1 Inanu'anusa' an hinhinnod di boddang Apu Dios ta lo'tat ya dingngolna nan pumpahpahmo'a' i hiya.

2 Te paddungnay wadaa' i ha pitoppito' an adallom an bitu ot guyudona' i hiya.

Ot eya' pata'dogon i han nahamad an batun umohnongan ta teen malinggopa' mohpe.

3 Ot itudduwana' i han balbalun kanta an pundayaw i hiya.

Ta hanadan nanigo i diyen inatnan ha"on ya middumdan mundayaw i Apu Dios ta hiya moy un'unudonda.

4 Ot mipa'amlong nan tagu an hi Apu Dios di pundinolana.

Ya adina pemanan nadan munlattuwag an tatagu an mundayaw hinadan dios di udum an tatagu.

5 Immannung Apu Dios an ma"id ha udum hi umat i he"a te ma"id ha bilang nadan milagro an ina'inatmu ya atbohdi nadan ninomnommun aton an iphodanmi.

6 Innila' Apu Dios an bokon hanadan mi'nong an umat hinan maghob an mi'nong onu nan mi'nong hi apakawanan di bahul di nabalol i he"a.

Te innila' an hay umipa'amlong i he"a ya hanan e' pangngolan ya pangunudan hinadan tugunmu.

7 Ta hiya nan alyo' di, Wahtuwa' tee Apu Dios.

Ya nundadaana' an mangat hinadan ipa'atmu an nitudo' hinan nitudo'an di tugunmu.

8 Hanadan umipa'amlong i he"a Apu Dios di pohdo' an aton.

Ya minonomnom i ha"on hanadan tugunmu.40:8 Hebrew 10:7

9 Ya wa'et na'amung nadan mundayaw i he"a on imbagabaga' i dida nan nangihwangam i da'min tatagum.

Ot innilam Apu Dios an hituwey pinhod'u an inaynayun an aton.

10 Te impa'ipa'innila' nan amaphodmu ya nan munnananong an boddangmu ya nan pangihwangam i da'mi.

Ya hinan a'amungan nimpen nadan mundayaw i he"a ya ipa'pa'innila' i dida nan ongal an pamhodmu ya nan pangipapto'mu i da'min tatagum.

11 Ot hana ahan Apu Dios ta minaynayun nan homo'mun ha"on.

Ya atbohdi nan pamhodmu ya pangipapto'mun ha"on.

12 Dakko'dakkol tayya tudan punligata' an paddungnay nili'wohdan ha"on.

Mu innila' an manu'eh na'at datuwen ha''on ya gapuh nadan dakol an numbahula' an indakdakolna mu hay dinakol di ibu"u ta ma"id ha pot'o' hi ato' ya ma"id mo ha namnamao' hi nitaguwa'.

13 Ot hanat boddangana' bahan Apu Dios hi ad uwani ta mihwanga'.

14 Ya hanat ulawom hanadan amod on mamate i ha"on ta ma"id ha pot'ondah atonda ta mibabainda.

15 Ya hanat athidi boy ma'at hinadan mangipadildilah i ha''on ta mibabainda pibo.

16 Mu an namin amin mundayaw i he"a ya hanat mipa'amlong ami.

Ya an namin amin inihwangmu ya hanat inaynayunmin alyon di, Madayaw hi Apu Dios.

17 Ya ta'on on athitun ahohomo'a' ya kimmapuy mo teey adol'u mu hanat adiya' bahan inganuy i he"a Apu Dios.

Te he"a ya abuh han mabalin an bumoddang ya mangihwang i ha"on.

Ot hanat boddangana' bahan.