1 Nontan, shimakel la pasiyay totoon emay‐odo‐odop son Jesus, ja shaka pay pan‐ikatin i sedi ni eshom. Jet nontan, ẃaray inkowan nen Jesus, nem ẃa‐ẃa‐shen sota too to i toka pan‐ikowani so; kowan to ey, “Tanshaaniyo iray Parisiyo, tep singa mapteng ira nem o‐owap gayam i kamapteng sha. Baka ma‐edinan kayo ni ngaaw wa ogadira, ja singa inges toy para debag ni tinapay ja toka edinay kaydaokan to. 2 Kowan sha emo ey enshiy maka‐amta ni ogadira, nem kenshat ta ma‐amta‐an. Emin na ngaaw wa aramid ni too ja shaka i‐emot, ma‐amta‐an ngoreshan. 3 Emin na esel la sikrito, ma‐amta‐an shi karakdan, tan emin na esel la maytetobo shi naydekeb ba kowadto, maykeljaw ngod karakdan. 4 Kagajem ko, iyay i kowan ko son si‐kayo. Karekayo ontakot so nonta ira makakontra son si‐katejo, tep bakdang bengat i kabaalan shen bono‐en. 5 Nem say mesepol la metekotan koma, si Apo Shiyos, ta ẃaray kabedinan ton mengipedaw son si‐kayo shi impiyarno nem meksheng kayon metey. Owen, mesepol la si‐katoy tekotan jo!

6 “Nem ẃara ngoy ebadeg ga semek nen Apo Shiyos. Nemnem jo kari sota titit. Enshiy banol ni titit, nem eg to ira ibiyang. No ẃaray menongkal ni titit, angken showen sintimos i dima, nem angken sakey so nonta ira titit, enshiy en dinibkan nen Apo Shiyos. 7 Angken pay sota bowek ni toktok jo, amta nen Apo Shiyos i kabebilang to. Isonga karekayo ontakot tep nandasin i semek to son si‐kayo nem say sota eshakel la titit.

8 “Iyay pay i ikowan ko son si‐kayo. Sota toon mengikowan so ni too ey ẃara son si‐kak, si‐kak ja kowan sha ey Anak ni Too, ikowan ko ngo shi sango‐an ira ni anghil nen Apo Shiyos shi dangit ey sotan na too ket took ka emepiyal. 9 Nem sota toon mengikowan so ni too ey eg towak amta, ibiyang ko ngo shi sango‐an ira nonta anghil nen Apo Shiyos shi dangit.

10 “Angken sipen too ja ngaaw i toka ikokowan maypangkep nonta kowan sha ey Anak ni Too, mebedin na mepekawanan. Nem sota ngaaw i toka ikokowan maypangkep nonta Ispirito Santo nen Apo Shiyos, eg mebedin na mepekawanan.

11 “No idaw shakejon mebistigal shi sango‐an ni toray ni Hodiyos, ono shima engaton toray, karekayo meshanagan no ngarantoy isongbat jo ono ngarantoy ikowan jo son si‐kara, 12 ta sota isongbat jo, ipa‐amta met laeng ni Ispirito Santo nen Apo Shiyos son si‐kayo nontan na oras ja shakejosoka pan‐ibag‐i.” Kowan nen Jesus.

13 Waray toon naydaok nodtan na eshakel la totoo ja kowan to ey, “Maistoro, ikowan mo son agik ey panbingay mi sota tawid ja minos‐an to.”

14 Nem si Jesus, kowan to ey, “Kajem ko, aliẃen si‐kak i mengigsheng nita tawid jon kowan mo ey panbingay jon san‐agi.”

15 Jet intoloy ton ẃaray inkowan to so nonta totoon eshakel ey, “Pantanshaan kayo ta baka ẃaray pengamkam jo ni kompormi, ono apal jo ni kokowa ni eshom, ono ma‐isew kayo. Say biyag ni too, aliẃen shi kokowa toy toka pandepo‐i, no diket si Apo Shiyos i nanngel, angken ngantoy kabaknang to.” 16 Jet si Jesus, in‐arigan to ira ja kowan to ey, “Waray baknang ja asdeg toy toka epita nodta bo‐day to. 17 Say kowan to shorog ni bakdang to, ‘Enshiy pengitdo‐an ko nima eshakel la apit ko. Ngantoy pesing ko aya?’ 18 Nannemnemnem, jet say kowan to shorog shi bakdang to, ‘Sajay gayam i dag‐en ko. Bagbagen ko ima sigod ja naka pengitdo‐i et mengemagak ni ebadbadeg, jet si‐katoy pengitdo‐an ko ni emin na apit ko, tan sama eshom pay ya kokowak. 19 Jet say ẃara med nemnem ko, ekak ma manshanag tep ẃaren emin i mesepol ko ni pigen tawen. Angken ekak ma man‐obda! Menganak tan menginomak bengat. Dadsak may dagdag‐en ko!’ 20 Nem say kowan nen Apo Shiyos so nontan na baknang, kowan to ey, ‘Dokodoko tan na nemnem mo! Niman na dabi, odi‐en koy biyag mo! Jet eg mo kenasen ita emin na kokowam ma inolnong mo!’ ”

21 Kowan pay nen Jesus ey, “Say pengidmang nen Apo Shiyos so ni toon baknangan to bengat i toka nemnemnema, ebadeg i nankolangan to. Say mepesamak ali son si‐kato, inges to sota epasemak so nonta baknang shiyay den istoriya.”

22 Si Jesus, kowan to so nonta too to ey, “Isonga say kowan ko son si‐kayo, aliẃen kayo meshanagan ni panbiyag jo: no ngarantoy kenen jo ono ibaro jo. 23 Ta say biyag tan bakdang, epateg nem say mekan tan baro. Si Apo Shiyos i engi‐kan ni biyag tan bakdang et si‐kato ngoy mengi‐kan ni kasapolan to. 24 Idmang jo kari ira ja kaẃang ono owak: eg ira manmoda ono mengepit; enshiy shaka pengitdo‐i ja sarosal sha. Nem si Apo Shiyos i ememekan son si‐kara! Jet araẃin nandasin i semek to son si‐kayo nem say sota ira titit. 25 Sota joka panshanshanag, eg to met peshokey i biyag jo ni angken ootik bengat. 26 No sota shanag jo ket eg to posi‐en iyay ya ootik ka banag, apay nga sota panbiyagan joy joka panshanagi pay laeng? 27 Asas jo kari ira sota sabsabong shima shontog; nemnem jo kari no toway toka pesing nga manbiyag. Eg met man‐obda ono mengebel ni baro, nem iyay i ikowan ko son si‐kayo. Angken si Ari Solomon ja kabaknangan nonta bayag da, emin sota osal ton nankemapteng, eg sha pay ingesen i kamapteng ira nima sabsabong. 28 Sota sabsabong, maganoy ka‐enshi to: emansebong niman et no meẃa‐ẃa, maypool shi apoy. Nem si Apo Shiyos ket eg to i‐oway. Sinto pay kayo mangon too to ja to i‐oway! Isonga eg tokejo baybay‐an. Si‐kayo, ootik eshan i pamatiyo, isonga kayoka meshanagin pasiya. 29 Tan aliẃen sota kenen jo tan inomen joy jo nemnemnemen. Karekayo manshanag, 30 tep si Amejon ẃared naykayang, amta toy emin na mesepol jo. Sota ira toon enshiy pamatira son Apo Shiyos, anam shen manshanag ni panbiyagan sha, aliẃen si‐kayo. 31 Nem say epateg komen nemnemen jo, sota pantoshayan nen Apo Shiyos. No sajay i pesing jo, emin na banag ja kasapolan jo, i‐eshom nen Apo Shiyos ja i‐akan son si‐kayo.

32 “Si‐kayon took ja naka banbantayi, karekayo ontakot. Angken ootik kayo, si Amejon ẃared naykayang, eman‐imdeng nga pasiya ja si‐kayoy mayda‐kam shi pantoshayan to. 33 Ilekoyoy kokowayo et sota pandeko‐an jo, i‐kan jo so nonta totoon makasapol. Sotan i koston pesing nga mengolnong ni kokowa shi dangit ja eg mepilshi. Shiman, enshiy mengibot so, tan angken sota baro, enshiy bigis sa onsharal so. 34 Shi dangit komay ẃa‐ẃa‐shen pengolnongan jo ni kokowayo, ta sota kawad‐an ni kokowayo, si‐katoy ẃared nemnem jo ni olay.

35-36 “Mesepol la esagana kayo ni olay ja enshiy ontiped ni pansilbiyo son si‐kak. Mesepol la ingesen joy kepansesked ni baga‐en shiyay ya istoriya. Waray toon dimaw ja eki‐atindar ni kasal et sota ira baga‐en to, kanayon na ireka mansessesked ali ni imotok to. Wara ni olay i silew sha, say no menogtog si apo sha, idokatan shen shagos. 37-38 Ta no onmotok ali, ja angken kawa ni dabi ono palbangon, sota ira baga‐en ton sebi‐en ton eg na‐ogip, bindisiyonan nonta apo sha. Man‐imdeng ira tep sota apo sha, petongaw to ira jet si‐kato et ngo mowan i mengi‐kan ni kenen sha. 39-40 Jet angken si‐kayo, pansagana kayo, ta say imotok ko ali, kompormin oras ja inges toy kaidaw ali nonta mengibot shi baley. No sota makabaley ket amta to koma no ngaranton oras ni edabi i idaw ali nonta mengibot, kenshat ta mansekana, eg to itolok ka onsekep sota mengibot shi baley to. Jet angken si‐kayo, mesepol la esagana kayo ni olay.” Kowan nen Jesus.

41 Jet kowan nen Pedro ey, “Apo, si‐kamin toom i inkowanan mo so niyay ya arig, ono angken pay sota karakdan?”

42 Si Apo Jesus, simongbat ja kowan to ey, “Sota baga‐en ja emepiyal, ja amta toy toka dagdag‐a, si‐katoy piyalen nonta apo ton mengimanshal ni kokowa to, tan si‐katoy mepiyal la mengi‐kan ni dasjon ira nonta kait ton baga‐en no timpo to. 43 Jet no sotan na baga‐en ket maramen eman‐obda ey onmotok ali sota apo to, mapteng i konkona ton i‐akan nonta apo to. 44 Agpayso iya ikowan ko son si‐kayo. Sotan na baga‐en, no sebi‐en nen apo ton eman‐obda, si‐katoy piyalen nen apo to ja en mengimanshal nonta emin na kokowa to. 45 Nem sota sakey ya baga‐en, ja kowan to ey, ‘Angkena tep si apok, metaktak alin onmotok’, kakaasi sotan. Ishogi ton sepsepdaten ira sota kait ton baga‐en, ja daleki man tan bibii, tan mesiẃat ni dadsak ton pengan tan penginom ingkatod keboteng to. 46 Kakaasi sotan na baga‐en tep sota apo to, on‐oli ali jet ondibag tep eg to amta sotan na i‐oli ali nonta apo to. Jet sotan na baga‐en, pekishosa to so nonta ira kait ton baga‐en ja eg mepiyal.

47 “Sota baga‐en ja amta toy piyan nonta apo ton dag‐en to, nem eg to pati‐en, embel‐at i shosa to. 48 Nem sota baga‐en ja eg to amtay piyan nonta apo ton dag‐en to, jet ẃaray dag‐en ton panbesolan to, engka‐jas i shosa to. Iyay i nemnemen jo koma. Sota toon ẃa‐ẃa‐shay nay‐akan son si‐kato, asdeg toy namnama‐en ni apo ton obda‐en to. Tan sota toon ebadbadeg i may‐eẃat son si‐kato, ebadbadeg ngoy songbatan to.

49 “Dimawak alin mengidaw ni singa apoy shiya dobong et sapay koma ta ẃara ma niman. 50 Waray bonjag alin mepesamak son si‐kak et enshiy talnak ingkatod meksheng. 51 Aliẃen jo ipangkep ey dimawak alin mengi‐kan ni olnos shiya dobong. Aliẃen sota maypangkep ni olnos i dinaẃan ko di, no diket say panbenagan ali ni indaw ko di, eg man‐i‐inawatan i totoo. 52 Manshoki niman, eg man‐i‐inawatan i angken toon sanpamilja. No kaspangarigan ẃaray nanpamilja ni dima, manshowa jet sota tedo, kabakal toy showa, tan sota showa, kabakal toy tedo. 53 Angken sota a‐ama, kabakal sha aliy annak sha. Kasta met iray i‐ina tan annak shen bibii, manbekal ira. Angken sota bibiin san‐inepo, manbekal ngo ira.”

54 Kowan nen Jesus so nonta ira eshakel la totoo ey, “No asen jo aliy kolpot ja medepod baybay, amtayo ey kenshat alin on‐oran. 55 Jet no dekna‐en jon emankedapo aliy shagem shi dogad ja kaptangan, amtayo ey kenshat ta onpetang ma diy timpo. Jet siya, kaonpetang i timpo. 56 Joka eẃatiy timpo alin onsabi no asen joy emankepasemak shi naykayang ono shiya dobong, nem apay nga eg jo eẃatan ey emin sota emepespesamak niman na timpon kawashak son si‐kayo, asdeg to met i kay‐odogan to! Ma‐o‐owap kayon too!

57 “Apay nga eg jo idasin i koston pansigshan jo? 58 Niman na ẃaray ẃaya jo pay laeng, panbebawi kayo ni eg jowak so pinati‐an. Ta say arig ni kasesaad jo, inges toy toon emankaikoyod shi oskaro maypangkep ni otang to. Isonga dagam i kabaalan mon mekikajem ma shagos son si‐kato no maramen tokaka pan‐i‐ilaw shima oskaro, say eg toka i‐awat nodta kowadja ja mengibedod son si‐kam. 59 Ta say kowan ko son si‐kam, no ẃara ka ma shima badoran, eg ka onbo‐day ingkatod bayshan moy oltimon sintimos ja inotang mo.”