1 Dingngolmi Apu Dios i handidan a'ammodmi hanadan nakaskasda'aw an ina'inatmuh din kanaman

2 an umat hinan inatmun nangipa'abak hinadan adi umunud i he"a an nunhitu ni' ituwen boble ta immaandahtu.

Ot idatmu i handidan a'ammodmih tuwen boble ot wagaham dida ta pinumhod di nitaguwanda.

3 Mu bokon hay almasda onu la'ingdan mi'gubat di nangabakanda te gapuh nan ongal an abalinam ya wadawada'a an bumoddang i dida te pinpinhodmu dida.

4 He"a Apu Dios di patulmi ya Dios an dayawonmi.

Ya he"ay innila' hi bumanoddang i da'mi an tatagum an tinanud Israel.

5 Ot gapuh nan ongal an abalinam ya inabakmi nadan binuhulmi.

6 Ot hanan e' pangabakan hi gubat ya adi' idinol hinadan almas'u.

7 Te he''ay bumanoddang i da'mi ta hiya nan mangabak ami ta mibabain nadan binuhulmi.

8 Ot he''a Apu Dios di nanongnah ipabaktumi ya punhanaanmih inggana.

9 Mu ad uwani ya ingnganuy da'mi ta adim mo ipangulu nadan tindalumi ta hiya nan ma'abak ami ta mibabain ami.

10 Te da'miy impabtik nadan binuhulmi ot pun'aladan namin nadan wadan da'mi.

11 Ya inyabulutmu ta numpateday udum i da'mi an ay ami kalnero.

Ya hanada'en aggeda ni'impapate ya niwakatdah udum hi boble.

12 Ta paddungnay nalakay nangigattangmun da'mi an ay ma"id ha balolmi.

13 Ta hanadan nun'ihaggon an boble an nanigo i diyen nangatmun da'mi ya dildilahon da'mi ya ngihngihilan da'mi.

14 Ta wa'e on iya"apoh nadan tataguh udum hi boble di panughugnuddan da'mi on munwigwigiwigda udot hi'on tinigo da'mi.

15 Ta nunhigla tayyay bain'un mangmangngol

16 hinadan pamihul nadan binuhulmin ma'ahihhiwon da'mi te amod on da'mi paligaton.

17 Ma'ma'at i da'mi datuwe an ta'on on agge da'a liningling ya aggemi imbahho nadan imbagam hi atonmi.

18 Immannung an agge da'a attog inwalong ya aggemi imbahho nadan tugunmu.

19 Mu pamaag tayya ya paddungnay tinugmilan da'mi ot taynan da'mih nan munhihillong an awadan di mun'abubungot an animal.

20 Onha liniwwan da'a ot e ami mundayaw hi udum an dios

21 ya undan nin aggem na'innilaan.

Innilami an ma"id ha mipa"en he"a te ta'on on tun nomnommi ya innilam.

22 Ya gapu tee hi pangun'unudanmin he''a ya on da'mi patayon an umat amih nan kalnero an nidadaan an mapalti.44:22 Roma 8:36

23 Ta nunhigla tayya tun punligatanmi mu daan mo bahan ta adi da'mi inganuy hi inggana.

24 Ot undan bahan he"a'e ya mundindinnol'a i ha athitu an tigom'e tayyan munholholtap ami

25 an paddungna tayyay nun'ihuhubag ami ya adimi abalinan an bumangon.

26 Innilami an munnanong nan pamhodmu ot agam bahan Apu Dios ta boddangan da'mi.