1 Idi naksheng den emin iyay, ẃaray inon‐an kon anghil ja edapo alid dangit ja dimespag, jet sajay ya anghil, ebadeg i panakabalin to. Emenenili et sinilẃan to sota intiron dobong. 2 Jet kimeljaw ni makedsang, ja kowan to ey, “Babilonia, ja ilin emayshedshedjaw ey katekalan, sharal to ma, epilshi ma! Nanbalin ma niman ni singa dogad ira nonta dimonyo, ta enshi may balebaley. Anam ton pan‐inan ira ni angken sipen makedsel la dimonyo, ono pan‐inan ira nonta titit ta emengan ni toon etey. 3 Say kabol la epilshi‐an to, emin na tood ja dobong, nayda‐kam ira so nonta edogit ta pasiya ja aramid to. Jet sota ira a‐ashi shiya dobong, singa biniira tep si‐katoy etod‐an sha ni edogit ta aramid. Jet sota ira emanbiyaki shiya dobong, inpabaknang to ira, ta ebosdon ja mengosal ni kompormi, jet angken piga, tongkalen to.”

4 Jet ẃara pay i intenengan kon esel ja edapod dangit ja kowan to ey, “Si‐kayon totook, ilekjas jo, ta baka et ey ma‐eẃis kayon mandeka nonta ngaaw wa aramid ja toka dagdag‐a. Ilekjas jo say eg kayo mayda‐kam nonta digat ja da‐kaman to ali. 5 Ta sota basol to, nansasekdet ja singa simabi alid ja dangit, jet sotan na aramid ton ngaaw, eg dibkan nen Apo Shiyos. 6 Sota dingka to son si‐kayo, ibedes jo, jet angken pandobliyo i pengikesho to nonta emin na aramid to. Tamtamen to ngo, ja angken mandoblin da‐kaman toy digat. 7 Epaladoy toka pengi‐tek shorog ni bakdang to, jet basta nganton piyan to, al‐en to. Isonga say pesing jo, i‐enam jo nodtan na aramid to i shosa to: i‐akniyo ni pandikatan to, ja pannengnengisan to, ta say ẃared nemnem to, kowan to ey si‐katoy toray ja ari, jet kowan to pay ey, ‘Apay ebalo‐ak? Enshiy nak pandeshingitan.’ 8 Sotan den dastog to, san‐akew ja onsabi son si‐katoy digat et sajay iray digat ja dak‐aman to: sakit, daringit, bitil, jet mepoolan pay ni apoy. Ta si Apo Shiyos ja onshosa son si‐kato, si‐katoy kakedsangan.

9 “Jet sota ira a‐ashi shi dobong ja emii son si‐kato, ja kinenkenas shay ẃara son si‐kato, onngogngog ira, ta asen shay asok to nem mankepooli. 10 Eg ira on‐esop tep en‐asimogal shen asen i toka panda‐kam ni digat. Jet kowan sha ey, ‘Ara! Kasipa day Babilonia ja kabalkan na siyodad ja katekalan! Sakey ya oras bengat ja simabi ali sota keshosa to!’

11 “Jet angken sota ira emanbiyaki shi dobong, onnangis ira ni ma‐kes sha, tep enshi may menongkal nonta dakon kalkara; kenshat ta onkawas ma. 12-13 Jet say kalkalasin dako sha, sajay: ẃaray baka, kalniro, kabajo, tan sota dokanan na kaikoyod ni kabajon para kobat; ẃaray balitok, palata, boronsi, danshok, manmanon kiyew ja emanseng‐ew, sota kiyew wa inemag shen para arti ni baley ja epalit; tan sota baton mapteng ja kowan sha ey marble; ẃara pay sota kalasin dopot, ja empotiy eshom, embalengay eshom, tan violet i eshom, tan sota sida; ẃara pay sota baton epalit ja osal ni bii, ja pirlas i eshom; ẃara pay iray adak, daneb, sota kalasin para daok ni sira, tan sota kalasin bangbangdo, sota kalasin arina ja medeka ni tinapay ja en‐amis; ẃara pay sota sangi ni ilipantin edaga ni para alkos; tan ẃara pay i toon idako sha ja para baga‐en.

14 “Jet sota ira emanbiyaki, kowan sha so nontan na siyodad ja epilshi ey, ‘Emin sota ka‐iri‐irin ja piningitan mo, enshi ma son si‐kam, jet sota kabaknang mo ono nam‐ay ya biyag mo, epokaw ma; jet eg on‐oli ma son si‐kam!’ 15 Jet sota ira emanbiyaki ja emengileko ni ka‐iri‐irin son si‐kato, ja si‐katoy inbaknang sha, eg ira on‐esop tep en‐asimogal sha ngon asen i toka panda‐kam ni digat. Jet onnangis iren makedsang ni ma‐kes sha, jet ikowan sha ey, 16 ‘Ara! Kasipa da ima kabalkan na siyodad, ja emengosal ni ekalkalasin dopot ta epalit, ja ema‐alkosi ni balitok tan sota eshom ma ekalkalasin ebanol la ma‐osal! 17 Sakey ya oras bengat i inkareshal nonta ebanol la ka‐iri‐irin ja ẃara nodtan!’

“Jet sota ira emin na pangolo nodta bapor, tan sota ira emengitoshong nonta bapor shi daẃan sha, tan angken pay sota ira eman‐obda nodtan, tan angken pay sota ira emanbiyaki ja nandogan, bimetaw ira et binojara. 18 Jet epaladoy nangis sha, ni in‐asas sha so nonta dowet ni siyodad ja emankepooli, jet kowan sha ey, ‘Ara! Kasipa da ima kabalkan na siyodad! Enshiy maka‐inges son si‐kato, manipod nontan da ingkato niman!’ 19 Jet shina‐peg shay toktok sha ni depok, jet nimangis iren makedsang, ni ma‐kes sha, ja kowan sha ey, ‘Ara! Kasipa da iman na siyodad ja kabalkan! Si‐katoy binaknangan iren emin nonta ẃaray bapor to, ta angken nganto, kabaalan ton tongkalen. Jet niman, sakey ya oras bengat i inkareshal to!’

20 “Nem si‐kayon tood dangit, pan‐imdeng kayo ni inkapool to! Si‐kayon too nen Apo Shiyos, pati si‐kayon apostol tan para padto nen Apo Shiyos, pan‐imdeng kayo ta sota inpaspasing to son si‐kayo, inbales nen Apo Shiyos ja shinosa to ngo!”

21 Jet sota sakey ya anghil ja makedsang, engala ni ebadeg ga bato, ja singa sota baton kidingan, jet inkespig to nodta baybay, ja kowan to ey, “Jet niman, sota siyodad ni Babilonia ja katekalan na siyodad, mesheshal ja singa maybes‐ig, ja inges to sota kidingan ja inbes‐ig kod ma baybay! Jet eg ma may‐odi mowan na siyodad ingkatod ingka. 22 Jet enshi may mandaladsak nodtan; enshi la sota ira emangitara, enshi la sota para mosiko, enshi la sota janget ni kolesing tan trompita. Jet sota ira emandeka ni angken nganto ja ẃara nodtan, ma‐enshi ma ira. Angken pay sota kiyas ni kidingan nodtan, ma‐enshi mala. 23 Jet sota kingki ja kaonniyal nodtan, ma‐shep ma et ma‐enshi mala sota noteng ni emandaladsak shima kad‐an ni nankasal. Sajay i mepesamak so nontan na siyodad, ta sota emanbiyaki ja edapod jay, si‐karay katekalan shi intiron dobong, jet emin na ilid ja dobong, inedinan sha ni ngaaw; inodaw ton emin i totoo ja si‐kato may inonod sha.”

24 Sota ira para padto ja inbetkag nen Apo Shiyos, tan sota ira eshom ma too nen Apo Shiyos, shiman i eteyan sha ja naybokbokan ni shalesha. Isonga shinosa nen Apo Shiyos sotan na siyodad, say ikaro to sota emin na nankebonon too shiya dobong!