1 Apu Dios, tanganuna' ahan ingnganuy?

Ta hay punli'na' tayya ya na'iddawwi'a ta adim dongdonglon di palak'u.

Ya tanganu bahan ona' adi boddangan i he"a?

2 Abigabigat ya ahodohodom tayya on mumpahmo'a' i he''a mu adiya' ahan tobalon i he''a.

Ta ma"id tayya ha e' luminggopan.

3 Mu ta'on on athidi ya he"a damdama an nahamad an Dios an patulmi di dayawonmin holag Israel.

4 He"ay nundinolan handidan a'ammodmi ta hiya nan inihwangmu dida

5 hidin numpahmo'dan he''a.

Ot gapu nimpe ta he"ay nundinolanda ya inihwangmu dida te hidiye tuwaliy imbagam.

6 Mu ten ad uwani ya aya' bokon taguh pangat tudan ibba an aya' kolang hinan luta an punhinggagatinan di tatagu.

7 Ya an namin tayyay manigon ha"on on munwigwigiwigda ya dildilahona' on pinewepewetana'.

8 On alyonda udot di, Ot tee ta'wan hi Apu Dios di nundinolam ya tanganu bo on adi da'a ihwang i hiya?

Ya tanganu on adi da'a boddangan hi'on immannung an umipa'amlong'an hiya?

9 Mu ta'on on athidi ya innila' damdama an nihipun hidin agolang'u ya he"a Apu Dios di nangipanapto' i ha''on.

10 Te ta'on tuwalih on hidin awada' hi putun ina ya ha"on di ohah pinto'muh tagum.

11 Ot hanat adiya' taynan i he''a te tuweda tayyay binuhul'u an mamalpaligat i ha"on.

Ya he''a ya abuh han mabalin an bumoddang i ha''on.

12 Dakolda tayya nadan mun'abibikah an binuhul'u an nunli"ub i ha''on an umatdah nadan bulug an baka an wahdih nan pastuh ad Basan.

13 Ya umatda boh nadan mun'alumiyom an layon an nidadaandan umihakmal hi tagu.

14 Ta pamaag tayya ya ma"id ha bikah'u an ay namagmagan di adol'u.

Ya ay tee nun'aguguduy tungal'u.

Ta pamaag ya aya' ahin an mun'a'umah te ma''id mo ha namnama'.

15 Ta ma"id mo nimpe ha bikah'u an umata' hinan pito' an bangan nahilhilit.

Ya namaganan di tangngotangngo' an nipuyut di dila' hidi.

Te paddungnay impulanga' hinan luta ta mateya'.

16 Lini''uba' tayyah tudan tatagun adi maphod di pangatda an ayda kahun nili''ub hi awada' ta nunhugatanda tayyay ta'le' ya huki'.

17 Ta ma'attigo mo ahan tayyay tungal'uh nangatda.

Ya mun'am'amlong nadan binuhul'u an manmannigon ha"on an munholholtap.

18 Ya nun'aladay lubung'u ot ibubunutda nan ohan lubung'u.

19 Ot hanat adiya' bahan taynan i he''a Apu Dios te he"a han mabalin an mangipabikah i ha"on.

Ot agam bahan ta boddangana'.

20 Ta adiya' bahan patayon i datuwen binuhul'u te ayda tayya mun'abubungot an kahu.

21 Ya umatda boh nan layon onu nadan mun'abubungot an bulug an baka.

22 Ot hanat ihwanga' ta way ato' an mangipa'innilah nan a'atmu hinadan ibba' hinan a'am'amunganmi an mundayaw i he"a.

23 Ot da'yun i'iba an mangun'unud i Apu Dios an tinanud Jacob an nangadanan hi Israel, ya hanat hi Apu Dios di dayawonyu ya punhilbiyanyu.

24 Te tigtiggona ya dodonglonay dasal nadan mapalpaligat.

Ta mumpahmo'da'e ya nundadaan an bumoddang i dida.

25 Ot dayawon da'a Apu Dios ya ipi'nong'u nadan imbaga' hi i'nong'un he"a hinan a'am'amunganmin tatagum.

26 Ta mi"an nadan nun'awotwot ta ingganah mabhugda.

Ya an namin nadan nanginnilan he"a ya dayawon da'a.

Ot hanat padukdukkayom ya palinggopom di pi'taguwanda.

27 Hanat an namin di tataguh abobboble ya kulugondah Apu Dios ta hiyay dayawonda.

28 Te hiya nan nabaktun ap'apuh tun luta.

29 Ta ta'on on hanadan nabaktuy panigodah adolda ya nadan mun'at'ate ya mundu"undan mundayaw i Apu Dios.

30 Ta hanadan mun'atanudan ya munhilbidan hiya ya ta'on on dida ya ahida uhuhon hinadan holagda nan a'at Apu Dios.

31 Ya ta'on on hanadan agge ni' niyayyam ya innilaonday nangihwangan Apu Dios hinadan tataguna.