1 Apu Dios, innilamin inwalong da'mi ta hiya nan na'abak ami te bimmungot'an da'mi.

Mu daan mo bahan tatawwa ta ibangngadmu din maphod an niyatanmi i he"a.

2 Paddungnay inwagotmu tun boblemi ta nun'atotommang nadan luta.

Mu daan mo bahan ta pumbangngadom din a'atna tuwalih din hopapna.

3 Te nunhigla bo aya tayyay namalpaligatmun da'mi an paddungnay impa'inuman da'mih bayah ta ahidadappingan ami.

4 Mu hanadan mangun'unud i he''a ya impa'innilam i didan mihwangdah eda adadagan.

5 Ot donglom bahan tun dasalmi te innilami an pinpinhod da'min tatagum ta ihwang da'mi an gapuh nan ongal an abalinam.

6 Handi ya wa'ahnah nan awadam ot alyom di abakom nadan binuhulmu ya ginodwagodwam nan bobleh ad Sekem ya ta'on on nan nundotalanah ad Sukkot ta ipiyappongmun da'min tatagum.

7 Ya inalim di, Hana'en bobleh ad Gilead ya nan numboblayan nadan tinanud Manasseh ya bagi'.

Ya puntindaluwo' nadan i Epraim ya pun'ap'apuwo' nadan i Judah.

8 Ya hanada'en i Moab ya mumbalindah baal'u ya hanada'en i Edom ya mumbalindah himbut'u.

Ot itkuk'uy amlong'u hi nangabaka' hinadan i Pilistia.

9 Ot hi ad uwani Apu Dios ya nganney mangipangulun ha''on an umeh nan nahamad di aladnan bobleh ad Edom.

10 Undan iwalong da'mi tatawwa Apu Dios ta adi da'mi ipangulu hi emi pi'gubatan hinadan titindalu'.

11 Daan mo bahan tatawwa ta boddangan da'mi an e mangubat hinadan binuhulmi?

Te ta'on on boddangan da'mih tatagu ya innila' an ma"id damdama ha hilbina.

12 Mu di'et he"a Apu Dios di mangipangulun da'mi ya ma"id ha bahhonan mangabak ami.