1 Idi nontan, ẃaray intenengan kon makedsang nga esel ja edapo nodta Timplo ja kowan to so nonta piton anghil ey, “Daw kayo, jet jo iro‐jag shima dobong sota nay‐iyan nodta piton malokong, ja si‐kato sota penosa nen Apo Shiyos.”

2 Jet sota pilmiron anghil, dimaw ja to insho‐jag sota nay‐iyan nodta malokong to shi dobong jet say edaga nontan shi dobong, ebaybayang nga pasiya i bakdang nonta totoon minalka‐an nonta Animal tan nanshayaw so nonta kabakbakdang nontan na Animal ja inemag ni too.

3 Jet sota ngo maykadẃen anghil, insho‐jag to sota nay‐iyan nodta malokong to nodta baybay jet nanbalin sota shanom ni singa shala ni etey ya too. Jet angken nganton emanbibiyag nodta baybay, etey iren emin.

4 Insho‐jag nonta maykatdo ngon anghil sota nay‐iyan nodta malokong to shima ira pa‐dok, tan shima ira eshom ma kedepo‐i ni shanom, jet nanbalin sota shanom ni shala. 5 Jet intenengan ko sota anghil ja apo ni shanom ja kowan to ey, “Si‐kam ma koston Shiyos ja ẃaren sigod ingkato niman, kosto iyay, ta in‐anam moy dingkam ja moka penosa! 6 Ta sotan iren totoo, binonora sota emati son si‐kam, angken pay sota ira para padton inbetkag mo. Imayos i shalesha ni inkabonora; isonga in‐aknan mo ngo sota ira totoon bimono son si‐kara ni shala ja inomen sha! Anam ton sajay ngoy medeka son si‐kara!” 7 Jet ẃaray intenengan kon esel ja edapod ma altar ja kowan to ey, “Owen Apo Shiyos ja Manakabalin, koston emin, podnon emin i moka penosa!”

8 Sota mayka‐pat ta anghil, insho‐jag to sota nay‐iyan nodta malokong to shima sekit, jet sota petang nonta sekit, nanbalin ni singa apoy ja toka pandenanga ira sota totoo shi dobong. 9 Jet sota ira totoo, na‐atongan ira nonta epaladon petang ni sekit, jet sota na‐atongan na totoo, shaka pan‐i‐abigi si Apo Shiyos tep si‐katoy ẃaray panakabalin ton emengi‐kan niyay ya digat sha. Nem eg ira pay nanbebawi, tan enshi pay i kowan sha ey ishayaw sha si Apo Shiyos.

10 Idi naksheng sota mayka‐pat, insho‐jag ngo nonta maykedimen anghil sota nay‐iyan nodta malokong to shima tinongawan nonta Animal, jet sota dogad ja intorayan to, bimolinget. Jet sota ira intorayan ton totoo nodtan, kinkindat sha shorog i shilesha, ta ensakit ta pasiyay deknara. 11 Jet shaka pan‐i‐abigi pay si Apo Shiyos ja ẃared dangit maypangkep nonta sakit sha, tan sota bayang sha, nem eg ira nanbebawi nonta aramid shen ngaaw.

12 Jet sota mayka‐nem ma anghil, insho‐jag to ngo sota malokong to shima ebadeg ga pa‐dok ja kowan sha ey Yopratis et sota shanom nodtan, ena‐ti, say mesekana sota panshandan ali ira nonta ari tan sota solsolsharo shen medepod bedalan. 13 Jet idi onshemangak, ẃaray inon‐an kon tedon ngaaw wa ispirito ja singa tingey ja emanbo‐day ali nodta bongot nonta bowaja tan nodta bongot nonta Animal, tan nodta bongot nonta maykadẃen Animal ja sinan para padto. 14 Say agpayso, sota emanbo‐day ali, dimonyo ira ja emandeka ni milagro et si‐karay ondaw shima a‐ashi shiya intiron dobong ja mengolnong son si‐kara ja mekigobat so nen Apo Shiyos ja Manakabalin, no onsabi sota akew ja ipa‐sas son Apo Shiyos ni panakabalin to. 15-16 Sa‐nopen sha ira shima dogad ja kowan shed esel ni Hodiyos ey Armagidon. (Jet say banshaan nen Cristo son si‐katejo, kowan to ey, “Ondawak den palibdibag ja inges toy kaimotok ni mengibot jet man‐imdeng sota esagana ni imotok ko, ja arig toy eg na‐ogip, ja nanbaro, ta eg mebebaingan no onbo‐day.”)

17 Sota maykepiton anghil, insho‐jag to sota nay‐iyan nodta malokong to shima shagem et ẃaray makedsang nga esel la edapod ma Timplo, tan shima tinongawan nen Apo Shiyos, ja kowan to ey, “Naksheng ma!” 18 Jet ẃaray makedsang nga bagidat, tan makedsang nga kirol, tan makedsang nga jegjeg. Epaladon makedsang sotan na jegjeg, ja enshiy toka kay‐ingesi. Angken nonta pilmiron epalsowa‐an ni tood dobong, ingkato niman, enshiy jegjeg ja inges nontan i kakedsang ton epasemak. 19 Sota kabalkan na siyodad, nantedon nabtak, jet sota ira siyodad shi emin na ilid dobong, epilshi mala. Jet si Apo Shiyos, ninemnem to sota siyodad ni Babilonia ja emayshedshedjaw ey katekalan et inpalaw toy bonget ton pasiya nodtan. 20 Jet emin na kamag‐an ja ẃared kawa ni baybay, na‐omas et angken sota ira shontog, na‐enshi la. 21 Jet nandanti ni kakembaleg, ja say bel‐at ni sanseskey, dimen polon kilo et bines‐igan sha ira sota totoo. Jet sota ira totoo, shaka pan‐i‐abigi si Apo Shiyos, ta epalado sotan na inpandanti to son si‐kara.