1 Indani ya timbal Apu Dios hi Job i han mabikah an alipuhhapuh ot alyona i Job di, 2 Undan nganne'a i hiya ta mi'yahhiyan'a i ha"on hinadan ato'ato'. Ma"id ha hunung nadan hapihapitom an ipatigana an ma"id ha nomnommu. 3 Ot agam ya ta tobalom nadan mahmaha' i he"a.

4 On innilam hi'on nganney inat'un nangiyammah nan lutah nan awadana? Nala'ing'a'e ya imbagam nan innilam. 5 Ya undan innilam hi'on nganney nunnomnom hi binillog tun luta ya hay dinukkena 6 ya hi'on nganney nangiphod hinan nipabunan tun luta 7 ot ayda tagu nadan bittuwon hinan mawmawi"it an mungkantada ya ta'on on nadan anghel ya it'itkukday amlongdah din nagibbuh an niyamma tun luta.

8 Ya ma"id ha udum hi namogpog hinadan liting ta adi mahinab tun luta hi'on bokon ha"on. 9 Ya ha"on di nunhophop hinan baybay hinan bugut ta hiya nan munhihillong di dallomna. 10 Ot iyamma' di ipogpogan nadan baybay ta adi mahinab nimpe tun luta. 11 Ot pogpogo' bo nan mabalin an dumatngan nadan mabikah an dalluyan hinan baybay.

12 Ya ituwen nitaguwam ya on waday nangibagam hinan nahdom hi, Mabigat'a, ya na'at? Ya on waday nangalyam hi tumimil nan potang ya na'at? 13 Ya on waday nangalyam hi, He''an patal ya humawwang'a ta way aton nadan adi maphod di pangatda an mangidinong hinadan ato'atondah nan munhihillong? 14 Ta wa'et manawwang nan potang ya ma'attigo nan mapmaphod an a'at nadan billid an umat hi mapmaphod an lubung di tigona. 15 Ya wa'et mapatal ya ma''id ha aton nadan tatagun mangat hinadan adi maphod an ninomnomdan aton.

16 Ya undan waday em nundaldallananan hi dallom nan baybay ta tinigom di alpuwan di liting hidi? 17 Ya on waday nangipatigon he"ah nan panton umeh nan munhihillong an awadan di numpun'ate? 18 Ya ibagam di anu hi'on nganney innilam hi binillog tun luta. 19 Ya on innilam hi'on danay alpuwan di patal ya hilong? 20 Hi'on innilam di awon an umeh awadanda ya on mabalin an pabangngadom didah nan nalpuwanda? 21 Abalinam nin an namin datuwe te wada'a tuwalih din nunlumuwa' hi an namin an wada. Ot wa mahan mo nayyan na'amamma'a.

22 Ya undan waday immayam hinan e' nangi'amungan hi dalallu? 23 Intalipon'u datuwe ta usalo' hi'on munggugubatday tatagu. 24 Ya on innilam di alpuwan di kilat onu hay awadan nan umatung an dibdib an malpuh tuluwan di algo? 25 Ya nganney nangiphod hinan umayuhan di ongal an udan ya nan ullupon di kilat? 26 Ya on innilam di nangiphod hi udan ta udanana nan na'appudut an lutan agge naboblayan 27 ta mabalin an humangoday holo' hidi?

28 Ya on waday innilam hi hi aman nadan dulnu ya udan? 29 Ya on waday hi inan di dalallu an mangdat hi kotol? 30 Ta gapuh nan nunhiglan tuningna ya kumulhi nadan liting hinadan wangwang ya hinadan uhhun di baybay ta umatdah nan batu. 31 Ya on abalinam Job an amungon nadan bittuwon ta umatdah nan ma'alih pleyades? Ya on abalinam bo an punhihi''anon nadan na'amung an bittuwon an ma'alih orion? 32 Ya on abalinam an ibagah nadan bittuwon an umat hinan ma'alih bear ya nadan imbabalena ta humawwangdah nan timpu an humawwangda? 33 Ya on innilam nadan uldin an ma'unud hi ad lagud? Ya on mabalin an ipa'atmu datuwen uldin hitun luta? 34 Ya on mabalin an tukukam nadan bugut ta aganday pa'alih udan ta mahinab nan awadam ta lo'tat ya malimuh'a? 35 Ya on mabalin ta mandalom nadan kilat ta unudonda nadan pohdom hi atonda ya ahida immalin mumpatigon he''a?

36 Ya nganney nangdat hi la'ing ya nomnom di tagu?*38:36 Hay ohan ibalinan tuwe ya nganney nangdat hi abalinan nadan bugut ta ipa'alinay udan? 37 Ya on waha taguh abalinana an mamilang hinadan bugut? Onu ha abalinanan manigging hinadan bugut ta mikuyag nan udan 38 ta mahnong nadan hupu' hitun luta ta kumulhida. 39 Ya undan abalinam an e i'anupan nadan inlum di layon hi anonda ta mabhugdah 40 nan liyang an umoh'ohnonganda? 41 Ya nganney uggan mamangan hinadan impah di gayang hi'onda mumbagan ha"on hi anonda?