1 An amin ta'un tataguh abobboble ya hanat itkuk ta'uy pundayaw ta'un Apu Dios.

2 Ta ikankanta ta'uy anabaktuna.

3 Ta alyon ta'un hiyay, Nakaskasda'aw nadan ato'atom Apu Dios an mangipatigoh nan ongal an abalinam ta hiya nan mundu''un nadan binuhulmun he''a an gapuh takutda.

4 Hanat an namin amin tataguh tun luta ya ikankantamiy pundayawmin he''a.

5 Ot hanat nomnomnomon ta'u nadan nakaskasda'aw an ina'inat Apu Dios an iphodan ta'un tataguna.

6 Te nunhi"anona nan liting hinan baybay an mumbolah*66:6 Nan baybay an mumbolah ya manu'eh mumbolah di tigona ya gapuh nan holo' an wadah nan dallomna ya nan panag an mumbolah hi pingngitna. ya hinan wangwang an nungngadan hi Jordan ta nangi'wan handidan a'ammod ta'un immagwat.

Ot hanat mun'am'amlong ta'u i dadiyen inatna.

7 Ya gapuh nan ongal an abalinana ya hiyay mun'ap'apuh inggana.

Ya tigtiggonan namin di ma'ma'at hi abobboble.

Ot da'yun mungngohen hiya ya hanat adiyu ipatnan mi'hanggan hiya.

8 Ya hanat an namin ta'un tatagu ya itkuk ta'un mangikanta hi pundayaw ta'un hiya.

9 Te hiyay nangihwang i dita'u ta agge dita'u inabak hinadan binuhul ta'u.

10 Pinatna da'mi i he"a Apu Dios ta umat amih nan silber an nilutu ta namahmah.

11 Ya paddungnay tinawang da'mi ot ipahakbatmun da'mi han nunhiglan punligatanmi.

12 Te inyabulutmun inabak da'mih nadan binuhulmi ta na'abak ami ni' ta ay da'mi nun'igatin hinadan binuhulmi.

Ya paddungna boy nundalanon da'mi i ha apuy onu liting an umiyanud.

Mu ta'on mu ta athitun inyali da'mi ituwen boble an wadan namin di mahapulmi.

13 Ot tee an inyali' hitun Templo handidan imbaga' hi iyappit'u ta maghob an mi'nong i he"a

14 an hiya datuwe din imbaga' hidin maligligatana'.

15 Ot datuwen nipataban kalnero ya baka ya gulding ya i'nong'u ta maghob an mi'nong i he"a.

Ot hanat umipa'amlong i he"a nadan hunghungda.

16 Ot da'yun ibba' an mangun'unud i Apu Dios ya hanat donglonyu ta uhuho' nadan inat Apu Dios i ha"on.

17 Initkuk'un numpaboddang ya nangikantah punhanaa' i hiya.

18 Mu onha agge' imba"ag nadan numbahula' i hiya ot wan aggena dingngol di dasal'u.

19 Mu innila' an dingngolna nan dasal'u ot boddangana'.

20 Ot madayaw hi Apu Dios te dingngola' hidin numpahmo'a' i hiya ya munnananong nan pamhodnan ha"on.