2 Hi'on waha humapit i he"a ya on waday anusmun mundongol? Te pohdo' ahan an humapit.

3 Ot alyonay, Nomnomnomom nadan dakol an intudduwam hi maphod ya nadan impa'amlongmu an kimmapuy di punnomnomda

4 ot atonda nadan intugunmun dida.

5 Mu ad uwanin he''ay munholholtap ya aggem innilay atom an mananggah ligatmu.

6 Ot ten na'unud'a i Apu Dios ya waday takutmun hiya ot unhaot nanongna nan pundinolmun hiya.

7 Ya onha ta nomnomnomom ot undan waha taguh maphod di pangatna ya munligligat ya madadag.

8 Hay tintinnigo' ya hanada'en mangmangngat hi adi maphod ya atbohdin adi maphod di ma'at i dida.

9 Te mabalin an gapuh bungot Apu Dios ya hingkitangan di panadagnan dida.

10 Ta umatdah nan layon an ta'on onda mun'alumiyom ya pumpungih Apu Dios di bobada.

11 Ta ma"id ha atondan mangan ta lo'tat ya mateda. Ya miwakatda mo nadan inlumda.

12 Ot inayun bon Elipas an alyon di, Wada han nipa'innilan ha"on mu ma"id ha udum hi nanginnila te ay hanan nikutyam i ha"on.

13 Te i han nahdom an na'allo'anday atagutagu ya nun'inopa' i han atatakut

14 ta pamaag ya munggagayonggonga' hi takut'u.

15 Indani ya nali'na' an nadibdiban di angah'u ya nabugita' hi takut'u.

16 Ya wada han ma'awa''awan mu ma"id ha mapto' hi'on nganneh diye.

Ya i diyey nangngola' i han mungkutkutyam an alyonay,

17 Ma"id ha taguh udu'dul di pangatna mu hi Apu Dios an nunlumun hiya.

18 Te hanada ni'mon anghelnan munhilbin hiya ot ma"id ha dinolnan dida ya wa'e ha numbahul i dida ya dusaona.

19 Ot namama mo ahan hi tagu an nalpuh pito' an umatdah kulkulappen nalakan puditon di tagu.

20 Ta athidiy ma'at hi tagu an mabalin an mataguh nan nawi"it mu aggena innilan mate i diyen mahdom.

21 Ta an namin di kinadangyana ya alan di udum an tatagu ya inggana i diyen natayana ya ma''id ha na'awatanah a'at Apu Dios.