1 Madinola' i he"a Apu Dios ta hiya nan nunhiglay amlong'un mangikankanta hi pundayaw'un he"a.

2 Ta hinan mun'awiwi"it on bimmangona' ta ip'ipaggangoh'u nan harp ya lira an ta'on on agge ni' timmulu nan algo.

3 Ta ipa'innila' di punhanaa' ya pundayaw'un he''a hi atagutaguh abobboble.

4 Te adi malukud nan ongal an pamhodmu i da'mi te umat hinan numbattanan tun luta ya hi ad lagud.

Ya atbohdi an ma"id ha pogpog nan pangipapto'mu i da'mi.

5 Ot he"a Apu Dios ya hanat mipatigoy anabaktum hi abobbobleh tun luta.

6 Ot donglom bahan tun dasalmi te innilami an pinpinhod da'min tatagum ta ihwang da'mi an gapuh nan ongal an abalinam.

7 Te handi ya wa'ahnah nan awadam ot alyom di abakom nadan binuhulmu ya ginodwagodwam nan bobleh ad Sekem ya ta'on on nan nundotalanah ad Sukkot ta ipiyappongmun da'min tatagum.

8 Ya inalim bo di, Hana'en bobleh ad Gilead ya nan numboblayan nadan tinanud Manasseh ya bagi'.

Ya puntindaluwo' nadan i Epraim ya pun'ap'apuwo' nadan i Judah.

9 Ya hanada'en i Moab ya mumbalindah baal'u ya hanada'en i Edom ya mumbalindah himbut'u.

Ot itkuk'uy amlong'u hi nangabaka' hinadan i Pilistia.

10 Ot ad uwani Apu Dios ya nganney mangipangulun ha''on an umeh nan nahamad di aladnan bobleh ad Edom?

11 Undan iwalong da'mi tatawwa Apu Dios ta adi da'mi ipangulu hi emi pi'gubatan hinadan titindalu'?

12 Daan mo bahan tatawwa ta boddangan da'mi an e mangubat hinadan binuhulmi.

Te ta'on on boddangan da'mih tatagu ya innila' an ma"id damdama ha hilbina.

13 Mu wa'et he"a Apu Dios di mangipangulun da'mi ya ma"id ha bahhonan mangabak ami.