1 Ot tobalon Sopar nan imbagan Job an alyonay,

2 Minomnomana' hinadan imbagabagam ta hiya nan adi mabalin hi dindinnongana'.

3 Ya nunhigla nayya nan pangpangallim.

Mu innila' di pambal'u i danaen imbagabagam.

4 Te undan nalinglingmu an nihipun hidin nalmuwan di taguh tun luta

5 ya hana'en adi maphod di pangatna ya hin'omtang han pun'am'amlonganan mi'tagu.

6 Ta ta'on on nabaktuy punnomnomnah adolna an ay wah ad lagud

7 mu lo'tat ya mama"id an ay lugit an mabulu'.

Ta hanadan nangin'innilan hiya ya alyonday,

Dana mahan anuy immayana?

8 Ya umatboh nan ininop onu nan mipatigo hi'on kinimit an malingling.

9 Ta hanadan nangin'innila i hiya ya ta'on on hanadan pamilyana ya ma''id mo ha ugganda tigon i hiya hinan nunhituwana.

10 Ya hanadan imbabalena moy mangikaluh nadan kinulukuluknah nadan nun'awotwot.

11 Ta ta'on on mabikah ni' mu mate ta mumbalin hi pito'.

12 Te pun'amlonganan mangat hinadan adi maphod an adina pohdon an idinong.

13 Ta paddungnay mangan hi mahongon makan

14 mu mumbalin hi kodot hi putuna.

15 Ta gahin di i'utanan namin nadan ina'inana an i'aligan nadan inakona te adi pohdon Apu Dios an minaynayun i hiya dadiye.

16 Ta hanadan adi maphod an ina'inatna ya paddungnay ininumnay gitan di ulog ta hidiyey mamaten hiya.

17 Ta adina mo tigon nan mahawwalan an mantekan di olibo ya danum di iyukan ya gatas.

18 Ta ma"id ha hilbin nadan nablayana ya ingkumilhuwana.

19 Te kinulukulukna nadan nun'awotwot.

Ya numpulohnay babale an inyamman di udum an tatagu.

20 Te nan na'agum an tagu ya pinhodnan bagiyon an namin an ma"id ha alyonah on ammuna mo.

21 Mu lo'tat ya ma"id ha mabati i hiya hi anona te mama"id nan kinadangyana.

22 Ta ta'on on alyon hi wadan namin i hiya mu indani ya pamaag ya nunhiglay ligatna an manadag i hiya.

23 Ta ta'on on alanan namin nadan pohdona mu gapuh nan nunhiglan bungot Apu Dios i hiya ya paddungnay pa'aliyonay dakol an pana ta mikna i hiya.

24 Ta ta'on ona ikiwwangan nadan nahimaan hi gumo' mu tuwe nadan nahimaan hi gombang ta dadiyey mamaten hiya.

25 Te humawwang hi bonogna nan pana an miknah altena ya nunhiglay ena tumakutan te mun'ayyuhan di dalana.

26 Ya an namin nadan kinadangyana ya mapu'ulan hinan ipa'alin Apu Dios an apuy.

Ya ta'on on nan pamilyana ya mapu'ulanda.

27 Onha mabalin ta tistiguwan di ad lagud ya tun luta ot hiya ya na'abahhulan.

28 Ta gapuh bungot Apu Dios ya paddungnay ipa'alinay udan ta dumakol di liting ya inyanudnay balena.

29 Ta athinay aton Apu Dios hinadan mangmangngat hi adi maphod.