Ya ho'dod han itaguwana mu dakol di punligatana

2 an umat hinan habhabung an manu te tumagu ya himmabung mu adi madne ya nakling.

Ya umat boh nan a"o an agaggaon nama''id.

3 Ot undan gahin bahan on toto'lona' ta wa'e ha nibahhawa' on dinusaa'.

4 Ya undan waha taguh ma"id ha ibahhawana?

5 Ya on tuwali giggintudmuy tawon onu bulan hi pi'taguwan di taguh tun luta.

Ta ma"id ha taguh abalinanan udman di tawon hi pi'taguwana.

6 Ot daan mo bahan ta taynam ni' ta mun'ible i ha na'omtang.

Ta umat hinan e ni'ibo'la an mun'ible hi'on nalpah di tamuna.

7 Udu'dul bo nan kayiw te ta'on on nalngoh ya namnamaon an humaping ya immongngal bo.

8 Ya ta'on on madunut nan tungodna mu hanan lamutna ya nanongnan wah ad dalom.

9 Ya uggan'e mahnong ya humaping.

Ya hanan ihapingna ya umat damdamah nan pi'ittanom.

10 Mu hay tagu ya wa'et nate ya hidiyey napogpogan di bikahna ya nitaguwana.

11 An umat hinan liting hinan wa"el onu hinan lobong an matdu' hinan ma"ugoh.

12 Ta athidiy tagu an nate'e mo ya adi mabalin hi bumangon bo an ta'on on mapogpog di ad lagud ya adi mabalin hi tumagu nan nate.

13 Te onha mabalin ya dawato' an eya' ni' ilubu' hinan lubu'an nadan numpun'ate ya impapto'a' hidi.

Ya gintudmu nan algo an iha"ada' hidi ta na'aan'e mohpey bungotmu ya ninomnoma' bahan i he"a.

14 Te undan nate'ey tagu ya undan mabalin ta tumagu bo?

Mu ta'on on athidi ya udu'dulnay anusa' hituwen holholtapo' ot lo'tat man attog ya napogpog.

15 Ot pinhodmu'en tigona' an limmum ya ayagana' ta tobalo' nadan ibagam.

16 Ya inhamadmu mohpen mangipapto' i ha"on ta bokon mo hanadan ibahhawa' di titiggom.

17 Ya linglingom mon namin nadan numbahula'.

18 Hanan billid ya ta'on on na'tagge ya magde ya umat boh nan ongal an batu an mapulig.

19 Ya ta'on on nadan batuh nan wangwang ya iyanud di liting ya atbohdih nan luta an mabulubulda hi'on imminolwang.

Ta athidi bon abalinam an ma"idon di dinolmi.

20 Ya abalinam an dadagon di nitaguwanmi ta binaliwam di a'atmi ya e da'mi inlubu' ta hidiyey pogpog di nitaguwanmi.

21 Ta ta'on on mundongol di imbabalemi ya ma"id amin mi'yam'amlong ya ta'on boh on mibabainda ya aggemi mo innila.

22 Ta ammuna nan holholtaponmi an li'li'naonmi ta umukayungan ami.