1 Mipa'amlong nan tagun pinakawan Apu Dios an namin di numbahulana.

2 Ot mipa'amlong nimpeh diyen tagu te pinakawan Apu Dios nadan numbahulana ta adina mo attaon an e kumulukuluk hi ibbana.

3 Hidin agge' nangitutuyuwan hinadan numbahula' ya abigabigat on ma"id ha linggop di nomnom'u ta pamaag ya ay mun'angpuh di adol'u.

4 Te ahodohodom ya abigabigat nimpe ya li'li'nao' nan pundusan Apu Dios i ha''on.

Ta lo'tat ya ma''id ha bikah'u an umata' hinan liting an tiniptip di potang hinan tiyalgo.

5 Mu hidin inabulut'un numbahula' ot ibaga' i he"a Apu Dios dadiyen numbahula' ya pinakawana'.

6 Ot ad uwanin mabalin ni' an donglom di dasal nadan mangun'unud i he''a ya hanat mundasaldan he''a.

Ta wada'ey dumatong hi nunhiglan punligatanda an paddungnay dimmakol nan liting hinan wangwang ya adida miyanud.

7 Ot he''a Apu Dios di paddungnay ihi''uga' ta ihwanga' hinadan adi maphod an ma'ma'at.

Ta mabalin an ikankanta' di nangihwangam i ha"on.

8 Ot alyon Apu Dios di, Ituddu' di nipto' hi unudonyu.

Ya atbohdin tugunon da'yu ya ipapto' da'yu i ha"on.

9 Ot maphod di na'na'unnud ayu ta adi ayu umat hinan kabayu an gahin di ipakamelan hi gumo' ya ahi umunud ta ipluynah nan pohdon nan nitakken*32:9 Hay pangalin di udum hinan nitakke ya nihakay. pangipluyana.

10 Hanadan adi maphod di pangatda ya dakol di punligatanda.

Mu hanadan mangidinol i Apu Dios hi nitaguwanda ya munnananong nan pamhod Apu Dios i dida.

11 Ot dita'un mangun'unud i Apu Dios ya mundinol ta'un hiya.

Ya maphod on ta'u ikankantay punhanaan ta'u ya pun'amlongan ta'u hinadan inatna i dita'u.