2 Daan mo ta duminong'a an humapihapit ta donglom pibo tun ibagami.

3 Undan hay panigom i da'mi ya ay ami animal an ma"id ha in'innilana?

4 Umman gapuh bungotmu ya hay adolmuy paligatom.

Ya undan gapu i he"a ya mahukkatan tun luta onu madlig nadan doplah hinan nipabunanda?

5 Nan adi maphod di pangatnan tagu ya umannung an adi madne ya mate an umat hinan hilaw an madop.

6 Ta munhihillong di nunhituwana.

7 Ta ta'on on nan nataldong di pundallana ya mihubag.

Te hanan numanomnom hi adi maphod hi atonah ibbana ya hiyay a'atana.

8 Ta paddungnay ena inha''ad ha tawang ot hiyay makna.

9 Ya hiya boy nahuluh nan inha"adnan hulu.

10 Ya atbohdin palpaliwana ya hiyay maknah nan lingon an inihodnah nan awon.

11 Ta pamaag ya nili'won hiyay dakol an umipatakut.

12 Manu te kadangyan ni' mu ad uwani ya ma'a'agangan.

Ya dakol di punligatana

13 an umat hinan doghona an mungngupuh hi up'upna ta pamaag ya alulugnin te mun'angpuh di hukina ya ta'lena.

14 Ta taynana nan balena ta miyeh nan awadan di ap'apun di ate.

15 Ya pinu'ulanda nan balena.

16 Ta hidiyen tagu ya mipaddung i ha kayiw an namaganan di adolnah ingganah lamutna.

17 Ta hidiyey apogpogan di nundongolana ta ta'on on hinan boblena ya adi uggan mabong'al di ngadana.

18 Te hi Apu Dios di mangipa'aan i hiyah tun luta ta ipa'enah nan munhihillong.

19 Ya ma"id ha hanatna te ma"id ha holagna.

20 Ta hanadan tataguh nangappit hi tuluwan di algo ya ta'on on hi nangappit hi alimuhan di algo ya manongngo'dah takutda hi pangngolanda i diyen ma'at i hiya.

21 Ot nan tagun adi maphod di pangatna an aggena innilah Apu Dios ya ma"id ha bahhonan athidiy ma'at i hiya.