1 Alyon bon Job di, Hay imbaga' hi adol'u ya hanat adi' omnawan nadan mumpangilog an binabai. 2 Mu nganne nin di idat Apu Dios hi gun'udo' an mangat hi athitu? Ma''id ha innila' hi maphod hi idat nan ongal di abalinanan Dios i ha"on. 3 Mu hay idatnah nadan adi maphod di pangatda ya punligatan ya adadagan. 4 Ya hi Apu Dios ya innilanan namin di at'atto'. 5 Ot innilanan ma"id ha kinuluk'u onu inlayaha'. 6 Ot hi Apu Dios di ukod an mangiyuhuh hi'on numbahula' onu aggeya'. 7 Ot hi'on waday imbahho' hinadan tuguna onu waday inat'uh adi maphod 8 ya ta'on attog hi madadaga' onu alan di udum an tatagu nadan intanom'u.

9 Ya hi'on waday inomnawa' hi babain ahawan di udum ot numanomnoma' hi ato' an mangilo' i hiya 10 ya ta'on attog hi ahawaon di udum an lala'i nan ahawa' ta hiya moy punhilbiyana. 11 Te nan pangomnawan hi bokon ahawa ya ababain an pumbahulan ya lebbengnan madusa nan mangat hi athidi. 12 Te nan e pangilo'an hi bokon ahawa ya nipaddung i ha apuy an dadagonay nitaguwan ya an namin an wadan dita.

13 Ya wa'e bo ha ibagan nadan baal'u hi nibahhon inat'un dida ya donglo' ta ipanuh'u 14 te onha adi' aton ot nganney pambal'u i Apu Dios hi'on mahmahanan ha"on. 15 Yaden innila' an hi Apu Dios di nunlumun ha''on ya ta'on on hanadan baal'u. 16 Ya binanoddanga' nadan nun'awotwot ya nadan nun'abalu an mumpahmo' i ha''on 17 ya indatta' nadan nun'apuhig hi anonda. 18 Te nihipun tuwalih din mangmangngiloga' ya impanapto"u nadan nun'apuhig an umat hi aton di ohan amah nadan imbabalena ya ta'on on nadan nun'abalu ya binanoddanga' nimpe dida. 19 Ya wa'e bo ha tinigo' hi ma"id ha lubungna on indatta' 20 didah nadan ma''uktul an lubung an niyammah nadan nalpuh nadan dutdut di kalnero ta hiya nan nunhiglay punhanaandan ha''on.

21 Ya ma"id ha innila' hi tinattatakut'uh nadan nun'apuhig an ta'on on innila' an ta'on hi ato' di athidi ya ita'doga' damdamah nadan ap'apu mu ma"id ha inat'uhdi. 22 Mu hi'on waday inat'uhdi ya ta'on attog hi maputung tudan pu'ol'u. 23 Mu hay immannung ya ma"id ha inat'u hi adi maphod hinadan nun'apuhig te nunhiglay takut'uh nan pundusan Apu Dios.

24 Ya agge' nundinolan di kinadangyan'uh mangibaliw i ha"on. 25 Manu te ongal di kinadangyan'u mu bokon dadiyey mangdat hi pun'amlonga'. 26 Ya agge' dinayaw nadan algo ya bulan an ta'on on alyon hi mapmaphodda. 27 Ya agge immalih nomnom'un mangipa'pa"en e mundu''un i dadiye. 28 Te onha inat'uhdi ot ma''id ha bahhonan dusaona' te agge' inyohhay pundayaw'uh nan nabaktun Dios. 29 Ya agge' nun'amlongan di punligatan nadan binuhul'u. 30 Ta agge' attog inidutan dida. 31 Ya iyuhuh nadan baal'un an namin di dumagguh balemi ya maphod di nangapnga' i dida ya pinangan'u dida. 32 Ya ma"id ha agge' impahigup hi balemi an ta'on on hanadan nalpuh udum hi boble.

33 Ya adiya' bo umat hi udum an iha''utday numbahulanda. 34 Ta ma''id ha itakut'uh pamihulan di tatagun ha''on ta lummuh adi' lumah'unan. 35 Mu maphodot on waha mundongol i datuwen ibaga'. Ya onha mabalin ya tobalona' i Apu Dios ta ibagana hi'on nganney numbahula'. 36 Ot ibagana'ey numbahula' ya ta'omman ya intudo"un namin ta ibalangag'u ya impongot'u ta punhintiggan di tatagu. 37 Mu madinola' an mangibaga i Apu Dios an namin nadan ina'inat'u.

38 Ya nada'en lutan tamtammuwa' ya agge' attog pinloh hi udum an tatagu 39 ya ma"id ha inala' hi intanom di udum an agge' binayadan ta maligatanda. 40 Te onha waha inat'uhdi ya hanat hay holo' ya pagat di humango i dadiyen luta. Hinaey pogpog di hinapit Job.