1 Si Jesus, en nandogan nodta bangka et pati ira sota too to, jet dimaw ira shima siyodad ja ili to. 2 Jet nontan, ẃaray binangtal ali ni totoo jet sha in‐ilaw son Jesus. Sotan na toon in‐ilaw sha, eg makakeykey i bakdang to. Idi indasin nen Jesus ey ebadeg i pamatira, kowan to so nonta emansekit ey, “Pan‐imdeng ka kajem ko. Ta sota basol mo, epakaẃanan.”

3 Sota eshom so nonta ira mamaistoro ni dinteg ni Hodiyos, ja ẃara nodtan, kowan shed nemnem sha ey, “Sajay ya too, toka pa‐so‐i si Apo Shiyos!”

4 Nem si Jesus, amta toy ẃared nemnem sha et kowan to son si‐kara ey, “Apay nga ngaaw i joka nemnemnema? 5 Say kowan jo, inba‐ngat kon memekawan ni emin na basol niyay ya too, ey ekak kabaalan? Nem iyay i dag‐en kon pati‐an jo so. Ikowan ko niyay ya too ey man‐ekad, 6 jet no man‐ekad, amta‐en jo ey si‐kak sota kowan nonta para padto nonta bayag da ey Anak ni Too. Amta‐en jo pay ey ẃaray kalintegan kod ja dabaw ni shaga ja memekawan ni basol ni too.” Jet si Jesus inkowan to nonta toon eg man‐ekad ey, “Alam ita amakam, jet akad ka.”

7 Sota too, bimangon et imakad shi baley to. 8 Idi inon‐an ira nonta totoo sotan na edaga, naykel‐eẃan ira, nem inshayaw shes Apo Shiyos, tep ineẃatan sha ey panakabalin nen Apo Shiyos gayam sotan na inon‐an shen edaga ja inpiyal nen Apo Shiyos so ni kait shen too.

9 Idi naksheng iyay, si Jesus, eman‐ekad say on‐etan nodtan na dogad, jet inon‐an to sota toon manngeshan ni Mateo ja para singil ni bowis ja eman‐obded opisina to. Jet kowan nen Jesus son si‐kato ey, “Kala, kay‐olop ka son si‐kak, et manbedin ka ni took.”

Jet si Mateo, dimayat et imonod son si‐kato, ja nanbalin ni too to.

10 Jet nontan, engan si Jesus tan sota too to shi baley nen Mateo, jet dinikoban ira nonta kait nen Mateo ja para singil ni bowis, tan sota eshom ma kowan ni Hodiyos ey enshiy kenshat shen too. 11 Jet sota ira eshom ma Parisiyo, inon‐an sha iyay et kowan sha so nonta too nen Jesus ey, “Apay nga sama maistoro jo ket emekipengan so ira nima para singil ni bowis tan sama eshom ma toon enshiy kenshat sha, ja eshakel i basol sha?”

12-13 Nem idi intenengan nen Jesus iyay ja kowan sha, simongbat son si‐kara ja kowan to ey, “Ekak ali dimaw ja mengeẃis ni toon maronong, nem dimawak ali ja mengeẃis ira nonta toon eshakel i basol sha. Mebedin na may‐eshigak shi doktor. Eg bisita‐en ni doktor i enshiy sakit to, no diket sota ẃaray sakit to. Daw kayo et ashal jo no ngantoy olog niya esel nen Apo Shiyos ja naysolat nonta bayag da ja kowan to ey, ‘Ekak kostoy animal la maydeton son si‐kak, nem eg say piyan ko, kaasi‐an joy eshom ma too.’ ”

14 Nontan met laeng, dimaw ali son Jesus sota too nen Juan na para bonjag, jet kowan sha ey, “Si‐kami tan sama ira Parisiyo ket kanayon na mika ibiyang i pangan mi no manngidin kami, nem apay nga sama toom ket eg sha ibiyang i pangan sha?”

15 Jet si Jesus, say songbat to son si‐kara, in‐arig toy bakdang to shi dakin engaseẃa. Isonga kowan to ey, “Piyan jon ikowan ey sota ira bisita shi kasal, eg ira mengan angken ẃara sota dakin engaseẃa? Enshi, kenshat ta mengan ira. Nem ẃara et mangoy timpon onmotok ali ja ma‐enshi son si‐kara sota dakin engaseẃa, jet si‐katoy timpon ibiyang sha so ni pangan sha maypangkep ni daringit sha.”

16 Jet si Jesus inkowan to mowan i sakey ya arig son si‐kara ja kowan to ey, “Na‐alas no maysekab i badon abel shi shaan na baro. No maysekab sota bado, jey onkesen, a‐naten to sota nayshaitan ton shaan; nakol ni mema‐ma sota epi‐kat.”

17 Tan ẃara pay i sakey ya inkowan ton arig, ja kowan to ey, “Na‐alas no may‐iyan i badon adak shi na‐osal la inemag shen katat ja ijanan ni adak, ja kowan sha ey ‘wineskin’. No sotan i pesing jo, onpetjag sota nay‐iyanan to et onkawas sota adak. Tan angken pay sota nay‐iyanan to, mepilshi. Mesepol la no badon adak, bado ngoy kay‐inan to, say eg onkawas iyay ya showa.”

18 Idi maramen eman‐a‐sel pay laeng si Jesus, ẃara ngoy mimotok alin too ja pangolo ni Hodiyos. Nantalimokod shi sango‐an nen Jesus ja kowan to ey, “No mebedin, kay‐olop ka son si‐kak shi baley ko, ta sota anak kon bii ket ena‐bosan nonta ekay. Isonga pangaasim, mo isakpal i takday mo son si‐kato. No sajay i dag‐en mo, manbiyag mowan.”

19 Si Jesus, dima‐jat ja ekidaw, jet angken sota too nen Jesus, nay‐olop ngo ira.

20 Eshakel i toon imonod son Jesus et ẃara ngoy sakey ya biin naydaok ja nanshala ni sampolo tan showen tawen. Ekisikil la imonod son Jesus et pinishat toy kajaran ni baro nen Jesus. 21 Tep sota bii, kowan tod nemnem to ey, “No pishaten kos Jesus, angken sama baro to bengat, onmaptengak ma.”

22 Jet si Jesus, nanposipos et idi inon‐an to sota bii, kowan to ey, “Anak ko, say minaptengan mo, sota pamatim son si‐kak.” Jet nontan sota bii, nay‐inshas ja mimapteng.

23 Idi mimotok si Jesus nodta baley nonta pangolo ja nay‐olopan to, ẃara ira sota para mosiko ni etey, tan eshakel pay iray toon kaonnanangis ni makedsang. 24 Jet si Jesus, kowan to son si‐kara ey, “Ki‐nan kayod jay, eg etey itan na nga‐nga, na‐ogip bengat.” Nem sota ira totoo, inbi‐ẃisan sha si Jesus.

25 Nem idi kimi‐nan ira sota eshakel la too, simekep si Jesus et inegni‐an to sota takday nonta biin nga‐nga, jet nanbiyag mowan.

26 Sajay ya dingka nen Jesus, eshamag shiman na kedogadogad.

27 Idi eman‐ekad si Jesus ja edapo nodtan na dogad, ẃaray showen ekorab ja timened son si‐kato. Kimeljaw ira ja kowan sha ey, “Apo, kaasi‐i jokami! Waray namnama mi ey si‐kam i mengi‐odi nonta nantorayan da nen Ari David!” Kowan ira nonta ekorab.

28 Jet idi simekep si Jesus nodta baley, dimaw ira di sota ekorab son si‐kato. Jet kowan nen Jesus son si‐kara ey, “Jet kayoka memati ey mebedin na pan‐esas takejo?”

Simongbat ira ja kowan sha ey, “Owen apo, kamika memati.”

29 Jet si Jesus, pinishat toy matesha, ja kowan to ey, “Emati kayo et metongpal sota shawat jo.” 30 Jet nontan, nan‐asas ma ira. Jet binidin ira nen Jesus ja pasiya, ja kowan to ey, “Eg jo pa‐am‐amta iyay shi eshom.”

31 Nem sajay iren too, sha et inkokowan shi eshom sota dingka nen Jesus son si‐kara; nakol ni inamta‐an ni totoon emin nodtan na dogad i maypangkep so nen Jesus.

32 Idi dimaw da ira sota showen ekorab, ẃaray toon omel ja in‐ilaw ali ni kait to. Say kabol la eg pan‐a‐selan niyay, ẃaray dimonyo ja pimeket son si‐kato ni olay. 33 Idi inpabtik nen Jesus sotan na dimonyo nodtan na too, nan‐esel ma sota istay na‐omel.

Sota ira eshakel la toon engasas niyay ya edaga, nasshaw ira ja kowan sha ey, “Angken nonta bayag da ingkato niman, enshiy inges niyay ya edaga shiya ilin Israel.”

34 Nem sota ira Parisiyo, kowan sha ey, “Enshi kari! Sota apo ni dimonyo i toka osala ja mengipebtik so nonta ira dimonyo met laeng nga ẃared too.”

35 Jet si Jesus, pinasiyal ton emin sota siyodad tan eshom ma kawad‐an ni totoo. Nantoro pay shima sa‐nopan ira nonta Hodiyos, tan inpaleẃag to sota mapteng nga shamag maypangkep ni pantoshayan nen Apo Shiyos. Inpamapteng to pay ira sota totoon ekalkalasiy sakit sha. 36 Idi inon‐an nen Jesus ira sota eshakel la too, naysemekan, ta say inpangidmang to son si‐kara, singa na‐na‐josan ira ja enshi malay namnama shen pansigshan. Singa sota kalniron ebaybay‐an i kasesaad sha, ja enshiy emengajowan son si‐kara.

37 Isonga si Jesus, kowan to so nonta ira too to ey, “Eshakel iray toon may‐eshig ey ma‐epit nem kolang iray man‐obda. 38 Si Apo Shiyos i mengibetkag ni toon mengepit, isonga si‐kato ngoy pengshawan jo say mengibetkag ali ni on‐atang.”