2
Wahine:
1 Me, I jalike da kine flowa
Dat grow in da Sharon plain.
An da kine lily plant flowa
Dat grow in da valleys.
Guy:
2 Honey Girl,
Wen she stay wit da odda wahines,
She jalike da lily flowa dat grow
Wit thorn bushes dat grow all aroun her.
Wahine:
3 Yeah, an da guy dat love me,
Wen he stay wit da odda young guys,
He jalike one apple tree
Dat grow wit da wild fores trees all aroun him.
I feel real good wen I sit undaneat da shade from dat tree.
Az real sweet jalike fruit, wen he make love to me!
4 He take me one place fo peopo make party.
Az jalike he put up one flag ova me
Dat tell “Dis, Da Place Fo Make Love!”
5 Make me come strong wit raisins,
Make me come new one mo time wit apples,
Cuz I love him plenny, dat make me come weak!
6 His lef arm stay unda my head.
An his right hand stay aroun me.
7 Eh! You Jerusalem wahines!
I like you guys make one strong promise to me,
Fo tell da wild deers an da wahine deers,
Fo dem lissen wat you promise!
I like you make one promise to me:
No come real excited fo make love
Till da time stay right!
8 Lissen up! Look! I hear!
Da one dat love me stay come!
He stay jump across da mountains,
An stay run ova da hills, jalike one wild deer!
9 Da one dat love me stay jalike one deer, one young deer.
Look! He stay stan ova dea outside oua wall.
Looking thru da windows!
Thru da kine window dey criss-cross wit sticks!
10 Da one dat love me tell me dis:
“Go come by me, Honey Girl, You da one I love!
Stan up, come wit me, my beautiful one!
11 Cuz look! Da winta pau awready.
Da rain pau too!
12 Da flowas stay come up all ova da groun!
Time fo prune da grapes awready!
Can hear da doves singing all ova oua land!
13 Da fig trees get early fruits awready dat stay come ripe.
Smell nice, da grape plants dat get flowa.
Eh Honey Girl! You da one I love! Go come!
Go come wit me, my beautiful one!”
Dass wat he tell!
Guy:
14 Eh! You jalike my dove!
Jalike you get nes inside da rough rocks,
Inside da far places on da mountain side.
Let me see yoa face!
Let me hear you talk,
Cuz sweet, yoa voice stay!
An yoa face stay beautiful.
Wahine:
15 Go catch da foxes fo us—
Da small foxes dat jam up da grape farms
Wen oua grape farms get flowas.
16 Da one dat love me, he stay mines,
An I stay his.
He jalike one deer dat find his food wea da lily flowas grow.
17 Till da morning time wind start fo blow,
An da shadows go way,
Go come! You da one dat love me!
Make jalike one young wild deer
Dat stay in da canyons in da mountains!