1 Idi nonta emankeẃa‐ẃa ma, sota ira apo ni papashi, mamaistoro ni dinteg, tan sota ira eshom ma toray ni Hodiyos, nantatabal ira et say inpasing sha, binedod sha si Jesus et inpaidaw sha so nen Gobinarol Pilato.

2 Jet si Pilato, inbag‐an tos Jesus, ja kowan to ey, “Jet agpayso ja si‐kam sota ari ni Hodiyos?”

Simongbat si Jesus ja kowan to ey, “Sota inkowan mo, si‐kato.”

3 Jet sota ira apo ni papashi, eshakel i inkowan sha so nonta gobinarol ja kowan sha ey basol nen Jesus, 4 jet si Pilato, inbag‐an to mowan si Jesus, ja kowan to ey, “Enshiy isongbat mon dason mo? Apay, eg mo aya itenengan ima kowan sha ey eshakel la basol mo?”

5 Nem nasshaaw si Pilato, tep enshi pay i insongbat nen Jesus.

6-10 Indasin nen Gobinarol Pilato ey apal ira nonta apo ni papashi son Jesus i in‐awatan sha son si‐kato, isonga piyan ton ibolos si Jesus. No timpo ni piyasta ni Paskowa, ẃaray sakey ya piriso ja kaibolos ni olay nen Pilato ja piyan ira nonta totoon ibolos to. Isonga idi dimaw aliy eshakel la too ja en nangshaw son si‐kato ey ibolos to nontan i sakey ya piriso son si‐kara, kowan nen Pilato son si‐kara ey, “Piyan jon ibolos ko son si‐kayo sota ari jon Hodiyos?”

Nem naytompong nontan ja ẃaray sakey ya pirison nanngaran ni Barabas ja sakey so nonta eshakel la girilya ja naybalod kabol ni inpamonora ni inpamakal sha so ni gobirno. Isonga idi inbaga nen Pilato no piyan nonta totoo ja si Jesus i ibolos to, 11 sota ira apo ngo ni papashi, intod‐an sha sota eshakel la too ey say ikowan sha so nen Pilato ja ibolos to, saja si Barabas.

12 Jet si Pilato, kowan to son si‐kara ey, “Jet no sotan i kowan jo, ngaran to ma i dag‐en ko so niya kowan jo ey ari jon Hodiyos?”

13 Jet sota ira totoo, kimiyaw ira, ja kowan sha ey, “Paidansam shi koros!”

14 Kowan mowan nen Pilato son si‐kara ey, “Ngantoy? Ngaran ni dingka ton ngaaw aya?”

Nem ema‐ma et i keljaw sha ja kowan sha ey, “Paidansam shi koros!”

15 Jet nontan ma, si Pilato, tep piyan ton mepnek sota eshakel la too, inbolos to ma si Barabas son si‐kara. Nem si Jesus, inpasepdat to nin asan toka i‐ẃat so nonta ira solsharo, ja sha idansa ma shi koros.

16 Sota ngo ira solsharo, indaw shes Jesus shima mismon baley nonta gobinarol, jet inolnong shen emin sota kait shen solsharo. 17 Sina‐datan shay baro to ni singa baro ni ari ni Roma, ja say kolor to, sota kowan sha ey violet. Tan say inpasing sha pay ni dedamsis sha, in‐inges sha ni ari. Isonga engosikos ira ni ẃakal la nasbitan ja inpaidnget sha son si‐kato, ja singa korona to. 18 Jet singa konon shaka panrispito‐a, ja kowan sha ey, “Onpalapalad ka koma, ari ni Hodiyos!” 19 Pineg‐as shay toktok to et tinopsha‐an sha, asan ma ira mantalimokod shi sango‐an to ni sinan pateg sha son si‐kato. 20 Jet idi naksheng sota inpasing shen dedamsis, dinosora sota istay inpaibaro sha, jet in‐oli sha met laeng sota sigod ja baro to. Jet inbo‐day sha ma ja sha idansa shi koros.

21 Nonta ireka man‐ekad, ẃara ngoy toon inaspol sha ja ondabas koma, ja si Simon i ngaran to, ja i‐Sirini. Istay ondaw koma shi siyodad, nem inpasakbat sha et son si‐kato sota koros ja kaydansa‐an nen Jesus. (Saja si Simon, ama nen Alejandro tan si Ropo.)

22 Jet indaw nonta solsharo si Jesus shima dogad ja kowan sha ey Golgota. (Jet say olog niya Golgota shi esel sha, toktok.) 23 Idi mimotok ired man, in‐aknan shes Jesus ni adak ja edaokan ni agas ja eg to so dekna‐an ni ensakit. Nem eg to ineẃat. 24 Jet indansara ma shi koros. Jet idi naksheng nga indansara, nanbobonot sota ira solsharo no sipay ontompong so nonta ira baro nen Jesus, asan shaka panbibingayi.

25 Say oras ni inkoros sha so nen Jesus, alas nowibi ni agsapa. 26 Jet ẃaray naysolat ja engikowan ni kabol ni naydansa‐an tod koros, ja kowan to ey, “Sajay sota ari ni Hodiyos.”

27 Jet ẃaray showen tolisan ja inpakibitay sha son si‐kato shi sanseskey ya koros. Sota sakey, ẃara nodta petek ni kanawan nen Jesus, tan sota sakey, ẃara nodta petek ngo ni kanigid to. 28 (Sajay i nantongpalan nonta naypadto nonta bayag da, ja kowan to ey, “Maybidang ey sakey ya bimasol.”)

29 Sotan ngo ira toon emandebas ja man‐ekad nodtan, ngini‐ngi‐ngi‐an sha, tan inbi‐bi‐ẃisan sha pay, ja kowan sha ey, “Towa! Kowan mo ey sheshalen moy Timplo jet bengonen mo mowan ni tedon akew! 30 Apay nga eg mo isalakan i bakdang mo shorog, ja ondespag alid ta koros mo?”

31 Jet angken sota ira apo ni papashi ni Hodiyos, tan sota ira mamaistoro ni dinteg, ekingi‐ngi ngo ira, ja kowan sha ni tabtabal sha ey, “Insalakan to konoy eshom, nem eg to met isalakan i bakdang to shorog! 32 Kowan to ey si‐kato kono sota naypadton ibetkag ali nen Apo Shiyos ja mengisedakan, kowan to ey si‐kato kono sota ari ni Israel. Tiga, asen tayo noman no kaba‐dan ton ondespag alid ma koros to, say memati kito son si‐kato!”

Jet sota kait ton showa ja inpakibitay sha son si‐kato, nan‐esel ngo ira ni ngaaw so nen Jesus.

33 Idi nonta alas dosi ni ka‐akawan, nanbolinget nodtan na dogad ingkato nonta alas tris ni mama‐shem. 34 Jet idi nonta alas tris ni mama‐shem, si Jesus, kimeljaw ni makedsang, ja kowan to ey, “Iloy, Iloy, lama sabaktani!” (Say olog niya kowan to, “Shiyos ko, Shiyos ko, ngantoy in‐owayan mowak so?”)

35 Nem sota eshom ma toon ẃara nodtan, idi intenengan sha sota kowan nen Jesus, kowan sha ey, “Itnengiyo! Toka emo panta‐ẃala ali si Elias shi dangit!” 36 Jet sota sakey so nonta ira toon ẃara nodtan, kinano‐an ton en engi‐neng nonta singa bonot ja masbet ni shanom nodta empait ta tapey asan toka ipi‐ket shi pating. Jet in‐awat tod sobil nen Jesus, jet kowan to ey, “Ma‐sas ka no ondaw ali si Elias ja en mengpas son si‐kato alid ma koros!”

37 Jet si Jesus, inkedsang toy keljaw to mowan, asan ma ma‐bosi.

38 Jet nontan ma, sota masshel la kortina ja naysa‐din nodta kapatkan na kowadto shima naydaem ni Timplo, epi‐kat ta nanshowa, manipod nodta naytapew ingkatod ma despag.

39 Jet sota kapitan ni solsharo ja ẃara nodta naymamang ni kad‐an nen Jesus, idi inon‐an toy itsora ni inkatey nen Jesus, kowan to ey, “Agpayso gayam ey sajay ya too ket anak ni Shiyos!”

40 Wara ngo iray bibii nodta naybabetaw ja engikadmang niyay ya epasemak. Jet say ngaran ira nonta eshom ma bibii ja ẃara nodtan, sajay: si Maria Magdalena, si Salome, tan si Maria ja ina ira nonta si Jose tan si Santiago ja inbeshayan shen Orishiyan. 41 Sajay iren bibii, nay‐olop ira son Jesus nonta ẃara pay laeng shi Galilia jet tinodongan sha alid man. Tan ẃara pay nodtan i eshakel la kait shen bibii ja ekidaw son Jesus manipod Galilia ingkatod Jerusalem.

42 Say akew wa edaga‐an niyay ya emin, sota kowan sha ey akew wa Pansekana ni para sota akew wa ngilin, jet no medebi, si‐katoy ibilang sha ey panshoki ma nonta akew ni ngilin. 43 Isonga ẃaray manngeshan ni Jose, ja toon edapo nodta ili ni Jodia ja kowan sha ey Arimatia, intoled ton dimaw so nen Pilato ja to kinshaw i bakdang nen Jesus. (Sajay ya si Jose, sakey so nonta ira toray ni Hodiyos. Jet si‐kato, kaishayaw noman ni totoo. Tan sakey pay, si‐katoy sakey ya emansessesked ni isabi ali ni pantoshayan nen Apo Shiyos.)

44 Idi dimaw si Jose ja to kekshawen sota bakdang nen Jesus, nasshaaw si Pilato ni in‐amta to so ey etey si Jesus. Isonga to inpa‐odop sota apo ni solsharo et inbag‐an to no agpayson etey si Jesus. 45 Idi kowan nonta apo ni solsharo son Pilato ey etey nga agpayso, inpalobos tos Jose ja en mengeda nonta bakdang nen Jesus. 46 Enongkal si Jose ni dopot ja para dibot ni etey, jet impas to alid ma koros i bakdang nen Jesus jet dinibotan to nonta empotin dopot ja tinongkal to, jet in‐ilaw to nodta baton diniyangan sha jet shiman i indiyangan to so. Jet inodin to sota ebadeg ga baton tangeb nonta diyang jet inpokit to nodta sakepan. 47 Jet si Maria Magdalena, tan sota sakey ya si Maria ja ina nen Jose, inon‐an sha iyay ya naydiyangan nen Jesus.