1 Jet ẃaray inon‐an kon Animal ja kima‐jat ali shima baybay. Waray sampolon sakdod to, tan pitoy toktok to, jet ẃaray korona nodta sanseskey ja sakdod to. Jet nodta ira toktok to, ẃaray naysolat ja dastog ton toka pa‐so‐i si Apo Shiyos. 2 Sotan na inon‐an kon katetakot ja Animal, singa inges to sota kowan sha ey tigri, nem sota sedi to et mango, singa sedi nonta kowan sha ey oso, jet sota bongot to singa bongot ni lion. Jet sota bowaja, in‐aknan to sotan ni panakabalin ton mantoshay jet kowan to pay ey sota piyan nonta Animal la dag‐en, si‐kato. 3 Sota sakey ya toktok to, singa esogatan; istay ipatey to koma, nem epiged. Isonga emin na tood ja dobong, ireka messhaaw, jet sotan i inonod sha. 4 Jet sota ira totood ma dobong, sota bowaja i nanshayawan sha, ta inpalobos to sota pantoshay nonta Animal. Sota ira totoo, nanshayaw pay ira so nonta na Animal, ja kowan sha ey, “Enshiy on‐inges so niyay ya Animal, tan enshiy makabaal ja on‐abak so!”

5 Sotan na Animal, naypalobos ja on‐esel et epaladon toka pa‐so‐i si Apo Shiyos, jet naypalobos pay ja angken ngantoy dag‐en to ni tedon tawen tan enem ma bolan. 6 Jet say itsora ni toka pema‐so son Apo Shiyos, kowan to ey enshiy kenkenshat kono nen Apo Shiyos, pati sama kad‐an tod dangit, tan angken pay sota ira ẃared man. 7 Naypalobos pay ja kobaten to ira sota emati son Jesus ingkatod mengebak. Jet naypalobos pay ya si‐katoy mengitoshay so ira nonta emin na kalasin too, ja nan‐i‐inapil i esel sha, ja ẃared ka‐ili‐ili shi intiron dobong. 8 Jet emin na tood ja dobong, sotan i shedjawen sha, nem say eg manshedjaw so nontan, sota ira naysolat i ngaran sha shima dibshon dista‐an ni toon nay‐aknan ni biyag ja enshiy to engintegan. Sajay ya dibsho, ẃara so nonta Kalniron naykoros nontan da jet sota toon naydista nodtan, sigorado ngoreshan i kaysedakan sha, angken nonta eg pay laeng epalsowa i dobong.

9 Iyay i ikowan kon epateg; isonga singpet jon itenengan. 10 Sota toon kenshat ta maybedod, maybedod ngoreshan; isonga angken eg kayo onsopngil. Nem sota toon memono ni kait to ni kampilan, maybedes ngon mebono ni kampilan. Isonga mesepol la si‐katejon too nen Apo Shiyos, man‐enos kito, tan mesepol la pekedsang tayoy pamati tayo.

11 Jet ẃara pay i inon‐an ko ja Animal la bimo‐day ali nodta bo‐day, jet ẃaray showen sakdod to ja singa kalniro. Say itsora to no on‐esel, inges toy bowaja. 12 Jet emin na toka dagdag‐a, inges to met laeng sota panakabalin nonta pilmiron Animal ja bimo‐day alid baybay, nem eg to pa‐so‐an sota pilmiron Animal. Say inpasing to, pinidit ton emin iray tood dobong nga manshedjaw ira so nonta pilmiron Animal. Sajay sota Animal la epiged ma sota sogat shi toktok to, ja singa ipatey to nontan da. 13 Saja maykadẃen Animal, eshakel i dingdingka ton kaskasshaaw wa milagro et say sakey ya inpa‐sas ton milagro, inpan‐oran to alid naykayang ni apoy, jet inon‐an ni totoo. 14 Jet sota totood dobong, na‐adilaw ira nontan na milagron naypalobos ja dag‐en to para so nonta pilmiron Animal. Jet sotan na Animal, inkowan to so nodta ira totoo ey mengemag ira ni sinan bakdang nonta pilmiron Animal ja pinesjang ni kampilan i toktok to nem eg etey. 15 Jet sotan na Animal, naypalobos ja i‐aknan to ni biyag sota dingka ni too ja sinan bakdang nonta pilmiron Animal. Jet mebedin ma ja on‐esel, et inkowan to ey sota ira eg manshedjaw son si‐kato, mebono ira. 16 Inkowan to pay ey angken sipen too — nankebaba ono toray, bebaknang ono nankebiteg, aliẃen baga‐en ono baga‐en‐memalka‐an i kanawan na takday sha, ono temok sha. 17 Jet inkowan to ey angken sipa, eg makatongkal ono eg makadako, no enshiy malka to. Say naymalka, sota ngaran nonta pilmiron Animal, nem domiro i inosal ton ka‐amta‐an ni ngaran to. 18 Sajay ya domiron enem ma dasos tan enem ma polo tan enem, ja naymalka, emengirinjas ni ngaran ni sakey ya too, jet olay toy matekal la on‐awat so ni olog niyay.