1 Hi Apu Dios ya ammunay dinlo' hi mangihwang i ha''on.

2 Te hiya ya abuh han paddungnay nahamad an batun ihi"ugan.

Ya hiyay mi'hanggah nadan binuhul'u ta adiya' ma'abak.

3 Da'yun humihihiwon ha''on ya ngalngalam bahan tatawway pangatyun ha"on an ta'on on tigonyun nakapuya' an umata' hinan mun'apalu'ah an binattun alad.

4 Pohdonyu ahan nayyan ipababaa' hitun sa'ad'u.

Ta hiya nan amod on ayu munlayah an manu te mapmaphod di panapityu mu dee mannot an mun'idut di nomnomyu.

5 Mu hi Apu Dios damdamay pundinola' te hiya han bumoddang i ha"on.

6 Te hiya nimpe han mipaddung hi nahamad an batun ihi"ugan.

Ya hiyay mi'hanggah nadan binuhul'u ta adiya' ma'abak.

7 Ot hiya nimpey pundinola' hi mangihwang i ha"on te hiyay mangdat hi abalina' ta mundongola' ya hiya nan nahamad hi ihi"uga'.

8 Ot da'yun i'iba ya maphod on hi Apu Dios di nanongnah pundinolan ta'u.

Ta hiyay pangibagan ta'uh nadan inomnoman ta'u te hiyay nahamad hi ihi"ugan ta'u.

9 An namin ta'un tatagu an nawotwot onu kadangyan ya nada''ul ta'uh panigona.

Te onha ikilu dita'u ot ma"id ha damot ta'u an umat ta'uh dibdib.

10 Ta hiya nan hanat adiyu pundinolan nadan kinadangyanyu.

Ya hanat adiyu pun'amlongan nadan kinulukulukyu onu inako'akoyu.

11 Te imbagan Apu Dios an alyonay hiya ya ammunay ongal di abalinana.

12 Ya alyon bon Apu Dios di munnananong di pamhodnah tatagu.

Ta ma"id ha bahhonan waday idatnah gunggunan di hinohha an mipu'un hinadan ina'inatda.