1 Apu Dios, tanganu on'a immadawwi i ha''on?

Ta adiya' hanguton i he"a hi ad uwanin maligligatana'.

2 Hanadan adi maphod di pangatda ya munlattuwagda an mamalpaligat hinadan nun'awotwot.

Daan mot atom i dida nadan ninomnomdan aton hi ibbadan tagu?

3 Te ilattuwagda nimpe nadan adi maphod an pohpohdondan aton.

An na'agumda ya pihulon da'a ya idutan da'a bo udot i dida.

4 Te hay punnomnomdah adolda ya na'abbaktuda ta hiya nan adida mumpaboddang i he"a te alyonday adi da'a anu mahapul.

5 Yaden maphod di pumbalinan nadan ato'atonda.

Ya nunhiglay pangpangallidah nadan adi mangiyunnud i dida.

Ya ma"id ha punnomnomdah nadan tugunmu.

6 Te hay punnomnomda ya malingngopdah inggana.

Ta mun'am'amlongdah inggana te ma'dinnolda an ma"id anu ha dumatong hi punligatanda.

7 Ya hay impa'inghadan ibagabaga ya idut ya layah ya panattatakut.

Ta umipahigah donglon dadiyen adi maphod an hapihapitonda.

8 Ya eda mumbota' hinan nihaggon hinadan boble.

Ta munhooddah mala''uh on pinateda an ta'on on hanadan ma''id ha bahulda ya hanadan ma"id ha abalinanda.

9 Ta nipaddungdah nan layon an mumbota'.

Ta wa'e ha mala''uh hinadan ma"id ha abalinanda on dimpapda ta iye"eda dida.

10 Ya gapu ta mabikahda ya pamaaggon inokmomanda nadan bota'onda.

11 Ya alyonda bo udot di, Ta'omman ot agge innilan Apu Dios datuwen at'atton ta'u te onadan titiggon.

12 Ot hanat dusaom ahan Apu Dios nadan mangamangat hi adi maphod.

Mu hanada'en mahmahmo' an mapalpaligat ya hanat boddangam dida.

13 Te tanganu udot on pihulon da'a i dadiyen adi maphod di pangatda.

Te madinolda an adim nimpe anu dusaon dida.

14 Mu innila' an tigtiggom di punholholtapan nadan udum an tatagu.

Ya he''a han dinlonda an bumoddang i dida te he''a han mabalin an mangita'dog hinadan nun'apuhig.

15 Ot hanat dusaom nimpe nadan adi maphod di pangatda ta ingganah idinongda nadan adi maphod an ato'atonda.

16 Ot ta'on on mama"iddah tun boblem nadan mundayaw hi udum an dios mu da'mi'e ya he"ay Ap'apumi hi inggana.

17 Innila' Apu Dios an dongdonglom di dasal nadan mapalpaligat ta pa'amlongom damdama dida.

18 Ya ita'dogmu dida ya ta'on on nadan nun'apuhig.

Ta wan ma"id mo ha uggan e manattatakut ya mamalpaligat i dida.