1 Hi Moses ya inamungnan namin nadan ap'apun di himpahimpamu'un an tinanud Israel ot alyonan diday, Datuwe nadan tugun Apu Dios i dita'u.

2 Hi'on waday insapatan di ohan tagu hi atona onu ha imbaganah mahapul an atona ya mahapul an ipa'annungna ta ma"id ha ibahhona.

3 Ya hi'on waha mangilog hi babai hi nanongnan niddum hinan ammodna ya waday insapatanan Apu Dios onu imbaganan mahapul an atona 4 ya hi'on dingngol amanah diyen insapatana ya adina ipagol ot mahapul an adina ibahho. 5 Mu hi'on ipagol amanah diyen insapatana ya adi pabahulon Apu Dios hidiyen babai hi'on aggena inat nan insapatana.

6 Ya hi'on hidiyen babai ya nagibbuh an waday insapatanah atona ya ahi mangahawa 7 ya hidin dingngol nan ahawanah diyen imbagana mu adina ipagol ya mahapul an ipa'annungnan namin nadan insapatana.

8 Mu hi'on hidin dingngol ahawana ya ipagolna ya adi mahapul an ipa'annungna ot adi ibilang Apu Dios hi numbahul hi'on aggena impa'annung.

9 Ya hi'on waday insapatan ha nabaluh babai onu ha ni'bolhe*30:9 Hay pangalin di udum hinan bolhe ya hiyan. ya mahapul an ipa'annungna.

10 Ya onha nan nangahawa an babai ya waday insapatanah atona onu imbaganah mahapul an atona 11 ya dingngol ahawana mu adina ipagol ya mahapul an ipa'annungnan aton. 12 Mu onha dingngol nan ahawana an wadaday insapatanah atona ya ipagolna ot adi mahapul an ipa'annungna ot hi Apu Dios ya adina pabahulon hidiyen babai. 13 Te nan lala'in ahawana di ma'unud hi'on iyabulutna onu adina. 14 Mu hi'on nan lala'in ahawana ya dingngolna mu adina ipagol ot hidiyey panginnilaan an unnudanah ahawana. 15 Mu hi'on hinnodna ta nala"uh di atnay algo ya ahina ipagol ot hiya moy madusah agge nangatan ahawanah nan insapatana.

16 Ta danae nadan tugun Apu Dios an imbagana i Moses an ma'at hinan waday ahawana ya hinan babain niddum hinan ammodna.