Hay Nakakan
(Exodus)
Hay A'at Tuwen Liblu
Hituwen liblu ya hu''up nan nahhun an intudo' Moses an na'na'at i Jacob ya nadan imbabalena. Ya hay ipa'innilan tuwen liblu ya hay nakakan nadan tinanud Israel hi ad Egypt an numbalinandah himbut ta umedah ad Kanaan an hidiye nan alyon Apu Dios hi idatnan dida an eda pumboblayan. Ta nakakdahdi ot ipluydah nan billid hi ad Sinai ta hidiy nangidatan Apu Dios i Moses hinan Himpulun Tugun ya nadan udum an pohdonan un'unudonda an tinanud Israel an mibilang hi tataguna. Ya niddum bo ituwen libluy nangiphodandah nan tabernakel an pi'dammuwanda i Apu Dios ya nan atondan mundayaw.
Hay Nitudo' Ituwen Liblu
1. Hay napalpaligatan nadan tinanud Israel hi ad Egypt (Hay Nakakan 1–18)
2. Hay awadan nadan tinanud Israel hi ad Sinai (Hay Nakakan 19–24)
3. Hay indat nadan tatagu hi ma'usal hinan tabernakel (Hay Nakakan 25–40)
1
Hay Napalpaligatan Nadan Tinanud Israel Hi Ad Egypt
1 Hi Jacob an nginadanan Apu Dios hi Israel ya immedah nadan linala'in imbabalena hi ad Egypt. Ya hay ngadan nadan imbabalena 2 ya hi Ruben ya hi Simeon ya hi Libay ya hi Judah 3 ya hi Issakar ya hi Sebulun ya hi Benjamin 4 ya hi Dan ya hi Naptali ya hi Gad ya hi Aser. 5 Ta hay bilangdan namin an tinanud Israel i diyen immayandah ad Egypt ya napitu (70). Mu hi Joseph e ya namangulu mo tuwalih ad Egypt.
6 Ya hidin immey atnay tawon ya nateh Joseph ya nadan i'ibana ya an namin nadan papaddungda i didan tinanud. 7 Mu nadan tinanudanda ya nun'a'ahlagda ta dimmakkodakkolda ta niwakatdah ad Egypt.1:7 Nan Na'na'at 7:17
8 Indani ya nihukkat han patul hi ad Egypt an aggena innilay a'at handin hi Joseph.1:8 Nan Na'na'at 7:18,19 9 Ya alyonah nadan tatagunay, Inoy an dimmakkodakkol nadan tinanud Israel hitun boble ta'u ta dida bo udot moy dakdakkol mu dita'u. 10 Ot mahapul an waha aton ta'u i dida ta way atondan adi ma'udman an ma'udman te onha udum hi algo ya waday gubat ot ma''id ha mapto' ya middumdah nadan mangubat i dita'u ya innayundan binumtik.
11 Ot pumbalinonda nadan tinanud Israel hi himbut ot pot'onda doha ta diday ap'apuda ta diday mummandal i dida an muntamu. Ta impiyammada nadan boble hi ad Pitom ya hi ad Rameses. Ta datuwen boble di pangi'amungan nan patul hinadan makan. 12 Mu ta'on on athidiy inatdan namalpaligat hinadan tinanud Israel ya namaman dimmakolda ta niwakatdah ad Egypt. Ta namamay pangiyaguh nadan i Egypt i dida. 13 Ot iyal'alada mo bon nangigalid i dida. 14 Ta nunhiglay nangatdan namalpaligat i dida an ma"id ha homo'da te adi ammuna nadan ipiyammadan pito' an hamintu an miyammah nadan balen di i Egypt te ta'on on nadan nat'onat'on an tamuh nadan puntanomanda.
15 Ya indani bo ya imbagan nan patul hinadan Hebrew*1:15 Nan Hebrew ya hidiyey pangalin nadan bokon Judyu hinadan tinanud Israel. an mundawat hi golang an da Siprah i Puah 16 an alyonay, Tigonyu ta lala'i'e nan dawatonyun iyayyam nadan ibbayun Hebrew on pinateyu. Mu babai'e ya aggeyu.
17 Mu aggeda inunud te hi Apu Dios di taktanda ta ma''id ha pinatedah nadan dinawatdan goggolang an ta'on on lala'i. 18 Ta impa'ayag mo bon nan patul dida ot mahmahanay gapunah aggeda nangunudan hinan imbaganan dida. 19 Ya alyonday, Te nadan Hebrew ya agaggay eda pun'ayyaman†1:19 Hay pangalin di udum hinan pun'ayyaman ya puntungawan. an adida umat hinan i Egypt te adi ami dumatong on nun'ayyamda.
20 Ta dimmakkodakkolda ta ongal di abalinanda. Ya dadiyen mundawat hi golang ya winagahan Apu Dios dida. 21 Ta indattana didah holagda an gapu nimpe ta hi Apu Dios di taktanda. 22 Ya lo'tat mahan ya imbagan nan patul hi an namin hinadan i Egypt an alyonay, An namin nadan goggolang an linala'i an imbabalen di tinanud Israel ya eyu pun'ibkah dida hinan wangwang an nungngadan hi Nayl1:22 Nan Na'na'at 7:19 mu ta'omman ya imbatiyu nadan binabai.