1 Nem idi agsapen pasiya ni Domingko, si Maria Magdalena tan sota sakey ya Maria, dimaw ira ja sha on‐an sota naydiyangan nen Jesus. 2 Jet nontan, ebigla ja ẃaray makedsang nga jegjeg, ta ẃaray anghil nen Apo Shiyos ja dimespag alid dangit, jet to pinodig sota baton naytangeb nodta diyang, jet si‐katoy tinongawan to. 3 Say itsora ni dopa nonta anghil, singa bagidat, tan say baro to, empotin pasiya. 4 Isonga sota solsharon emanbantay, ireka manbebayedbed ni takot sha et singa etey ira. 5 Nem sota anghil, kowan to so nonta bibii ey, “Karekayo ontakot; amtak ey say piyan jon on‐an, si Jesus ja naydansa shi koros. 6 Nem enshid jay, nan‐ongal da! Nemnem jo kari: inkowan to met nontan da. Kalejo, jo asas sota istay inparokolan sha so. 7 Jet no asen jon enshi, daw kayon shagos, jet jo ikowan so nonta ira too to ey nanbiyag mowan da, jet niman, ondaw den mepangdo ey si‐kayo shi Galilia, jet shiman i asanan jo so! Karejo dibdibkan iyay ya inkowan ko son si‐kayo.” Kowan nonta anghil so nonta bibii.

8 Jet nontan met laeng, indekjas ira nonta bibiin shagos sota diyang, jet nanbetik iren sha ikowan so nonta ira too nen Jesus. Ireka mankel‐ew, nem ebadeg ngoy imdeng sha nonta ireka mandaw. 9 Idi nonta ẃara ired shalan, ebiglen nay‐aspol si Jesus son si‐kara jet kowan to ey, “Siya, talna i meẃesha son si‐kayo!” Jet sota ira bibii, nanshomog ira ja inegshi‐an sha sota sedi to, jet nanshayaw ira son si‐kato. 10 Jet kowan nen Jesus son si‐kara ey, “Karekayo ontakot. Daw kayo, jo ikowan so nonta ira took ja naka ikarin a‐akik ey ondaw ired Galilia, jet ikowan jo ey shiman i asanan sha‐ak so.” Kowan nen Jesus.

11 Idi nontan na emandaw ira jay ya bibii, sota eshom ma solsharo ja istay emanbantay nonta diyang, dimaw ira ngo shima siyodad jet sha inkowan so nonta ira apo ni papashi sota emin na epasemak. 12 Jet esa‐nop ira sota apo ni papashi, tan sota ira eshom ma pangolo ni Hodiyos, jet nantatabtabal ira ni pesing sha. Jet nontan ma, ninemnem sha ey i‐aknan sha ira sota solsharon nanbantay nonta diyang ni ebadeg ga pilak, 13 asan shaka ira bilina, ja kowan sha ey, “Ikowan jo so ni totoo ey sota ira too nen Jesus, dimaw ira di nonta edabin nasjep kayo ni ogip, jet kinibot sha sota bakdang to. 14 Jet no bilang ey amta‐an nen gobinarol iyay, si‐kamiy mismon mekitbal son si‐kato; enshiy jo panshanagan.”

15 Jet sota ira solsharo, indara sota pilak jet pinatiren inkowan sotan na inbilin ni pangolo ni Hodiyos son si‐kara. Jet ingkato niman, sotan i kaikokowan ni eshom ma Hodiyos maypangkep ni inka‐enshi nen Jesus shima diyang.

16 Jet sota ira sampolo tan sakey ya apostol nen Jesus, dimaw ira nodta shontog shi Galilia ja inkowan nen Jesus son si‐kara ey daẃan sha. 17 Jet idi inon‐an sha si Jesus nodtan, nantalimokod iren emin ja nanshayaw son si‐kato, nem sota eshom, ẃaray showashowa sha. 18 Jet si Jesus, imesop son si‐kara, jet kowan to ey, “Say inkowan nen Apo Shiyos, si‐kak i mengitoshay ni emin na ẃared dangit tan shiya dobong. 19 Isonga ikowan ko son si‐kayo ey daw kayo shi emin na ili shiya dobong, jet itoshoyo i maypangkep son si‐kak say memati ira. Bonjagi jo ira shi ngaran nen Apo Shiyos ja Amak, shi ngaran ko ja Anak to, tan shi ngaran ni Ispirito Santo. 20 Jet itod‐iyo pay ira say emin sota inbilin ko son si‐kayo, si‐kato ngoy pati‐en sha. Jet nemnemnem jo ey ẃara‐ak ni olay son si‐kayo, ingkatod pantepos niya dobong.” Kowan nen Jesus.