SOTA PILMIRON SOLAT NEN SAN PABLO PARA SO NONTA IRA
I‐KORINTO
1
1-3 Si‐kak si Pablo ja makasolat niyay, jet si Sostinis ja agi tayod pamati, si‐katoy kadẃak. Sajay ya solat ko, para son si‐kayon kait ko ja too nen Apo Shiyos ja ẃared ta siyodad ni Korinto. Si Apo Shiyos i joka topogen panshedjawan niman na inpamatiyo son Cristo Jesus. Pinidi shakejo nen Apo Shiyos ja manbedin ni too to; isonga naykait kayo so nonta ira emin na emati so nen Apo Jesucristo shi kompormin dogad, tep si Jesucristo, si‐katoy Apo tayon emin ja emati.
Itnengi jo iyay ya ikowan ko tep si‐kak i sakey ya apostol nen Cristo Jesus, jet si Apo Shiyos i mismon enotok son si‐kak.
Say shawat ko son Apo Shiyos, sapay koma ta kaasi‐an tokejo, tan a‐shoman to sota talna ja ẃara son si‐kayo ja edapo met laeng son si‐kato ja Ametayo, tan si Apo Jesucristo.
Naka man‐iyaman ni pamatiyo, nem naka meshanagi mep eg kayo nankasakey
4-5 Naka man‐iyaman ni olay son Apo Shiyos, ta ebadeg i kaasi to son si‐kayo, niman na ẃara kayo ma so nen Cristo Jesus. Jet kabol nonta kaasi nen Apo Shiyos son si‐kayo, eshakel may mebedin na dag‐en jo. Isonga mebedin men eẃatan jo i toro nen Jesus, tan mebedin pay ja itoro jod eshom. Sajay ya inamta‐an jo maypangkep so nen Jesucristo, si‐katoy engipilmi ni pamatiyo. Jet niman ma, in‐akan ni Ispirito Santo nen Apo Shiyos i emin na mesepol jod pamati; enshiy kolang jo, angken niman na joka pansessesked ni idaw ali mowan nen Jesucristo ja Apo tayo. Si Apo Shiyos i mengi‐kan met laeng ni kedsang jo say enshiy jo kebedawan no onsabi sota akew wa pengigsheng nen Jesucristo ja Apo tayo no sipay maysedakan. Si Apo Shiyos i mebedin na panshindan, jet si‐katon mismo i engila‐kam son si‐kayo ja maykait so nen Apo Jesucristo ja Anak to.
10 Niman, iyay i kekshawen ko son si‐kayo ja a‐akik shi pamati. Nemnem jo si Jesucristo ja Apo tayon emin, say man‐i‐inawatan kayo koma. Eg kayo koma mebodak; pansaksakey jo et i nemnem jo say saksakey ngoy pangkep jo. 11 Ta ẃaray insodsod ira nonta too nen Kloi son si‐kak ey si‐kayon a‐akik shi pamati, ẃaray emanbabakal kono son si‐kayo. 12 Say sodsod sha, kowan kono ni eshom son si‐kayo ey si‐kak i onoren sha, nem sota ira eshom, kowan sha ey si Apolos ngo i onoren sha, ono si Pedro. Sota eshom, kowan sha kono ey si Criston mismoy onoren sha. 13 Na‐alas sotan na inpasing jo! Si Cristo komay emongsanan jo, nem ebolak kayo gayam! Apay si‐kak aya i naydansa shi koros ja engikesho ni basol jo? Apay inngadnan sha ayay ngaran ko nonta ebonjagan kayo? Enshi met: si Cristo! 14 Naka man‐iyaman ta enshiy eshakel la binonjagan ko son si‐kayo, say enshiy manpangkep ey ineẃis takejo. Say binonjagan ko bengat son si‐kayo, si Krispo nen Gayo. 15 Ta no istay ẃaray binonjagan kon eshakel son si‐kayo, sigosho mema‐ma ja ikowan jo ey si‐kak i onoren jo, ta binonjagan takejo. 16 (Ay owen pay gayam: angken sota pamilja nen Istipanas, binonjagan ko ira; nem enshiy eshom ma amtak ja nak binonjagan son si‐kayo, nem eg si‐kara bengat.) 17 Si Cristo, nonta inbetkagan towak so, inkowan to ey si‐kak i mengitosho nonta mapteng nga shamag maypangkep son si‐kato; aliẃen sota pemonjag i inbetkagan towak so. Inkowan pay nen Cristo ey ekak i‐osal i kalaing kon man‐a‐sel, ta no sotan i pesing ko, baka et ey ikowan ni too ey say kabol la na‐awisan ni eshakel, sota kalaing kon man‐a‐sel. Nem enshi: say na‐awisan sha, ineẃatan sha sota maypangkep ni inkatey nen Cristo shi koros.
18 Amtak ey sota toro maypangkep ni inkatey nen Cristo shi koros, endedamsis ira nonta toon shanshanin shosa‐en nen Apo Shiyos; nem say amta tayon emati ja shanshanin isalakan to, sota toro ja maypangkep ni inkatey nen Cristo, si‐katoy kawad‐an ni panakabalin nen Apo Shiyos. 19 Aliẃen kaskasshaaw iyay, tep angken nonta bayag da, ẃaray naysolat ja esel nen Apo Shiyos, ja kowan to ey, “Sheshalen koy kalaing ira nonta toon edaing jet angken sota takal ni matekal, dingdingen ko.” Kowan nen Apo Shiyos nonta bayag da. 20 Isonga enshi lay silbi nonta toro ni toon nankedaing, ono sota maistoro, ono sota toon matekal la man‐a‐sel, no sota biyag ja ẃara niman i shaka itoro, ta enshiy silbi to son Apo Shiyos; ta toro bengat ni tood ja dobong iyay.
21 Si Apo Shiyos, amta toy toka dagdag‐a, jet say plano to, angken ngantoy kalaing ni too, eg mebedin na sotan i amta‐an to so nen Apo Shiyos. Nem say inpasing to et ngo mowan, kowan to ey isalakan to ira sota memati nonta mika pan‐itoro maypangkep son Cristo, angken kowan ni nankedaing ey enshiy silbi ton toro. 22 Sota ira Hodiyos, eg ira kono memati no enshiy sha asen na panakabalin nen Apo Shiyos ja dag‐en min milagro, jet sota ngo ira toon kowan sha ey Grigo, eg ira kono ngo memati no enshiy na‐oneg ga toro ja mengi‐kan ni pannemneman sha. 23 Nem say mika pan‐itoro, sota maypangkep so nen Cristo ja naydansa shi koros, jet sajay ya inkaydansa nen Jesus shi koros, endedamsis ira ni Hodiyos, jet no sota ira Grigo, shaka ngo ikokowan ey enshiy kowinta to. 24 Nem sota ira Hodiyos, tan aliẃen Hodiyos, ja pinidi nen Apo Shiyos ja maysedakan, inamta‐an sha ey say kawad‐an ni panakabalin nen Apo Shiyos tan daing to, si Criston mismo. 25 Sota mika pan‐itoro ja edapo son Apo Shiyos, kowan ni toon eg memati ey enshiy kenshat to. Nem say agpayso, epatpateg ey say sota kowan sha ey daing sha. Kowan ngo ni Hodiyos ey ekapoy, nem epigpigsa et ngo mowan ey say sota ẃara son si‐kara.
26 Si‐kayon a‐akik shi pamati, nemnem jo kari sota inpasing nen Apo Shiyos son si‐kayo. Ootik son si‐kayo i kowan ni karakdan ey matekal, ootik pay son si‐kayo i ekayang i saad to, tan ootik pay son si‐kayo i nay‐anak ka baknang. Nem si Apo Shiyos, pinidi tokejon maysedakan. 27 Owen, si Apo Shiyos, pinidi to sota endedamsis ni tood ja dobong ja kowan sha ey enshiy amta to, ono ekapoy, say onbaing ira sota kowan sha ey ẃaray amtara, tan sota kowan sha ey matekal. 28 Si Apo Shiyos, pinidi to ira sota kowan ni tood ja dobong ey ebaba, tan sota shaka damsisa, ono sota kowan sha ey enshiy silbi to, say ipa‐sas to ey say kebenoli ni too, eg maytotop nodta nemnem to. 29 Inpa‐sas to iyay say angken sipa, enshiy to idastog so nen Apo Shiyos, ja to ikowan ey ẃaray nandasinan to shi eshom. 30 Nem si Apo Shiyos, inda‐kam tokejo so nen Cristo Jesus; isonga ẃara may koston daing jo, jet sotan met laeng i edapo son Apo Shiyos. Aliẃen sotan bengat, no diket tokejoka ibilang ey singa enshiy basol jo jet kayoka ma mankai‐inges son si‐kato, jet anongosto ma ey maysedakan kayo. 31 Agpayso noman sota naysolat nonta bayag da ja kowan to ey, “Sota piyan ton mandastog, si Apo Shiyos komay idastog to.”