Da Ruth Story
Elimelek Move House Moab Side
1-2 Dis one story dat wen happen long time befo, da time wen ony da local leada guys was in charge a da Israel peopo. Had one guy Elimelek from Betlehem town inside da Judah ohana land. Da guy an his wife Naomi, dey get two boys, Mahlon an Kilion. Dey from da Efratah ohana. Dat time Judah side, long time no mo rain, so no mo notting fo eat.
Az why Elimelek take his wife an dea two boys, an dey move house odda side a da Jordan riva an live up country wit da Moab peopo. 3 But wen dey stay Moab side, Elimelek mahke. So den Naomi stay stuck dea wit her two boys. 4 Da two boys, Mahlon an Kilion, grow up an marry two wahines from da Moab peopo. Mahlon marry Ruth, an Kilion marry Orpah. Afta dey stay dea bout ten year, 5 da boys Mahlon an Kilion, dey mahke too. So Naomi, she stay dea alone. No mo husban, an no mo boys o grankids.
Naomi An Ruth Go Judah Side
6 Naomi stay Moab side still yet. Den she hear dat Da One In Charge wen figga az time now fo help his peopo Judah side, an he give food to dem. So Naomi an her two daughtah-in-laws make ready fo go way from da Moab land an go back da place Naomi come from. 7 Naomi an Ruth an Orpah, dey start togedda fo go way from da place Naomi live, an go back da Judah land.
8 But wen dey stay go, Naomi tell her two daughtah-in-laws, “Eh! Mo betta you guys go back by yoa muddah guys, you know. I like fo Da One In Charge stay tight wit you guys, jalike you wen stay tight wit yoa husban guys befo dey mahke. An you wen stay tight wit me too. 9 I like Da One In Charge fo help you guys find good, solid guys ova dea fo come yoa new husbans!” Den Naomi kiss Ruth an Orpah fo tell um aloha, an dey start fo cry plenny.
10 But da wahines tell Naomi, “No way! Us guys, we goin stick wit you, an go by yoa peopo!”
11 Naomi tell Ruth an Orpah, “Mo betta you guys go back! No good you go wit me. You guys tink I young still yet, o wat? Maybe you tink I goin stick wit da way my peopo do um, an get married fo get mo bebe boys. You figga wen da bebes come big, den dey come yoa husbans bumbye? No way! 12 You guys, you jalike my daughtahs, but mo betta you go back home. I too ol fo marry. If I wen get chance fo marry somebody tonite, an get boy kine bebes, wat you tink? No way! 13 You guys figga you goin wait long time fo dem come big, an you no goin like marry odda guys firs? No way, my daughtahs! I know you stay plenny sore inside, but fo me, eryting mo sore still yet, cuz was Da One In Charge Up Dea Inside Da Sky dat wen make me suffa.”
14 Den Ruth an Orpah start fo cry one mo time. Orpah, she kiss her muddah-in-law fo tell her aloha, an she go back home. But Ruth, she like stay tight wit Naomi. 15 Naomi tell her, “Eh look! Yoa sistah-in-law, she go back awready by her peopo an da god she pray to. Mo betta you do da same ting.”
16 An Ruth tell Naomi,
“No put presha on me
Fo go way from you
An go back home,
An no stay tight wit you.
Wea eva you go, I goin go.
Wea eva you like live, I goin live dea too.
Yoa peopo, dey goin be my peopo,
An yoa God, he goin be my God too.
17 An da place you mahke, I goin mahke dea too.
Dass wea dey goin bury me!
I like Da One In Charge punish me plenny
If I go way from you!
Us goin stick togedda
Till you mahke, o I mahke!”
18 So, wen Naomi undastan Ruth not goin change her mind an goin go wit her, Naomi no talk no moa.
19 So da two wahines go togedda Betlehem town.
Wen dey come dea, erybody inside da town start fo talk plenny bout dem. Da wahines, dey tell, “Fo real, dis Naomi, o wat?!”
20 Naomi, she tell um,
“Eh! Mo betta no call me Naomi,
Cuz dat mean ‘eryting nice.’
Mo betta call me Mara,
Cuz dat mean ‘eryting jalike bad taste.’
Cuz Da God Dat Get All Da Powa,
He wen make eryting come real junk fo me.
21 Da time I wen go way from hea,
I had plenny, my husban an my boys.
Now Da One In Charge bring me back hea,
An I no mo notting.
No good call me Naomi!
Cuz Da One In Charge,
He wen go agains me.
Da God Dat Get All Da Powa,
He wen make bad tings happen to me!”
22 Dass wat wen happen wen Naomi come back from da Moab land with her daughtah-in-law Ruth, da Moab wahine. Da time dey come back Betlehem, dass da same time da farma guys start fo harves da barley fo food.