1 He''a Apu Dios an alpuwan di abalina' di pohpohdo'.

2 Te hi Apu Dios di nahamad hi mangipapto' ya mangihwang i ha''on ya hiyay paddungnay hapiyo' onu doplah an ihi"uga'.

3 Ya hidin numpaboddanga' i hiya ya inihwanga' hinadan binuhul'u.

Ta hiya nan hiyay nahamad hi dayawo'.

4 Te handi'e ya aya' tuntundon hi ate ta hay punli'na' ya aya' iyanud hi mabikah an liting.

5 Ya paddungna boy nahuluwa' ta ma''id ha bahhonan mateya'.

6 Ya hidin nunhigla an maligatana' ot mumpahmo'a' i Apu Dios an wah ad abunyan ya dingngolnay dasal'u.

7 Ta gapuh bungot Apu Dios hinadan binuhul'u ya impa'alyogna tun luta ta ta'on on hanan nipabunan nadan billid on na'ihalda.

8 Ya paddungnay manawwang hi olongnay ahuk ya manawwang hi to'onay bala ya mundalang an apuy.

9 Ot iluwatnah ad lagud ot duma"ul an inggoppa'nah uhhun nadan himmilong an bugut.

10 Ot milugan hinan muntayyapan an kerubim an pun'iyen di dibdib.

11 Ya nili'mut i hiya nan himmilong an bugut ta umat i ha nahyong an udan.

12 Ya ma'binnang hi awadana ta kumilakilat ya mun'a'agah di o''ongal an dalallu.

13 Ya himmapit nan na'abbaktun Dios an paddungnay kidul di hapitna.

14 Ot ipa'alinay kilat an ay papan di pana ta pamaag bo aya ya ahibubuttikan nadan mi'buhul i hiya.

15 Ya gapuh bungotna ya minaganana nan baybay ta pamaag ya ma'attigo nadan dopona ya nabudhan nan gopnad tun luta.

16 Ya ta'on on hidih nan awadanah ad abunyan ya paddungnay nunyu"ung ot guyudona' hinan dallom di liting ot ipada'ala'.

17 Ta inihwanga' i hiyah nadan binuhul'u an mun'abibikah ya mun'abubungot an adi' abalinan an abakon.

18 Ya impadihda bo udot hidin nunhiglay punligata' di eda panadagan i ha"on.

Mu maphod ta inihwanga' i Apu Dios.

19 Ya innila' an manu'eh inihwanga' ya umipa'amlong i hiya nadan maphod an pangat'u.

20 Ta athidiy inat Apu Dios i ha"on te innilana nan nipto' an pangat'u.

21 Te inun'unud'u nadan tuguna an ma"id ha inat'uh adi maphod ya agge' inwalong an mangun'unud i hiya an Dios.

22 Te hanadan tugunay minonomnom i ha"on an ma''id ha imbahho' i dadiye.

23 Ya ma''id ha e' numbahulan i hiya.

24 Ta binanoddangana' i hiya te innilana nimpen ma"id ha bahul'u ya maphod di pangat'u.

25 He"a Apu Dios ya minaynayun di pangipapto'mu hinadan manginaynayun hi pangulugdan he"a.

Ya maphod boy atom hinadan maphod di pangatda.

26 Ya ipatigom di amaphodmuh nadan nipto' di pangatda.

Mu dusaom nadan adi maphod di pangatda.

27 Ya boddangam nadan mumpada"ul mu hanada'en nabaktuy panigodah adolda ya ipada"ulmu dida.

28 He"a Apu Dios di paddungnay dilag an mamatal hinadan paddungnay munhihillong hitun nitaguwa'.

29 Hi'on he''ay bumoddang i ha''on ya abalina' an abakon nadan mangubat i ha"on.

Ya abalina' bon hogpon nadan bobleda an ta'on on binattuy aladda.

30 Hi Apu Dios ya nipto' di pangatna ya immannung nadan hapitna.

Ya hiyay paddungnay hapiyon nadan mihi''ug i hiya.

31 Te hiya ya abuh di Ap'apu.

Ya hiya ya ammuna nan paddungnay doplah nimpe an ihi"ugan.

32 Ya hiya nan Dios an mangdat hi abalina' ta maphod di pangat'u.

33 Ya hiyay mangipa'awiging i ha''on ta umat hi pamtik di ulhay pamtik'u.

Ta ta'on on hinadan nun'atagen billid ya abalina' an bumtik hidi ta mihwanga'.

34 Ya intudduwana' boh ato' an mi'gubat ta ta'on on hanan gombang an pana ya abalina' an paudon.

35 He''a Apu Dios di paddungnay hapiyo' an nangihwang i ha"on.

Ya indatmuy abalina' ta inabak'u nadan binuhul'u ta teen nundongola'.

36 Ya gapu boh boddangmu ya binumtika' an ma"id ha nangakhup i ha"on hinadan binuhul'u.

37 Ta ha"on di namudupudug i dida ta ingganaot patayo' didan namin.

38 Ta ma"id ha atondan mangiballoh te numpate' dida.

39 Athidiy na'at te he"ay nangdat hi abalina' an mi'gubat ta inabak'u nadan binuhul'u.

40 Ta impabtikmu dadiyen binuhul'u mu numpudug'u damdama dida ot pumpate' dida.

41 Ta mumpahpahmo'da an mumpaboddang mu ma''id ha bumoddang i dida.

Ya ta'on on he"a an Dios ya aggem binoddangan dida.

42 Ta numpate' nimpe dida an paddungnay nuntogtog'u dida ta ingganaot mumbalindah ay hupu' ot pun'igatin'u dida ta numbalindah ay pito' hinan kalata.

43 Ta inihwanga' i he"a Apu Dios hinadan mumpungngohen tatagu.

Ot pumbalinona' hi ap'apun di dakol an tatagu an ta'on on hanadan agge nangin'innila i ha"on an wah udum hi boble ya munhilbidan ha"on.

44 Te takutana' hi tataguh udum an boble ta hiya nan un'unudonday ibaga'.

45 Ta munggagayonggongdan humawwang hinadan nun'ahamad an nipa''ayanda.

46 Ot madayaw hi Apu Dios an wadawadah inggana an hiya nan paddungnay doplah an ihi''ugan.

Ta hiya nan dayawo' te hiyay mangih'ihwang i ha"on.

47 Ya hiyay nangita'dog i ha"on ta inabak'u nadan binuhul'u ot pumbalinona' nimpe hi ap'apu hi abobboble.

48 Ta inihwanga' nimpe i hiya hinadan binuhul'u.

Ot boddangana' ta inabak'u dadiyen mun'abubungot an tatagu.

49 Ta hiya nan ikankanta' di pundayaw'un he''a Apu Dios an ta'on on idanan bobley awada'.

50 Te he"a Apu Dios ya nanongnan idatmuy abalina' an pinto'mu hi patul ta nangaba'abaka' hi gubat.

Ya munnananong nan ulem i ha"on an hi David ya hinadan tanuda'.