1 Daan mo bahan Apu Dios ta adiya' ihingal ya adiya' dusaon hinan bumungotam.

2 Te paddungna tayyay pinanaa' ot matukkada'

3 an gapuh bungotmuh nadan bahul'u.

Ta teen munhoholtapa' an hanakitana tayyay adol'u.

4 Innila' an dakol di numbahula' an paddungnay adiya' pa'pahhon hinadan bahul'u ya onha ipaddung hi liting ot malimuha' hi dinakolna.

5 Te gapuh adi' dumngolan ya nahugatana' ta tee mo tayyan mun'agub tudan hugat'u.

6 Ya nunhigla tayyan adiya' pa''itpol hi dogohna ya adiya' pa'atta'dog ta pamaag tayya ya ona' umukayungan hi abigabigat.

7 Te pamaag ya ay na'apuyan di adol'u ta mamammama tun hakit'u.

8 Ya ay naguduy tungal'u ta ma''id tayya ha bikah'u.

Ta nunhiglay hakit di nomnom'u i datuwen ma'ma'at i ha''on.

9 Ot innilam Apu Dios an o'oddamo' di em pangipaphodan i ha"on.

Ya innila' ot dodonglom di palak'u.

10 Ya kumanobkoba' tayya ya kimmapuya'.

Ya adi mo ahan tayya tumnong di panigo'.

11 Ya gapu ta alulugnin tudan hugat'u ya ma"id mahan mo ha mangidungo i ha''on hinadan hinaggon'u ya gagayyum'u.

Ya ta'on on hanadan pamilya' ya adida mihaggon i ha''on.

12 Ya hanada'en binuhul'u ya mangiphoddah paddungnay bitu ta ma'uhbunga'.

Ya numanomnomdah udum hi atondan manadag i ha''on.

Ta dakol di ibagabagadah pama''ihdan ha"on.

13 Mu pamaag'uy dindinong an aya' nanganga ta himpukpukito' an ay ma"id ha dingngol'u.

14 Ta pamaag nimpe tee ya aya' nanganga ya napukit.

15 Manu'eh athidiy ato' ya madinola' an hi Apu Dios di bumoddang i ha"on.

16 Te hay indasal'u ya hanat adina bahan iyabulut an dildilahona' hinadan binuhul'u hi'on waday punligata' ya adiya' ngihngihilan hi'on waday ibahhawa'.

17 Te pamaag mo ahan tayya ya aya' matumatukad.

Ya hiyah tuwe an hanakitana tayyay adol'u.

18 Ot itutuyu' an namin nadan numbahula' te datuwey mangdat hi inomnoma'.

19 Dakolda tayya tudan mun'abibikah an mi'buhul i ha''on an pamaaggon nunhiglay hihiwodan ha"on an ta'on on ma"id ha bahul'un dida.

20 Ya ta'on on maphod di pangat'un dida ya apyanan adi maphod di atondan ha"on.

Ya manu'eh ahiwawana' ya ita'dog'u nan maphod.

21 Ot hanat adiya' bahan iwalong i he"a Apu Dios.

22 Te he"a damdama nan mangih'ihwang i ha"on ot agammot bahan ta ma'a ta boddangana'.