1 Tigom'e tayya Apu Dios tun punligligata'.

2 Ot hanat donglom bahan tun pumpahmo'a' i he''a.

Te ma"id ha udum hi bumoddang i ha"on hi'on bokon he''a an patul ya Dios an un'unudo'.

3 Binigat hinan mawmawi"it on mi'hapita' i he"a.

On inanuha' an hadhaddon di pambalmu.

4 Innila' Apu Dios an nunhiglay aggem naminhod hi bahul.

Ya adi mabalin an mihaggondan he"a nadan adi ahan maphod di pangatda.

5 Ta'on on nadan munlattuwag ya nunhiglay bungotmun dida.

Te nunhiglay hihiwom hinadan mangmangngat hi adi maphod.

6 Ya dadagom nadan ma'layyah ya atbohdih nadan hi kittang on pumate ya ta'on on hanadan huma'uha'ul hi ibbada.

7 Mu maphod ahan ta gapuh nan ongal an homo'mu i ha"on ya mabalin an hunggopa' hinan pundayawan i he"a ta dayawon da'ah nan Templo.

8 Ot hanat boddangana' ta unudo' nadan pohdom an ta'on hi dakolda tayya tudan mi'buhul i ha''on.

9 Ya ma"id ha dinol'u hinan ibagada.

Manu te ma"aphod di panapitda mu dee mannot an huma'ulda ta way atondan manadag hi ibbadan tagu.

10 Ot hanat dusaom dida ta madadagda.

Ta diday a'atan nadan adi maphod an ninomnomdan aton.

Ta mama"idda te hiya damdama an ngohngohayyon da'a.

11 Mu hanadan mangididinol i he''a an gapuh pamhoddan he"a ya hanat pa'amlongom dida ta nanongnan ikankantaday pun'amlonganda.

Ya hanat ipappapto'mu dida ta minaynayun an mun'am'amlongda.

12 Innila' Apu Dios an wagaham nadan mangun'unud i he''a.

Ta paddungnay mili'woh i dida nan pamhodmu ta hidiyey ayda hapiyo.