1 Apu Dios an munhumalyah tatagu, daan mot ipatigom di bungotmu hinadan mangmangngat hi adi maphod.

2 Ta humalyaom di atagutaguh tun luta ta dusaom nadan nunhiglan munlattuwag an tatagu te hidiyey lebbengnan ma'at i dida.

3 Hanadan mangmangngat hi adi maphod ya pun'amlonganda dadiyen ato'atonda.

Ot undan anuud di pangipadinongam i dadiyen at'atonda?

4 Te nunhiglan ilattuwagda nadan adi maphod an at'atonda.

5 Ya nunhiglay pamalpaligatda hinadan mangun'unud i he"a an imbilangmuh tatagum

6 an pumpateda attog nadan nun'abalu ya nun'apuhig ya ta'on on hanadan ni'iboblen da'mi.

7 Te alyonday, Ta'on anuh on atondahdi ot undan anu tigtiggon nan Dios an dinayaw din ammodmin hi Jacob dadiyen at'attonda.

8 Da'yun paddungnay ma"id ha nomnomnan tatagu ya undan anuud ya ahi ayu manomnoman?

9 Undan mabalin ta hi Apu Dios an nangiphod hi mata ta'u ya inga ta'u ya mumbalin ta hiyay napilok ya napukit?

10 Ya undan mabalin ta hiyan muntudduh tatagu ya mumbalin ta hiyay ma"id ha innilana?

Ya undan mabalin ta hiyan munhumalya ya adina dusaon nadan numbahul?

11 Innilanay wah nomnom di tagu ya hidiyen punnomnomda ya ma"id ha hilbina i hiya.

12 Ot mipa'amlong nan tagu an tudtuduwam Apu Dios hinadan tugunmu.

13 Te mabalin an madinolda an ta'on on maligligatanda ta ingganah pundusaam hinadan mamalpaligat i dida.

14 Innila' ot adi inganuy Apu Dios nadan ibilangnah tataguna te nabaloldan hiya.

15 Ta hiya nan lo'tat ya maphod di pangat nadan mun'ap'apu ta wan mipa'amlong nadan tatagun maphod di pangatda.

16 Hidin ni'gubata' hinadan adi maphod di pangatdan binuhul'u ya ma"id ha udum hi bimmoddang i ha"on hi'on bokon hi Apu Dios ya abuh.

17 Ot onha aggeya' binoddangan i hiya ot wan nanatteya' tuwali.

18 Te hidin mali'na' an ma'abaka' ot mumpahmo'a' i Apu Dios te innila' an gapuh nan ongal an pamhodnan ha"on ya binoddangana'.

19 Ya wa'e tuwali ta minomnomana' on hiyay mangipa'amlong i ha"on.

20 Hanadan mun'ap'apu an adi maphod di pangatda ya adi mabalin an mi'hayyupda i Apu Dios te dida'e ya mabalin an alyondah maphod nadan adi maphod.

21 Te mabalin an mumboboddangda ta ipapateda nadan ma"id attog ha bahulna.

22 Mu hi Apu Dios ya ipappapto'a' te hiyay paddungnay doplah an ihi"uga'.

23 Ot ukod i hiya an mundusa hinadan tatagun adi maphod di at'attonda.