen get me outa trouble.
14 In front a all God peopo,
I goin do eryting I wen promise
Da One In Charge fo do!
15 Wen da peopo mahke
Dat stay tight wit Da One In Charge,
He goin feel plenny sore inside
Cuz a dat.
16 Eh! You Da One In Charge! I one worka guy fo you,
Jalike my muddah was one worka fo you too.
An you wen hemo da tight ropes dat wrap aroun me.
17 I goin call fo you help me,
Cuz I know wat kine god you,
An I goin make one sacrifice fo you,
Fo tell you “Mahalo plenny!”
18 In front a all God peopo,
I goin go do eryting I wen promise
Da One In Charge fo do,
19 Inside da open lanais aroun da Temple
Fo Da One In Charge,
In da middo a Jerusalem town!
Eh you guys! Tell good tings
Bout Da One In Charge!